Dual PanelPangadaranna Yeremia lako to Yehuda kumua nasorong kalena lako Babel
1Iatonna pamulanna kadatuanna Zedekia, anakna Yosia, datu Yehuda saemi te kadanNa PUANG lako Yeremia, Nakua:
2Inde sia tu kadanNa PUANG lako kaleku, Nakua: Garagangko kalemu ba’tu pira-pira ulang sia ayoka, passanni dao sokkongmu,
3ammu pa’peanni datu Edom sia datu Moab sia datu to Amon, sia datu Tirus sia datu Sidon, la naparampo mintu’ sumbungan puduk, tu rampomo lako Yerusalem umpennoloi Zedekia, datu Yehuda;
4sia suai tu tau iato mai umparampoi lako mintu’ puangna, kumua: Inde sia tu kadanNa PUANGna mintu’ ma’dandan maritik, Kapenombanna to Israel, nakua: Susite tu la miparampo lako puangmi:
5Akumo tu mangka umpadadi lino sia mintu’ tolino sia olo’-olo’ dao kuli’na padang tete dio kamatotoran kapuaKu sia takia’ tiangka’Ku, la Kupa’kamasean lako minda-minda tu naala penaangKu.
6Totemo iate mintu’ tondok iate mangkamo Kusorong tama limanna Nebukadnezar, datu Babel, taungKu; moi anna mintu’ angge menono’ dio lu padang mangka dukamo Kupa’kamasean lako, kumua anna pengkaolai.
7Sia mintu’ bangsa la mengkaola lako kalena sia lako anakna sia lako ampona sae lako nalambi’na attunna tu tondok iato la natalo ba’tu pira-pira bangsa matoto’ sia datu kapua.
8Na iatu bangsa ba’tu kadatuan tu manoka umpengkanorongi, iamo Nebukadnezar, datu Babel, sia tu manoka napaayokai datu Babel, tu bangsa iato la Kuparampoi kandean pa’dang sia karorian sia ropu, kadanNa PUANG, Kuurungan ussorong pissanni tama kuasanna.
9Iamoto da miperangii tu mintu’ nabimmi sia to pakita-kitammi sia to mangimpimmi sia to pakita dalle’mi sia to balik matammi, tu ma’kada lako kalemi, kumua tae’ mila tontong mengkanorong lako datu Babel.
10Belanna tau iato mai, ma’nubua’ tang tongan lako kalemi, miurunganni la diali’ mambela dio mai padangmi sia la Kuula’ikomi, ammi sanggang.
11Apa iatu bangsa morai napaayokai datu Babel sia tontong umpengkanorongi, la Kupatontong dio lu padangna, kadanNa PUANG, na iatu tau iato mai la ungkarangi sia la umpa’tondokki tu padang iato.
12Sia lako Zedekia, datu Yehuda mangka dukamo Kupokadan susi bangsia tu kada iato, kumua: Tukku bangkomi napaayokai datu Babel sia tontongkomi umpengkanorongi ammi makarimman.
13Ma’apai ammi la mate nakande pa’dang sia karorian sia ropu, la kamu la iatu mai bangsami, susitu mangka napokada PUANG, diona tu mintu’ bangsa, tu manoka umpengkaolai datu Babel?
14Iamoto da miperangii tu kadanna mintu’ nabi, tu ma’kada lako kalemi, kumua: Tae’ mila tontong umpengkaolai datu Babel, belanna ma’nubua’ tang tongan tu tau iato mai lako kalemi.
15Belanna tae’ Kusuai, kadanNa PUANG, anna ma’nubua’ tu tau iato mai tete dio sangangKu, apa tae’ natongan, angKu urunganni unnula’komi, ammi sanggang la kamu la iatu mai nabi umpa’nubuarangkomi.
16Sia kukuapa lako tu mintu’ to minaa sia lako mintu’ tu to buda, kumua: Nakua kadanNa PUANG: Da miperangii tu kadanna mintu’ nabi tu ma’nubua’ lako kalemi, nakua: Manassa iatu pareanan banuanNa PUANG totemo la dibaamo madoi’ sule dio mai Babel, belanna ma’nubua’ tang tongan tu tau iato mai lako kalemi.
17Da miperangii, sangadinna tontongkomi umpengkanorongi datu Babel, ammi makarimman. Ma’apai te kota iate anna la daun lauan?
18Iake la nabi tonganni tu tau iato mai sia iake sikambi’i kadanNa PUANG, melo ke mengkamoyai lako PUANGna mintu’ ma’dandan maritik, kumua anna iatu mintu’ pareanan tu torropa lan banuanNa PUANG sia lan banuanna datu Yehuda sia dio Yerusalem, damo nadibaa lako Babel.
19Belanna nakua kadanNa PUANGna mintu’ ma’dandan maritik tu diona lentong, tasik, tangdan pembasean sia iatu pareanan torrona, tu torropa lan kota iate,
20tu tae’ nabaai Nebukadnezar, datu Babel, tonna pali’i tu Yekhonya, anakna Yoyakim, datu Yehuda, lako Babel sola mintu’ to kapuana Yehuda sia Yerusalems-
21belanna nakua kadanNa PUANGna mintu’ ma’dandan maritik, Kapenombanna to Israel, tu diona mintu’ pareanan tu torropa lan banuanNa PUANG sia lan banuanna datu Yehuda sia dio Yerusalem, kumua:
22Mintu’na to la dibaa nasang lako Babel sia la torro dio sae lako allo Kunii untiroi, kadanNa PUANG, sia unnalai sia umbaai sule lako inan iate.