Dual PanelKameloan la dipasule lako tondok Yehuda
1Saemi tu kadanNa PUANG ma’penduanna lako Yeremia, tonna dipattangpa lan lu ba’ba pa’kampan:
2Nakua tu kadanNa PUANG tu umpogau’i to sia umpasakka’i tu apa la Napadadi; PUANG iamo sanganNa.
3Meongli’ko lako Kaleku, angKu pebaliiko sia la Kupokadangko tu apa kapua tu tang dipebuyu’, tu tae’ mutandai.
4Belanna nakua kadanNa PUANG, Kapenombanna to Israel, tu diona mintu’ banua lan kota iate sia diona mintu’ tongkonan layukna datu Yehuda, tu dirondon napobua’ benteng sia pa’dang;
5sae tu tau urrarii to Kasdim sia umponnoi batang rabuk tu banua iato, iamotu batang rabukna to Kupatei napobua’ kasengkeangKu sia kare’dekangKu sia bannang dio mintu’ kakadakeanna angKu popentilindung lindoKu dio mai te kota iate.
6Tonganna la Kupasikemun tu bangkena sia la Kupamondo sia la Kupamatana tu tau iato mai sia la ungkamaseanni kamakarimmanan sebo tu tae’ upu’na.
7Sia la Kupopembali tu toto’na Yehuda sia Israel sia la Kupabangun tu tau iato mai susito dolona.
8Sia la Kupemaseroi tu tau iato mai dio mai mintu’ kakadakeanna tu napobannang kasalan lako Kaleku sia umboko’iNa’.
9Attu iato kota iato la dadi misa’ sanga Kupoparannu, sia kadipudian sia kadipangkeran dio lu mintu’ bangsa lan lino, tu la urrangi kareba diona mintu’ kameloan tu Kupogau’ lako tau iato mai; la tiakka’ sia tigega’ penaanna diona mintu’ kameloan sia kasalamaran tu Kupogau’ lako tau iato mai.
10Nakua kadanNa PUANG: Lan inan iate tu mipokada kumua disabu’imo, naurungan moi misa’ tolino ba’tu patuoan tae’mo lan, anna lan mintu’ kota Yehuda sia mintu’ batatta lan lu Yerusalem tu sanggang, moi misa’ tolino ba’tu misa’ patuoan tae’mo lan.
11La dirangi pole’omo tu arrak kaparannuan sia kamaruasan sia gamara to ma’rampanan kapa’ sia gamaranna tu mintu’ tau nakua: Pudimi tu PUANGna mintu’ ma’dandan maritik, belanna masokan tu PUANG, belanna iatu kamasokananNa tang leluk sae lakona! iake umbaai pemala’ pa’pudian tama banuanNa PUANG; belanna la Kupopembali tu toto’na te tondok iate, naurunganni susito dolona, kadanNa PUANG.
12Nakua kadanNa PUANGna mintu’ ma’dandan maritik: Lan inan iate tu sanggangmo, naurungan moi misa’ tolino ba’tu misa’ patuoan tae’mo lan, sia lan lu mintu’ kotana la den pole’mo padang kariuan, la nanii to mangkambi’ umpakande dombana.
13Lan lu mintu’ kota dao ma’buntunna sia lan mintu’ kota dio Padang Merrantena sia lan mintu’ tondok lo’ Pollo’na uai sia dio tana Benyamin sia lili’na Yerusalem sia lan mintu’ kotana Yehuda la lendu’ pole’omo tu mintu’ domba diongna lu limanna to umbilangi, kadanNa PUANG.
14Tonganna la sae tu allona, kadanNa PUANG, ke Kuparampo randannami tu kada melo, tu mangka Kupokada diona to Israel sia diona to Yehuda.
15Allo iato sia attu iato la Kupatuoan Daud tu misa’ Taruk malambu’, tu la umpalalo salunna sia kamaloloan lan lu tondok.
16Allo iato iatu Yehuda la dirampanan na iatu Yerusalem la torro marampa’, anna sangai tau tu tondok iato: PUANG tu kamaloloanta.
17Belanna nakua kadanNa PUANG: Tae’ nala ka’tu len dio mai Daud tu misa’ tau tu la unnisung dao isungan kapayunganna to Israel;
18sia dio mai tu mintu’ to minaa to Lewi tae’ len nala ka’tu tau dio oloKu umpemalaran pemala’ ditunu pu’pu’ sia untunu kande dipemalaran sia umpennoloan pemala’ pangrere’ lan mintu’ allo.
19Saemi tu kadanNa PUANG lako Yeremia, Nakua:
20Inde sia tu kadanNa PUANG Nakua: Iake mibelai umpokai tu basseKu diona allo sia bongi, naurunganni tae’mo allo sia bongi ke attunnai,
21mane dukari dipoka to tu basseKu sola taungKu Daud, naurungan tae’mo anakna muane tu la dadi datu dao isungan kapayunganna, sia sola tu mai to Lewi, iamotu mintu’ to minaa, taungKu.
22Susitu mintu’ ma’dandan maritik dao langi’ tang dikemba’ bilanganna sia karangan dio biring tasik tang tisuka’, susi dukamoto la Kupopemba’ka’ tu bati’na Daud, taungKu, sia mintu’ to Lewi, tu mengkaola lako Kaleku.
23Saemi kadanNa PUANG lako Yeremia, Nakua:
24Tae’raka mupalan penaai tu apa napokada bangsa iate, nakua: Iatu da’dua pa’rapuan tu mangka Napilei langsa’ PUANG, Natibemo, Nasayu tu taungKu, nasanga butung to tangiamo misa’ bangsa.
25Nakua kadanNa PUANG: Iake tae’i Kutanan basseKu diona allo sia bongi sia iake tae’i Kupondok atoranna langi’ sia lino,
26mane dukari la Kutibe tu bati’na Yakub sia bati’na Daud, taungKu, Kuurungan tang unnalai dio mai bati’na tu tau la umparenta tarukna Abraham, Ishak na Yakub, belanna la Kupopembali tu toto’na tau iato mai sia la Kukaturu-turui.