Dual PanelTo Israel la dipamakarimman sule
1Inde sia tu kada lu dio mai PUANG lako Yeremia, kumua:
2Nakua kadanNa PUANG, Kapenombanna to Israel: Sura’i tu mintu’ kada, tu mangka Kupokada lako kalemu, lan misa’ sura’.
3Belanna tonganna la sae tu allona, kadanNa PUANG, ke Kupopembalii tu toto’na taungKu Israel sia Yehuda, kadanNa PUANG, sia umpasulei tu tau iato mai tama tondok, tu mangka Kukamasean nene’ to dolona, kumua anna pomana’i.
4Inde sia tu kada Napokada PUANG tu diona Israel sola Yehuda, Nakua:
5Tonganna nakua kadanNa PUANG: Den lallak kamatakuran kirangi, den katirambanan, tangia kamakarimmanan.
6Mekutanakomi sia tiroi, ke la denni anna kianak tu muane, ma’apai kutiroi tu mintu’ muane untemme’ aakna susito baine mangurria’ sia membali tu rupanna susi lindo to mate?
7A’a, lendu’ ia metakuranna tu allo iato, tu tae’ len susinna; iamo misa’ attu kapussakan lako Yakub; apa moi susito, la dirampanan duka.
8Allo iato la dadi, kadanNa PUANGna mintu’ ma’dandan maritik, kumua la Kusanggangi tu ayokana dao mai sokkongna sia Kura’ta’i tu mintu’ peporinna sia tae’mo nala umpokaunanni to sae,
9sangadinna tau iato la umpengkaolai PUANG, Kapenombanna, sia Daud, datunna, tu la Kupabendananni.
10Iamoto da mumataku’, e Yakub taungKu, kadanNa PUANG, da mutiramban, e Israel, belanna tonganna la Kurampanangko lan mai tondok mambela sia mintu’ bati’mu lan mai tondok dinii male umpali’ko; la sulemo tu Yakub anna rapa’ sia torro marampa’, na moi misa’ tau tae’ umpatirambanni.
11Belanna Kurondongko, kadanNa PUANG, angKu rampanangko; belanna la Kusabu’i tarru’ tu mintu’ bangsa, tu Kunii untale’ko, apa iko tae’ Kula ussabu’i tarru’ko, sangadinna la Kupa’dikkiko sitinayanna, moi natae’ Kupopa’elo’nako tang diukung.
12Belanna nakua kadanNa PUANG: Iatu bangkemu la mupomate sia balalamu tae’mo nala mondo.
13Moi misa’ tau tae’ umpa’kadangko; iatu bundang den siapa pedampinna, apa iatu iko tae’mo kamondoammu.
14Tang nakilalaimoko mintu’ muane pa’kaboro’mu, tae’mo napekutanan lenko. Kupakario-rioko susi uali ma’pakario-rio, susito tang mamase ma’pa’dikki, belanna kakapuanna kakadakeammu sia lendu’ budanna kasalammu.
15Ma’apai musumarro diona bangkemu, belanna pa’di’mu la mupomate? Belanna kakapuanna kakadakeammu sia lendu’ budanna kasalammu, iamoto Kupogau’i te iannate lako kalemu.
16Iamoto, mintu’ tu to unnampello’ko, la diampello’ sia mintu’ ualimmu la dirampa, iatu mintu’ to unnala toro apammu la diala toro duka apanna, sia mintu’ to umpangrampaiko la Kupopa’elo’na dipangrampai.
17Belanna Aku la umpamalekeko sia umpamondoi tu bangkemu, kadanNa PUANG, tu belanna nasangaiko tau to ditibe, e Sion, tu moi misa’ tau tae’ umpekutananni.
18Nakua kadanNa PUANG: La Kupopembali tu a’ganna tendana Yakub sia la Kukaturu-turui tu inanna: Iatu kota iato la dibangun sule dao tanete daun lauanna sia iatu tongkonan layuk la bendan dio inanna siamo.
19Lanmo mai la nanii tassu’ pa’pudi-pudian sia gamara to ma’marua’rua’, belanna la Kupopemba’ka’ tu tau iato mai anna tae’ nala sosso’ bilanganna, sia la Kupakala’bi’ anna tae’ nadie’sek.
20Mintu’ anakna muane la susi a’ganna tonna dolona sia iatu kasirampunanna la tontong dio oloKu, sia iatu mintu’ to umpakario-rioi la Kuukung.
21Iatu arungna la bu’tu dio mai tau iato mai, to ma’parenta la bendan dio lu tau iato mai, sia la Kueloran sae lako Kaleku la umperreke’iNa’; belanna mindapara la umpa’petambenan penaanna la umperreke’iNa’?, kadanNa PUANG.
22Attu iato kamu la dadi taungKu na Aku la dadi Kapenombammi.
23Tonganna la tassu’ tu angin bara’Na PUANG, iamotu kare’dekan sia talimpuru’ ma’pamumbuk, tu la ta’pa dao ulunna mintu’ to tang mekaaluk.
24Tae’ nala toyang tu kare’dekanNa PUANG, ke tae’pi nadipalalo sia diparampo randanna tu tanan penaanNa; iake nalambi’mi ma’katampakanna, manassa la mitandai.