Dual PanelBilikna to minaa
1Mangkato na solammo’ lako salian, lako tarampak dio salian ma’palurekke, anna baana’ lako mintu’ bilik, tu sitingoan tana lapang sia sitingoan Banua, rampe daanna lu.
2Iatu bendanna unturu’ lambe’na saratu’ siku dio lalan tama rampe daanna lu, na iatu babana limangpulo siku.
3Siupu’ tu duangpulo siku dio mai tarampak lanna lu sia siupu’ tu sali batu tarampak dio salian, den tangdo’ sitingoan tangdo’ tallung kalada’ langngan sitodo’.
4Na dio tingayo bilik iato mai den lalan diola tama, sangpulo siku babana na saratu’ siku lambe’na, iamotu lalan tama ma’palurekke.
5Apa iatu mintu’ bilik daona lu mandu sukku’, belanna iatu tando’ unnala inan losong na iatu dio bilik diongna lu sia iatu dio bilik lan tangnga Banua iato.
6Belanna iatu bendan ma’kalada’ tallung todo’ langngan, natae’ lentongna, susi lentong tarampak; iamoto nadipabitti’ sidi’ tu diongna iring sia lan tangngana, disuka’ randuk dio mai padang.
7Den misa’ tu rinding tembo’ tu dio salian, siayoka bilik iato, ma’palulako tarampak dio salian, siupu’ tu mai bilik limangpulo siku lambe’na.
8Belanna iatu lambe’na tu mai bilik dio tarampak dio salian den limangpulo siku; apa iatu lambe’na tu mai bilik sitingoan inan maindan saratu’ siku.
9Sia diongna lu te bilik iate den lalan tama dio rampe matallo, tu nanii tau tassu’ dio mai tarampak dio salian male lako bilik iato.
10Siupu’ tu baba rinding tembo’ tarampak rampe lo’na lu, siupu’ tana lapang sia siupu’ banua, den duka bilik.
11Dio tingayona den tu lalan, susi rupanna tu bilik rampe daanna lu; pada lambe’na sia pada babana, pada bang tu lalan diolai sun sia iatu atoranna.
12Sia susi lalan tama bilik rampe daanna lu, susi dukato tu lalan tama dio bilik rampe lo’na lu; den ba’ba dio to’randukna lalan, iamotu lalan siupu’ rinding tembo’ sikande bilik iato, dio rampe matallo, ke tamai tau.
13Ma’kadami lako kaleku nakua: Iatu mai bilik daanna lu sia iatu mai bilik lo’na lu, tu siupu’ tana lapang, iamo bilik maindan tu nanii to minaa, tu mareke’ tongan lako PUANG, la ungkande apa tarru’ maindan; la dibaa lako tu apa tarru’ maindan, iamotu pemala’ dikande, tu suru’ pengkalossoran sia suru’ pangakuan sala, belanna iatu inan iato maindan.
14Ianna tamamo inan maindan tu to minaa, tae’mo nama’din sun lan mai lako tarampak dio salian, ke tae’pi nalossokki dolo tu pakeanna, tu napake untoe pentoeanna, belanna apa iato maindan. La nasondai dolo tu pakeanna, namane ma’din urreke’i tu inan nanii to buda.
Lili’ inan maindan
15Iatonna mangka nasangmo ussuka’i tu lanna lu Banua nasolammo’ lako salian unnola babangan, tu ma’palulako matallo, sia massuka’ tiku lao.
16Nasuka’mi tekken pesuka’ tu rampe matallona: limaratu’ tekken pesuka’, ke disuka’i tekken pesuka’ tiku lao.
17Sia na suka’ tu rampe daanna lu: limaratu’ tekken pesuka’, ke disuka’i tekken pesuka’ tiku lao.
18Iatu rampe lo’na lu nasuka’: limaratu’ tekken pesuka’, ke disuka’i tekken pesuka’.
19Tibalikmi lu lako rampe matampu’, anna massuka’: limaratu’ tekken pesuka’, ke disuka’i tekken pesuka’.
20Nasuka’mi siupu’ a’pa’ sulapa’; den tu rinding tembo’ tiku lao, limaratu’ tu lambe’na na limaratu’ tu babana, la ussapa’i tu maindanna na iatu tang maindanna.