Dual PanelKaditaanna padang
1Iake mitaai tu padang iato la mipotaa mana’, la misorong lako PUANG tu padang sangtempe’ maindan la dipopa’duruk; iatu lambe’na duangpulo llima sa’bu siku na iatu babana duangpulo sa’bu siku; la maindan nasang sae lako tu mintu’ naala lili’na tiku lao.
2Iatu iannate la diparandanan inan maindan limaratu’ siku lambe’na limaratu’ siku babana, la pada sappa tiku lao, sia misa’ tana lapang untikui male limangpulo siku.
3La musuka’ dio mai padang mangkamo disuka’ duangpulo sa’bu siku lambe’na sia sangpulo sa’bunna siku babana; inde to lan la nanii inan maindan, iamoto tu la tarru’ maindan.
4Iate padang iate la sangtempe’ padang, tu maindan; iamo la napotaa mintu’ to minaa to, tu mentoe lan inan maindan, tu mengkareke’ la mengkaola lako PUANG: iamo la nanii tau iato ma’nubua’ sia misa’ inan dipamarimbangan lako inan maindan.
5Na duangpulo llima sa’bu siku lambe’na sangpulo sa’bunna siku babana la napotaa to Lewi, tu umposara’ Banua, la napotaa, la napokota nanii torro.
6La mianggean tu la naala lili’ kota limangsa’bu siku babana sia duangpulo llima sa’bu siku lambe’na, sipatu pa’duruk maindan; iamote tu la napotaa mintu’ to Israel.
7Na iatu la napotaa arung, iamotu dio sa’de patomalinna pa’duruk sia lili’na kota, siupu’ pa’duruk maindan sia siupu’ lili’na kota, dio rampe matampu’ ma’palulako matampu’ sia dio rampe matallo ma’palulako matallo sia iatu lambe’na la susi misa’ taa senga’, randuk dio mai lili’ rampe matampu’ sae lako lili’ rampe matallo.
8Iamoto tu lili’na, tu la napotaa dio Israel, naurunganni iatu mai arungKu tae’mo nala umpakario-rioi tu taungKu, sangadinna la napopa’elo’na tu padang iato lako to Israel, situru’ sukunna tau iato mai.
Passanan tengkona arung sia apa la natuntun
9Inde sia tu kadanNa Puangta PUANG, Nakua: Tarru’ budamo to, e mintu’ arung to Israel. Tibemi tu kamasa’garan sia pa’pakario-rio, ammi pogau’i tu salunna sia kamaloloan; lendokanni tu taungKu dio mai pa’pandasammi, kadanNa Puangta PUANG.
10Sipatukomi la untoei tu suka’ malolo, sia epa malolo sia ba’ malolo.
11Iatu epa sola ba’ la dipatontong suka’na, naurunganni suka’na sangba’ taa sangpulona sanghome’ sia sangepa taa sangpulona sanghome’; iatu kadipasipulianna la umpake home’.
12Na iatu misa’ sikele’ duangpulo gera; duang pulo sikele’, duangpulo lima sikele’ na sangpulo lima sikele’ sita’pa namane misa’ mina.
13Inde sia tu pa’kasian la miben arung: sangtaa annanna epa dio mai sanghome’ gandung na sangtaa annanna epa dio mai sanghome’ dalle sisikan.
14Iatu natuntunna dio mai minna’, iatu ba’ dipoinan minna’, iamotu taa sangpulona ba’ ke misa’oi koro – sangpulo ba’ alanna tu misa’ home’, belanna iatu sangpulo ba’ den misa’ home’.
15Iatu natuntunna misa’ domba ba’tu misa’ bembe’ dio mai sangtuntunan, ke duaratu’oi dio mai padang kariuanna Israel, tu buda uainna, la dipokande dipemalaran, sia dipopemala’ ditunu pu’pu’ sia dipopemala’ kasalamaran la umpadenanni pengkalossoran, kadanNa Puangta PUANG.
16Mintu’ tau lan tondok iato la umpennoloan pa’kasuiyan iate lako arung lan Israel.
17Apa iatu passanan tengkona arung la umbaa pemala’ ditunu pu’pu’, kande dipemalaran sia pemala’ pantedok, ke pa’gauran sia ke bulan ba’rui sia allo katorroan, iatu mintu’ allo madatunna to Israel. Sipatu la napennoloan tu suru’ pengkalossoran, iatu kande dipemalaran, iatu pemala’ ditunu pu’pu’ sia iatu pemala’ kasalamaran la umpadenanni pengkalossoran tu mintu’ to Israel.
Diona pa’gauran sia pemala’
18Inde sia tu kadanNa Puangta PUANG, Nakua: Iake bulan bunga’na, allo bunga’na bulan iato, la miala tu misa’ anak sapi laki, tu tae’ tattanna, ammi seroanni tu inan maindan.
19Anna alai to minaa pira tu rara suru’ pengkalossoran, anna palakoanni lentong Banua, sia a’pa’ tetuk biring tarangsona inan pemalaran sia lentong babangan tarampak lanna lu.
20Susi duka la mipogau’ to, ke allo ma’ pempitunnai bulan iato, belanna to tang naangga’i sia tang naissan, anna kasalan; la mipadenan pengkalossoran tu banua iato.
21Iake bulan bunga’na, allo ma’pessangpulo a’pa’na bulan iato, la umpogau’komi Pa’pasa; lan to allo kapua pitung allo la ungkandekomi roti tang dirangii.
22Allo iate iatu arung la umpemalaran misa’ sapi laki belanna kalena sia belanna mintu’ tau lan tondok iato.
23Sia lan to pa’gauran pitung allo la napemalaran kiallo-kiallo lan pitung allo pitu sapi laki sia pitu domba laki, tae’ tattanna dipopemala’ ditunu pu’pu’ lako PUANG sia kiallo-kiallo misa’ bembe’ laki diposuru’ pengkalossoran.
24Sia la napemalaran misa’ epa, ke misa’oi sapi laki sia misa’ epa, ke misa’oi domba laki sia misa’ hin minna’, ke misa’oi epa, la dipapatuan kande dipemalaran.
25Iake bulan ma’pempitui, allo ma’pessangpulo limanna bulan iato, ke pa’gauran, la napemalaran duka susito lan pitung allo, la suru’ pengkalossoran, la pemala’ ditunu pu’pu’, la kande dipemalaran, la minna’.