Dual Panel1Inde sia tu kadanNa PUANG, Nakua: Maleko mualli misa’ bussona pa’tampa kurin, mumane male sola ba’tu pira-pira pekaamberanna bangsa iato sia ba’tu pira-pira pangulunna to minaa.
2Sia tassu’ko ammu male rokko lombok Ben-Hinom tu natingayo babangan Bibang, ammu petambanni inde to dio tu mintu’ kada tu la Kupokada lako kalemu,
3kumua: Perangii tu kadanNa PUANG, e mintu’ datu Yehuda sia mintu’ to lan Yerusalem. Nakua kadanNa PUANGna mintu’ ma’dandan maritik, Kapenombanna to Israel: Manassa Aku la umparampoi kasanggangan te inan iate, naurungan tilanta’ lan talinganna minda-minda tu umperangii.
4Belanna natampeNa’ tu tau iato mai sia napakasarembangan te inan iate, tu nanii untunu pemala’ lako deata tang natandai, la tau iato mai la nene’ to dolona la mintu’ datu to Yehuda; sia napaponnoimo rara to tang kasalan te inan iate.
5Sia nagaragan inan pemalaran tu Baal dao inan madao, tu nanii untunu anakna la napopemala’ ditunu pu’pu’ lako Baal; iamotu apa inang tae’ len Kupepasananni sia inang tae’ len Kupa’peissananni sia inang tae’ len bu’tu lan penaangKu.
6Iamoto, kadanNa PUANG, la sae tu allona, anna tang disangaimo Tofet ba’tu lombok Ben-Hinom, sangadinna lombok Pura tau.
7Dio inan iate la Kunii undampai tu tangnga’na Yehuda sola Yerusalem; sia Aku la ullaoi pa’dang tu tau iato mai anna songka dio tingayona ualinna sia tete dio limanna mintu’ tau undaka’ lalan la umpatei, sia Aku la umbenni manuk-manuk dao lu langi’ sia olo’-olo’ dao kapadanganna tu batang rabukna la napopendurukan.
8Sia kota iate la Kupopendadi apa napotiramban tau sia dadi misa’ apa nabellu’i tau; minda-minda ullendu’i la tiramban sia natelle-telle belanna diona mintu’ kasangganganna.
9La Kupakande dukapa duku’ anakna muane sia anakna baine tu tau iato mai; pada la ungkande duku’na solana lan kapu’duran sia kapussakan, tu nalaoanni ualinna sia napapussakanni to undaka’ lalan la ungka’tu sunga’na.
10Ammu tessei tu busso iato dio tingayona mintu’ to musolan male.
11Sia la mupokada lako tau iato mai, kumua: Nakua kadanNa PUANGna mintu’ ma’dandan maritik: La Kupasusi dukate Kusanggang tu bangsa iate, sia kota iate, susito untesse panggaraga pa’tampa kurin, tu tae’mo nama’din dipemeloi sule, sia la napang lamunni tau tu Tofet, belanna tae’mo inan dinii manglamun.
12La susimo penggaurangKu lako inan iate sia mintu’ to torro lan, ondongpi la Kupasusi Tofet te kota iate, kadanNa PUANG.
13Mintu’ banua dio Yerusalem sia mintu’ tongkonan layukna datu Yehuda la maruttak susi inan dio Tofet, iamotu mintu’ banua dao sotona nanii tau untunu pemala’ lako mintu’ ma’dandan maritik dao langi’ sia umpemalaran pemala’ pantedok lako kapenomban senga’.
14Iatonna sulemo Yeremia, dio mai Tofet, tu nanii PUANG ussuai la ma’nubua’, bendanmi dao tarampak banuanNa PUANG, anna ma’kada lako mintu’ to buda, nakua:
15Inde sia tu kadanNa PUANGna mintu’ ma’dandan maritik, Kapenombanna to Israel, Nakua: La Kupasae tu mintu’ kasanggangan, tu Kupokadamo la urrampoi te kota iate sia mintu’ kotana, belanna umpabattukmo penaanna tu tau iato mai sia manoka umperangii kadangKu.