Dual Panel1Inde sia tu kadanNa Puangta PUANG, Nakua: Iatu babangan tarampak lanna lu, tu ma’palulako rampe matallo, la titutu’ annan alonna, nanii tau mengkarang, apa iake allo katorroan la dibungka’; ia duka ke allo bulan ba’ru la dibungka’.
2Na iatu arung la tama dio mai salian unnola sarambi babangan, anna bendan dio to’ lentong babangan; na iatu mai to minaa la umpemalaranni tu pemala’ ditunu pu’pu’na sia pemala’ kasalamaranna; mangkato tukkumi menomba dio to’ ampang babangan; namane sun lako salian. Tae’ nama’din ditutu’ tu babangan sae lako makaroen.
3Apa iatu tau lan tondok la tukku menomba dio oloNa PUANG dio to’ lalan tama babangan iato, ke allo katorroan sia allo bulan ba’ru.
4Iatu pemala’ ditunu pu’pu’, tu napennoloan arung lako PUANG, ke allo katorroanni, la annan domba tae’ tattanna sia misa’ domba laki tae’ tattanna.
5Na kande dipemalaran misa’ epa, ke misa’oi domba laki sia iatu mai domba dipasola kande dipemalaran pada pakullena sia minna’ misa’ hin ke misa’oi epa.
6Na iake allo bulan ba’rui misa’ anak sapi laki tae’ tattanna, sia annan domba sia misa’ domba laki, tu tae’ nasang tattanna;
7sia la napemalaran tu kande dipemalaran misa’ epa, ke misa’oi sapi laki sia misa’ epa, ke misa’oi domba laki sia dipasisola domba pada pabelanna, sia minna’ misa’ hin, ke misa’oi epa.
8Ianna tama tu arung, iatu babangan la naola tama sarambi sia lalan ia duka bangsiato, tu la naola sun.
9Apa ianna lao mennolo lako oloNa PUANG tu tau lan tondok, ke attu pa’gauran na minda-minda tu tama babangan rampe daanna lu la tukku menomba, la tassu’ lako salian unnola babangan rampe lo’na lu, sia minda-minda tu tama babangan rampe lo’na lu, la tassu’ lako salian unnola babangan rampe daanna lu. Tae’ nama’din la sule unnola babangan iato tu naola tama, sangadinna tassu’ unnolai tu babangan nasitingoanna.
10Na iatu arung la naparitangnga tau iato mai, ke malei tama, sia iake tassu’i tu tau iato mai, la tassu’ duka.
11Sia ia duka ke pa’gauran sia allo madatui, iatu kande dipemalaran la misa’ epa, ke misa’oi sapi laki sia misa’ epa, ke misa’oi domba laki, sia dipasisola domba pada pakullena sia minna’ misa’ hin, ke misa’oi epa.
12Ianna pemalaranni arung tu pemala’ tanning inaa, iamotu pemala’ ditunu pu’pu’ ba’tu pemala’ kasalamaran, iamotu pemala’ tanning inaa, lako PUANG, la dibungkaran babangan ma’palulako rampe matallo tu arung, anna pemalaranni tu pemala’ ditunu pupu’na sia iatu pemala’ kasalamaranna, susitu napogau’, ke allo katorroanni; ianna tassu’mo lako salian, la natutu’ tau tu babangan, ke malemi.
13Sia la mupemalaran lako PUANG kiallo-kiallo tu misa’ domba mane sang taun, tu tae’ tattanna, dipopemala’ ditunu pu’pu’; melambi’oi mupemalaranoi.
14Iatu kande dipemalaran ke melambi’oi la mupasisola taa annanna epa sia minna’ taa tallunna hin, la urrammei ta’pung; iamo kande dipemalaran lako PUANG, – iamo apa dipondok tontong sae lakona.
15Pemalaranni tu domba iato sia iatu kande dipemalaran sia iatu minna’, ke melambi’oi, iamo dipopemala’ ditunu pu’pu’ kiallo-kiallo.
16Inde sia tu kadanNa Puangta PUANG, Nakua: Ianna benni pamengan arung tu mai misa’ anakna, iatu iannato napomana’mo; la napoapamo anakna tu apa iato, napotaa mana’.
17Apa ianna den pamengan dio mai apa mana’na naben misa’ taunna, la napoapa tu apa iato sae lako taun kadirampananna, namane sule lako arung; manassa apa iato mana’na arung, sia la tontong napoapa anakna.
18Apa iatu arung tae’ nama’din unnalai tu taa mana’na to buda belanna napakario-rio, sangadinna mana’na siamo tu la naba’gianni tu mai anakna muane, kumua da naden misa’ taungKu diula’i dio mai mana’na.
19Attu iato nasolammo’ unnola lalan tama, tu dio sa’de babangan lu tama bilik to minaa lan inan maindan, tu ma’palurekke, sia kutiro den inan dio boko’na, ma’palulako matampu’.
20Ma’kadami lako kaleku nakua: Iamote tu inan nanii mintu’ to minaa untollo’ duku’ suru’ pangakuan sala sia duku’ suru’ pengkalossoran, tu nanii tau iato mai unggoreng kande dipemalaran, kumua da namanggi’ umbaai lako salian lako tarampak dio salian, tu la nanii tau iato mai umpamarimbangan to buda.
21Mangkato nasolammo’ lako salian, lako tarampak dio salian, nabaana’ lako a’pa’ tetuk tarampak, angku tiroi ke misa’oi tetuk tarampak den misa’ inan dirinding.
22Dio a’pa’ tetuk tarampak den inan dirinding, iatu lambe’na patangpulo siku na iatu babana tallungpulo siku, iatu inan dio tetuk pada nasang tu suka’na.
23Iatu inan dirinding a’pa’ natikui rinding tembo’ bitti’, nadiongna lu tu rinding tembo’ bitti’ den lalikan tiku lao.
24Ma’kadami lako kaleku Nakua: Iamote tu dapo’, nanii to ma’paraka Banua untollo’ duku’ pemala’ pangrere’na to buda.