Dual Panel1TonganKomi Kamu o PUANG, ke la sikara-karaki’; apa moi susito, moraina’ la sipa’kada Puang diona tu mai apa malambu’, kumua: Ma’apai anna maupa’ tu lalan to tang mekaaluk, sia manaman bang ia tu mintu’ to ma’kedo tang maruru’?
2Mitananmo tu tau iato mai sia mennuaka’mo; lobo’mo sia membuamo. Moi mandappi’Komi dio pudukna tau iato mai, apa mambela dio mai ba’tengna.
3Apa Kamu, o PUANG, untandaina’ sia Mitirona’ sia Misudi tu penaangku, ba’tu ma’patumbai lako Kalemi. Rambai tu tau iato mai susito domba la ditunu sia patorro senga’i anna dipatei, ke allonami.
4Sangapapira tang la katuoan tu padang sia malayu tu mintu’ tananan dio lu padang? Tete dio kakadakeanna mintu’ to untorroi, anna male nasang tu olo’-olo’ sia manuk-manuk, belanna nakua tau iato mai: Tae’ sia natiroi tu ma’katampakanta.
5Iake la unturu’ko to lumingka, nabo’yokki dukako: Naumba la mukua silomba tu mai darang? Lan padang rapa’ tae’ mumanaman, umba la mukua lan lu pangala’ makampunna biring Yordan?
6Belanna moi mintu’ siulu’mu sia mintu’ sangdadianna ambe’mu tang maruru’ lako kalemu, metamba tu tau iato mai dio boko’mu umpekapuai gamaranna; da mupatonganni, ke ma’kada mammi’i lako kalemu.
To Yehuda napakario-rio bangsa nasikandappiran
7Kutampemo tu banuangKu, Kutibe tu mana’Ku; iatu pa’kaboro’na penaangKu Kusorongmo tama limanna ualinna.
8Iatu kedona mana’Ku susito singa lan pangala’ lako Kaleku, naburrungi lenNa’, iamoto angKu kagi’gi’i.
9Iatu mana’Ku susito manuk-manuk pamburi’tik bulunna; iatu mai langkan maega sae umpatama limbui. Malemokomi, rampunni tu mintu’ olo’-olo’ dio lu padang anna sae kumande.
10Buda tu to mangkambi’ ussanggang pa’lak anggoro’Ku sia ullunggenak pa’lakKu, sia umpopempadang aak pa’lak balloKu,
11sia napopempadang lo’bang; makarorrong sia sanggang Kutiro lako, sia sanggang nasangmo tu mintu’ padang; na moi misa’ tau tae’mo umpalan penaai.
12Dao lu mintu’ tanete rangke lan lu padang pangallaran narampoimo to ma’kasanggang, belanna nasabu’imo pa’dangNa PUANG tu padang randuk dio mai randan sangbalinna sae lako randan sangbalinna, naurunganni moi misa’ tau tae’ namanaman.
13Lise’ gandung naambo’ tau, apa duri nasasa’, unta’ka’i kalena, apa tae’ namembura. Iamoto la masiri’komi tu diona bura padangmi, napobua’ kare’dekanNa PUANG.
14Inde sia tu kadanNa PUANG, Nakua: Iatu mintu’ to kadake tu nasikandappiran Yehuda, tu ullaoi mana’ Kukamasean taungKu Israel, la Kusintak lan mai tondokna, sia iatu mintu’ to Yehuda la Kusintak lan mai tangngana tau iato mai.
15Apa iangKu mangka ussintakki tu tau iato mai, la Kukamasei pole’ sia pada la Kubaa sule lako mana’na sia lako padangna.
16Sia iake birisanni tu tau iato mai umpopa’biasa kalena unnola lalanna taungKu, naurunganni umpalao sumpa tete dio sangangKu, kumua: La lelukraka tuoNa PUANG! susi dolona tu tau iato mai unnada’i taungKu umpalao sumpa tete dio Baal, manassa iake susito, la dipasangbilangan duka taungKu.
17Apa iake manokai tu tau iato mai umperangiiNa’, manassa la Kusabu’i sia Kupisanni, kadanna PUANG.