Dual PanelKaditaloanna Gog
1Rampomi tu kadanNa PUANG lako kaleku, Nakua:
2E ma’rupa tau, mentingo lakoko Gog lako tondok Magog, arung tarompo’na Mesekh sia Tubal, ammu ma’nubua’ lako,
3mukua: Inde sia tu kadanNa Puangta PUANG, Nakua: Manassa la Kulaoiko e Gog, arung tarompo’na Mesekh na Tubal!
4La saeNa’ unnalako sia la kupakadangi kadangan tu parangka sadangmu, Kupatassu’ko male sola mintu’ surodadummu, iamotu mintu’ darang sia pakkanarang, sakka’ pa’bunona, iamotu misa’ tuntunan kapua, ma’pakolong sia ma’balulang; iatu mintu’ tau iato biasa ma’pa’dang.
5Menturu’ duka tu to Persia sia to Etiopia na to Put, sakka’ nasang balulang sia songko’ bassi;
6sia Gomer sia mintu’ surodadunna; sia to Togarma, tu mambela rampe daanna lu sola mintu’ surodadunna buda bangsa musolan.
7Ma’kamandi’ko sia ma’pasakka’ko, la iko sia iatu mintu’ to parari tu unturu’ko; iko la dadi pangulunna.
8Iake lendu’mi ba’tu sangapa-apa attu, maneroko dipokadan parenta; iake nalambi’mi tu taun la sae, la ke’de’moko ullaoi tu tondok iato, tu mangka dipasule dio mai kasirarian, iamotu misa’ bangsa, tu mangka dipasipulung dio mai mintu’ bangsa dao buntunna Israel, tu masaimo mempadang talo, apa disolammo sun dio mai mintu’ bangsa; anna torro marampa’ sola nasang.
9Iatonna attu iato la ke’de’ko susi misa’ guntu’ mane la sae; la susiko gaun tu untutu’i kuli’na padang, la iko sola mintu’ sorodadummu sia buda bangsa, tu musisolan.
10Inde sia tu kadanNa Puangta PUANG, Nakua: Attu iato la bu’tu ba’tu pira-pira pa’timbangan lan penaammu; ammu tangnga’ apa kadake.
11La ma’kadako kumua: la ke’de’na’ untamai misa’ tondok, tu kampong manna, la ullaoina’ to rapa’, tu to torro manaman, iamotu mintu’ kampong tang dirinding tembo’, tang disalli’ sia tae’ babanganna;
12la urrampa sia la ussarrinni mintu’ apanna, la umpata’pai limammu tu mai inan daun-lauan, tu diniiomo sule sia ullaoi misa’ bangsa, mangka dipasipulung dio mai mintu’ bangsa, tu unnappa’ patuoan sia barang apa, sia torro lan tangngana lino.
13La nakuanko Syeba, Dedan sia to ma’balilinna sia to paana Tarsis, kumua: Saerokomika la mangrampa, mitambairaka tu mintu’ surodadummi la ussarrinni mintu’ apa, la unnala salaka sia bulaan, la unnappa’ patuoan sia barang apa, sia la mangrampa buda?
14Iamoto, ma’nubua’ko, e ma’rupa tau, sia ma’kadako lako Gog, mukua: Inde sia tu kadanNa Puangta PUANG, Nakua: Tae’raka musa’ding tu attu, nanii torro manaman to Israel, taungKu?
15Sia la ke’de’ko dio mai inanmu, munii torro, dio mai inan mambela rampe daanna lu, iko sia buda bangsa musolan, pakkanarang nasang, misa’ tuntunan kapua sia buda surodadu,
16sia la ke’de’ko ullaoi Israel, taungKu, susito misa’ gaun ussamboi padang. Lan attu la sae la Kupake’de’ko ullaoi tondokKu, anna tandaiNa’ mintu’ bangsa, ke Kupamanassai lako kalemu, e Gog, dio pentirona tau iato mai, kumua Akumo tu To maindan.
17Inde sia tu kadanNa Puangta PUANG, Nakua: Tae’raka na iko, tu mangka Kupokada a’gammu dolona nalopian mintu’ taungKu, iamotu mai nabi Israel, tu ma’nubua’ allo iato ke taunoi, kumua la Kupasaeko ullaoi tau iato mai.
18Apa attu iato, ke saei tu Gog ullaoi tondok Israel, kadanNa Puangta PUANG, manassa iatu kare’dekan ara’Ku la ma’pamurru’ lan mai illongKu,
19sia tete dio kapangimburuangKu sia kasengkeangKu, tu dukku-dukku, angKu ma’kada kukua: manassa allo iato la narampoi lino’ kapua tu tondok Israel.
20La ma’parondo dio oloKu tu mai bale lan lu tasik sia manuk-manuk dao lu langi’, olo’-olo’ dio lu padang sia mintu’ olo’-olo’ mendonglo’, tu menono’ dao kuli’na padang sia mintu’ tolino, tu tuo dao kuli’na padang; mintu’ buntu la tuan, mintu’ aa’ mi’lan la umbanasa sia mintu’ rinding tembo’ la ro’pok.
21Attu iato la Kutambai tu pa’dang la ullaoi tau iato dao lu mintu’ buntungKu, kadanNa Puangta PUANG; iatu pa’dangna tau la ullaoi solana.
22Sia la Kuukung Kuparampoi ra’ba biang sia to’doan rara; la Kupauranni uran kamban, uran batu, api sia solo’ tu tau iato sola mintu’ surodadunna sia iatu bangsa buda nasolan.
23La Kupasombo tu Kaleku, kumua pasareongan sia madatu sia umpa’petandan Kaleku lako buda bangsa anna tandai, kumua Akumo tu PUANG.