Dual PanelDiona salipi’ lenang buruk
1Inde sia tu kadanNa PUANG lako kaleku, Nakua: Maleko, allianni kalemu tu misa’ salipi’ lenang: posalipi’i, apa da mupakannai uai.
2Unnallimo’ misa’ salipi’, susitu kadanNa PUANG, angku posalipi’i.
3Saemi tu kadanNa PUANG urrampoina’ ma’penduanna, Nakua:
4Alai tu salipi’ mangka mualli tu mupake, ke’de’ko ammu male lako Efrat, ammu bunii dio lan sapak batu.
5Ta’kala malemo’ angku bunii dio Efrat, susitu Napesuan PUANG lako kaleku.
6Iatonna masai allomu lendu’na, saemi kadanNa PUANG lako kaleku, Nakua: Ke’de’ko mumale lako Efrat, ammu alai dio mai tu salipi’ tu Kusuako umbunii dio.
7Ta’kala malemo’ lako Efrat, kutiroi tiku lao, angku alai tu salipi’ iato dio mai inan kunii umbunii, apa burukmo, tae’mo apa la napatu.
8Saemi tu kadanNa PUANG lako kaleku, Nakua:
9Inde sia tu kadanNa PUANG Nakua: La Kupaburuk susi dukato tu kamala’biran kapuana Yehuda sia Yerusalem.
10Iate bangsa kadake iate, tu mengkailing umperangii kadangKu sia iatu lolang unturu’ kamakarrasanna penaanna, naurunganni male mengkaola lako kapenomban senga’ sia tukku menomba lako kalena, la susite salipi’ iate, tu tae’mo apa la napatu.
11Belanna susi salipi’ manda’ lan aakna misa’ muane, susi dukato Kupamanda’mo tu mintu’ to Israel sia to Yehuda lako Kaleku, kadanNa PUANG, kumua anna tau iato mai dadi bangsa, tu Kupokalelean sia Kupomala’bi’ sia Kupobelo, apa tae’ namorai tu tau iato mai ma’perangi.
Diona busso diponnoi uai anggoro’
12Sia pokada dukai te kada iate lako tau iato mai, kumua: Inde sia tu kadanNa PUANG, Kapenombanna to Israel; iatu mintu’ busso la diponnoi uai anggoro’. Iake ma’kadai tu tau iato mai lako kalemu, kumua: Ma’apai angki tang la untandai, kumua iatu mintu busso la diponnoi uai anggoro’?
13La mukua lako tau iato mai, kumua: Inde sia tu kadanNa PUANG, Nakua: Tonganna la Kupatarru’ malango tu mintu’ to lan padang iate, la mintu’ datu tu unnisungi isungan kapayunganna Daud la mintu’ to minaa la mintu’ nabi sia mintu’ to lan Yerusalem.
14Sia Aku la umpasitumbuk simisa’i tu tau iato mai anna sanggang, anna mintu’ ambe’ situmbuk tu mai anakna muane, kadanNa PUANG; tae’ angKu la ungkaturu-turui sia umma’tananni penaa sia ungkamasei, Kutang la ussabu’iri tu tau iato mai.
Pa’pakilala ma’katampakanna
15Perangii sia tananni talinga, da mimadongnga’, belanna PUANG tu ma’kada.
16Pangke’mi tu PUANG, Kapenombammi, ke tae’pi Napadadii tu pi’tuk, ke tae’pi mititodo lako buntu ke kasisalan taui bongi, sia urrannuangkomi masiang, apa iatu iannato Napopendadi lillinan parrak, sia Napopembali kapi’tukan.
17Iake manokapokomi umperangiite, manassa la tumangi’ tu penaangku dio lu inan kabunianna diona kamatampoan, sia la si’dan-si’danna’ tumangi’, sia sitanutuan tu uai matangku, belanna dipali’mo tu pangkambi’Na PUANG.
18Pokadanni datu sia datu baine indo’na datu, kumua: Unno’ko’komi diong inan madionganna, belanna iatu makota mala’bi’mi tobangmo dao mai ulummi.
19Mintu’ kota rampe sau’na titutu’mo, na moi misa’ tau tae’mo umbungka’i; mintu’ to Yehuda dipali’mo sia tae’mo torro, dipali’ nasangmo sia tae’ torro, dipali’ nasangmo sia tae’ bangmo torro.
20Bangunanni tu matammu sia tiroi minda tu sae daa mai ulunna salu! Umbamira tu domba ma’baanan dikamaseangko, iamotu mintu’ domba melo?
21Apara la mupokada, ke Naangkarangko Puang tu misa’ pangulu iamotu tau biasamo musipalakuan pangan? Tang la ramporaka lako kalemu tu saki susito misa’ baine mangurria’?
22Iake ma’kadako lan penaammu mukua: Ma’apai narampoina’ te apa iate? – iamotu belanna kakapuanna kakadakeammu, anna tikalili’ tu biring dodomu sia sombo tu kambutu’mu.
23Ma’dinraka tu misa’ to Etiopia ussondai kuli’na, ba’tu arimau buluh umpopembali bongana? Susi dukamoto umba la mikua umpogau’ melo, tu inang biasamokomi umpogau’ kadake?
24Manassa la Kupatisambo’ tu tau iato mai susi ta’pian, tu napettiaran angin dio mai padang pangallaran.
25Susimoto tu toto’mu sia taamu tu Kusukarangko, kadanNa PUANG, belanna tae’mo mukilalaiNa’ sia kabuttokammo tu muposande’.
26Sia Aku kalena la ungkalili’i tu biring dodomu sae langngan lindomu anna payan tu mupomasiri’na,
27iamotu mintu’ gau’ salamu sia kamoraian malassummu sia passulo bongi mesirisammu. Dao mintu’ tanete lan lu padang Kutiromo tu mintu’ penggauran megalliammu; upu’ allomu, e Yerusalem, sangapapira mumane la masero?