Dual PanelMa’penduanna Zedekia ungkomba-kombai tau lako Yeremia
1Iatu Zedekia, anakna Yosia, tu naangKa’ Nebukadnezar, datu Babel, undatui tondok Yehuda, ma’parenta ussonda Konya, anakna Yoyakim.
2Sia tae’ naperangii, la ia la mintu’ to mase’ponna la mintu’ to lan tondok iato tu kadanNa PUANG, tu Napokada nalopian nabi Yeremia.
3Attu iato nasua datu Zedekia, tu Yukhal anakna Selemya, sia to minaa Zefanya, anakna Maaseya, lako nabi Yeremia, nakua: Passambayangkan lako PUANG, Kapenombanta.
4Attu iato iatu Yeremia lu tama lu lanpa mai dio lu to buda, tae’pa naditarungku.
5Iatu surodadunna Firaun tassu’mo lan mai Mesir; iatonna rangimi to Kasdim tu umpatama limbu Yerusalem, tu kareba iato ke’de’mi dio mai Yerusalem.
6Attu iato saemi kadanNa PUANG lako nabi Yeremia, Nakua:
7Inde sia tu kadanNa PUANG, Kapenombanna to Israel, Nakua: La mikua ma’kada lako datu Yehuda, tu ussuakomi la mekutana lako Kaleku: Tonganna iatu surodadunna Firaun, tu tassu’mo la untunduikomi, la sule lako tondokna, lako tondok Mesir.
8Sia la sule tu mintu’ to Kasdim la ullaoi te kota iate sia la untaloi sia umpurai naballa.
9Nakua kadanNa PUANG: Da mipakena kalena penaammi umpokadai te kada iate: Manassa iatu to Kasdim sorong boko’mo dio mai kaleki, belanna inang tae’ nasorong boko’.
10Belanna iake moronganna mipatei nasangi tu mintu’ surodadu to Kasdim, tu misirarian, naurungan torromira ba’tu pira-pira tau, tu mandalan bangkena, manassa ia duka tu tau iato la pada bangun lan tendana anna pura ussumpunni te kota iate.
Yeremia ditarungku
11Iatonna ke’de’mo surodadu to Kasdim dio mai Yerusalem belanna surodadunna Firaun,
12la natampemi Yeremia tu Yerusalem, la male lako tana Benyamin la untarima taa mana’ dio tingayona to buda.
13Apa iatonna rampomo lako babangan Benyamin, denni misa’ kamandang to ma’kampa, disanga Yeria, anakna Selemya, anakna Hananya, untingkanni tu nabi Yeremia, nakua: Umbai la menta’pakomi lako to Kasdim!
14Moi nakua Yeremia: Tae’ natongan to, tae’ kula menta’pa lako to Kasdim, tae’ duka naperangii Yeria, sangadinna natingkan anna popennoloi lako mintu’ arung.
15Re’dekmi ara’na tu mintu’ arung lako Yeremia, anna bambai, sia napatamai pa’tarungkuan, tu lan banuanna Yonatan, pangulu to massura’, belanna iatu banua iato nagaraga pa’tarungkuammo.
16Susimoto tu Yeremia tama pa’tarungkuan diong padang, lan misa’ bilik, anna torro masai tu Yeremia inde to lan.
Bunga’na Zedekia umpopetambai Yeremia
17Nasuami datu Zedekia tu tau lao unnalai, anna kutanai bunii datu lan tongkonan layukna, nakua: Denraka kada dio mai PUANG? Mebalimi tu Yeremia nakua: Den; sia nakuapa: La disorongkomi tama limanna datu Babel.
18Sia nakuapa Yeremia lako datu Zedekia: Apara kasalangku lako kalemi, ba’tu lako tu mai to mase’ponmi, ba’tu lako bangsa iate, ammi tarungkura’?
19Totemo umba siamira tu mintu’ nabimmi, tu ma’nubua’ lako kalemi, kumua: Tae’ nala ullaoikomi datu Babel sia iate tondok iate?
20Iamoto perangiina’, o puangku datu, ke ma’dinni kupennoloanni tu palakungku lako puangku datu, damo dikka’ kudipasule lako banuanna Yonatan, to massura’, da angku mate dio.
21Napa’peparentammi datu Zedekia, anna pattangi tu Yeremia lan tarampak pa’kampan sia naben tau roti simisa’ sangallo dio mai kampong To manggaraga roti, sae lako puranna tu mintu’ roti lan kota. Anna torro tu Yeremia lan tarampak pa’kampan.