Dual PanelPUANG sule tama Banua KabusunganNa
1Mangkato nabaamo’ lako to’ babangan, iamotu babangan, ma’palulako rampe matallo.
2Tonganna denmi sae tu kamala’biranNa Kapenombanna Israel lu dio mai rampe matallo, sia den oni susito ongngo’ uai buda na iate lino naarrangi kamala’biranNa.
3Iatu patiro mendeata kutiro susi bangsiato mangkanna kutiro, tonNa sae la ussanggangi tu tondok iato, sia susito mai patiro mendeata mangka kutiro dio randan salu Kebar. Lumbangmo’ rokko padang.
4Tamami Banua unnola babangan, ma’palulako rampe matallo tu kamala’biranNa PUANG.
5Naangka’mo’ Penaa, anNa Baana’ tama tarampak lanna lu, tonganna iatu kamala’biranNa PUANG umponnoi tu banua.
6Kurangimi tu Puang lan mai Banua Kabusungan ma’kada lako kaleku, tonna bendan tu muane iato dio sa’deku.
7Sia ma’kada tu Puang lako kaleku, Nakua: E ma’rupa tau, iamote tu inan nanii isungan kapayungangKu sia inan pala’ lette’Ku, tu la Kunii torro dio lu to Israel tontong sae lakona; tae’mo nala urruttakki to Israel tu sanga madatungKu, la tau iato mai, la iatu mai datunna napobua’ gau’ salana sia napobua’ batang rabukna datunna tau iato mai’ ke matemi.
8Belanna iatu ampangna napadio sa’de ampangKu sia iatu lentong ba’bana dio sa’de lentong ba’baKu, naurunganni rinding tembo’ mannamo Kusialla’i tau iato mai, iamoto naruttakki tu sanga madatungKu napobua’ apa megallianna, tu napogau’. Iamoto Kupisanni tete dio kasengkeangKu.
9Totemo la napatoyang tau iato mai tu gau’ salana sia batang rabukna datunna dio mai kaleku. Kuurunganni ma’din torro dio lu tau iato mai tontong sae lakona.
10E ma’rupa tau, pokadanni to Israel tu diona te Banua Kabusungan – kumua anna masiri’ tu tau iato mai diona kakadakeanna –, sia nasuka’ tu pandirinna.
11Na ianna masiri’ tu tau iato mai diona tu mintu’ apa napogau’, pokadanni tu a’ganna Banua Kabusungan iate sia atoranna, mintu’ tu lalanna diola tama sia diola sun, mintu’ garaganna, mintu’ pangalukanna, mintu’ a’ganna sia mintu’ sukaran alukna, ammu sura’i dio pentirona tau iato mai, kumua anna karitutui tu atoran a’ganna sia napogau’i tu pangalukanna.
Diona inan pemalaran sia diona kadiraranna
12Inde sia tu sukaran aluk diona te Banua Kabusungan; dao lolok buntu lili’na inan tarru’ maindan. Manassa iamote tu sukaran alukna Banua Kabusungan iato.
13Inde sia tu suka’ inan pemalaran disuka’ siku, iake sangsikuoi dipamanassa sang siku ssangpala’: iatu kalo’na sangsiku mandalanna sangsiku babana, iatu biringna te’dek siupu’ randan salianna tiku lao, sangdangkan langka’na. Inde sia tu parandanganna inan pemalaran iato:
14Randuk diong mai kalo’ diong padang sae lako biring tarangso diongna lu duang siku langka’na na sangsiku babana. Randuk dio mai biring tarangso bitti’na sae lako biring tarangso kapuana patang siku langka’na, na sangsiku babana.
15Iatu dapo’ patang siku langka’na, naranduk diong mai den tu a’pa’ tanduk tarangso langngan.
16Iatu dapo’ sangpulo dua siku lambe’na na sangpulo dua siku tu babana, pada sappa lao tu a’pa’ biringna.
17Iatu biring tarangso sangpulo a’pa’ siku tu lambe’na na sangpulo a’pa’ siku tu babana tiku lao a’pa’ biringna; iatu biringna te’dek tiku lao sangtangnga siku tu babana sia kalo’na sangsiku tu babana tiku lao, na iatu eran inan pemalaran iato ma’palulako rampe matallo.
18Ma’kadami lako kaleku Nakua: E ma’rupa tau, inde sia tu kadanNa Puangta PUANG, Nakua: Inde sia tu apa dipondok diona inan pemalaran: Iato allo, ke upu’mi digaragai la dipemalarammo tu pemala’ ditunu pu’pu dao sia la dipi’pikki rara lako,
19la muben misa’ sapi laki mangura diposuru’ pengkalossoran tu to minaa bati’na Lewi, tu naala bilanganna Zadok, tu mareke’ tongan lako Kaleku la umpengkaolaiNa’, kadanNa Puangta PUANG.
20Sia la muala dio mai rarana, ammu sussui tu tanduk a’pa’ sia tu tetuk a’pa’na biring tarangso sia biring te’dek tiku lao, susimokoto la umpemaseroi sia umpadenanni pengkalossoran.
21Mangkato la muala tu sapi laki diposuru’ pengkalossoran, anna tunu pu’pu’i tau dio inan dipamanassanni dio banua, dio salianna inan maindan.
22Na allo ma’penduanna la mupennoloan tu misa’ bembe’ laki tae’ tattanna diposuru’ pengkalossoran sia la napemaseroi tau tu inan pemalaran, susi mangkamo napemaseroi untunu sapi laki.
23Iake mupaupu’mi tu suru’ pengkalossoran, la mupennoloan tu misa’ sapi laki mangura tae’ tattanna sia misa’ domba laki tu tae’ tattanna dio mai baanan bembe’ sola domba.
24La mupopennolo tu apa iato dio oloNa PUANG sia la naambo’i sia to minaa dao, anna pemalaranni napopemala’ ditunu pu’pu’ lako PUANG.
25Pitung allo situru’-turu’ la munii umpemalaranni simisa’ tu bembe’ laki diposuru’ pengkalossoran; sia la mupemalaran simisa’ sapi laki mangura sia simisa’ domba laki dio mai bembe’ sola domba ma’baanan tu tae’ dua tattanna.
26Pitung allo la dinii umpadenanni pengkalossoran tu inan pemalaran iato sia usseroi, namane dirara.
27Iake napaupu’mi tau tu allo iato, la napemalarammo to minaa, ke allo ma’pengkarua sia undinna dao inan pemalaran tu pemala’ ditunu pu’pu’mi sia pemala’ kasalamarammi, sia la nakalo’komi PenaangKu, kadanNa Puangta PUANG.