Dual Panel1Iatu kasalanna to Yehuda disura’ peoki’ bassi sia dioki’ pena intan lan papan penaanna sia dio mintu’ tanduk inan pemalaranna,
2iamotu tanda kapengkilalan tu umpasala tau iato mai, sia dio lentong dipodeata diong lu mintu’ garonto’ kayu maluna sia dao bottona mintu’ tanete,
3sia dao lu buntu dio lu padang. Mintu’ barang apammu sia mintu’ iananmu la Kupa’bengan butung pangrampa, tu tang dialli, napobua’ kasalammu lan mintu’ lili’na tondokmu.
4Sia la mulendokan tu limammu dio mai tu mana’ mangkamo Kukamaseangko sia la Kupopengkaunanko lako ualimmu lan misa’ padang tu tae’ mutandai, belanna la tontong dukku tu misa’ api tete dio kare’dekangKu, la umballako.
5Inde sia tu kadanNa PUANG Nakua: Tampakan ropu tu to urrannuan tolino sia tu umpotakia’ duku’ sia untoyangan penaanna dio mai Puang.
6Belanna iatu a’ganna susi kayu anak tae’ daunna lan lu padang aak, tu tae’ nasa’dinganni, ke saei tu melona, apa tuo dio lu inan marangke lan lu padang pangallaran, iamotu padang ma’sin, tu tae’ natorroi tau.
7Maupa’ tu to rannu lako PUANG sia sande’ lako PUANG.
8Belanna la sangtinti ia kayu, ditanan dio to’ randan lalan uai sia tu merroro aka’na lako biring salu, sia tae’ nasa’dinganni ke sarrangi allo sangadinna tontong bang maluna tu daunna; tae’ nasopatianni ke masai tu pealloan lan sangtaun sia tae’ upu’na membua.
9Iatu penaa mandu patangnga’ na iatu mintu’ apa, sia pasanggang; mindara ma’din la untandai?
10Akumo, PUANG, ussandak penaa sia ussudi ba’teng, la umpabala’i simisa’-misa’i tu tau sitinaya kedona sia sitinaya bua penggauranna.
11Susi manuk lampung unnarranni tangia tallo’na, susi dukamoto tu to urrampun tang malolo ianan; lan kamatangnga – taunna manassa la natampe sia iatu kama’tampakanna la susito baga.
12O, isungan kamala’biran tu masuangga tempon dio mai, o inan maindanki,
13sia pa’rannuanna to Israel, o PUANG! iatu mintu’ to untampeKomi la kasirisan; minda-minda tu memboko’ dio mai Kalemi, la disura’ tu sanganna diong padang, belanna natampemo tu kalimbuang boba iamotu PUANG.
14O PUANG, pamatanana’ angku matana; tunduina’ angku makarimman belanna Kamumo tu kapudiangku.
15Ma’kadami tu tau iato mai lako kaleku, nakua: Umbamira tu kadanNa PUANG? Melo ke saemi totemo!
16Apa tae’ kumalaku-laku lako Kalemi kumua nasae tu kamandasan, sia tae’ duka kukamorai tu allo kamandasan: Kamu unnissanni. Iatu apa sun dio pudukku, ombo’ dio oloMi.
17Da Midadi apa metakuran lako kaleku; Kamumo pentirerungangku ke allo kamandasan.
18Nake dipakasiri’i tu mintu’ to urrambaina’, da na aku dipakasiri’; nake dipatirambanni tu tau iato mai, da na aku dipatiramban. Parampoimi allo kamandasan tu tau iato mai, sia poka penduanni.
Umpamadatu allo katorroan
19Ma’kadami PUANG lako kaleku Nakua: Maleko bendan tama babanganna taunna bangsa iato, tu naola tama sia tassu’ mintu’ datu to Yehuda, sia tama mintu’ babangan Yerusalem,
20ammu ma’kada lako tau iato kumua: Perangii tu kadanNa PUANG, e mintu’ datu Yehuda sia mintu’ to Yehuda sia kamu mintu’ to untongkonni Yerusalem, tu tama babangan iate.
21Inde sia tu kadanNa PUANG Nakua: Da mimamaa ke allo katorroan sia da mibaa pamaan tama babangan Yerusalem, ke la ungkaritutuikomi katuoammi.
22Sia da mibaa pamaan tassu’ lan mai banuammi, ke allo katorroan, sia da mikarang moi misa’ duka pengkarangan, sangadinna la mipamadatu tu allo katorroan, susitu Kupepasanan lako nene’ to dolomi.
23Apa manoka tu tau iato mai umperangii sia tae’ natananni talinga, sangadinna umpabattuk penaanna sia ungkanoka pangadaran.
24Apa iake miperangii tonganNa’ kadanNa PUANG, sia tae’ mibaa pamaan tama babangan kota iate, sangadinna mipamadatu tu allo katoroan ammi tang mengkarang allo iate,
25manassa dio mai te babangan kota iate la tama tu mai datu sia arung, tu la unnisung dao isungan kapayunganna Daud, ma’kareta sia ma’darang, la iatu mai datu sia mintu’ arungna la mintu’ to Yehuda sia mintu’ to untongkonni Yerusalem, sia iate kota iate la natorroi tau sae lakona.
26Sia la sae tu tau dio mai mintu’ kota Yehuda sia dio mai mintu’ lili’na Yerusalem sia dio mai padang Benyamin sia dio mai Padang Merrantena sia dio mai Ma’buntunna sia lo’ mai Pollo’na uai, anna umbaa pemala’ ditunu pu’pu’ sia pemala’ pangrere’ sia kande dipemalaran sia dupa sia la umbaa duka pemala’ pa’pudian tama banuanNa PUANG.
27Apa iake manokakomi umperangiiNa’, kumua: la mipamadatu tu allo katorroan sia da mimamaa sia umbaa pamaan tama babangan Yerusalem ke allo katorroan, manassa la umpadukkuNa’ misa’ api lan babanganna, tu la ussappii mintu’ tongkonan layukna Yerusalem sia tang pa’de-pa’deanna.