Dual PanelYeremia dipembuangan rokko bubun
1Narangimi Sefaca, anakna Matan sia Gedalya, anakna Pasyhur sia Yukhal, anakna Selemya sia Pasyhur, anakna Malkia, tu mintu’ kada napokada Yeremia lako to buda kumua:
2Nakua kadanNa PUANG: Minda-minda tu torro lan kota iate la mate, nakande pa’dang, ba’tu karorian, ba’tu ra’ba biang, apa minda-minda tu tassu’ male lako to Kasdim, la tuo sia iatu pangrampana iamo deatanna sia la tontong tuo.
3Nakua kadanNa PUANG: Manassa la disorong te kota iate tama limanna surodadunna datu Babel, tu la untaloi.
4Mebalimi tu mintu’ arung lako datu, nakua: Nake dipatei te tau iate, belanna iake susito naparaang tu penaanna mintu’ surodadu, tu torropa lan kota iate sia mintu’ to buda, ke napokadai lako tau iato mai tu kada susito, belanna iate tau iate tae’ nadaka’i tu kameloanna to buda, sangadinna napokadakena.
5Nakuami datu Zedekia: Tiromi, lan sia limammi, belanna aku, datu, tang kubela undampakomi.
6Naalami tau iato mai tu Yeremia, naparokkoi bubunna arung Malkia, tu dio tarampak pa’kampan, narorro’i ulang rokko. Lan bubun iato tae’ uai, sangadinna pullan manna; lammakmi tu Yeremia rokko pullan.
7Apa iatonna rangimi Ebed-Melekh, misa’ to Etiopia, to mase’ponna datu, tu lan tongkonan layukna datu, kumua narorro’mo tau iato mai tu Yeremia rokko bubun-attu iato unno’ko’ tu datu lan babangan Benyamin –,
8tassu’mi tu Ebed-Melekh lan mai tongkonan layukna datu, anna ma’kada nakua:
9O puangku datu, iatu mintu’ tau iato mai kadakemo gau’na lan mintu’na apa nagauran nabi Yeremia, belanna naparokkomo bubun; manassa inang la mate kalena dio inan iato, napobua’ katangdiaran, belanna tae’mo roti lan kota iate.
10Nasuami datu tu Ebed-Melekh, to Etiopia nakua: Alako tallu tau indete, ammu riu’i tu nabi Yeremia diong mai bubun, da namate.
11Nasolammi Ebed-Melekh tu tau iato mai male sola, anna tama tongkonan layukna datu, tama inan tu diongna lu pa’palumpunan, anna alai inde to dio mai tu ba’tu pirang-pirang serek pakean malusa sia buruk, anna rorro’i ulang rokko Yeremia diong bubun.
12Nakuami Ebed-Melekh, to Etiopia, lako Yeremia: Panglapikanni kalepakmi te serek pakean malusa sia te pakean buruk, namane ulang diongna lu. Napogau’mi Yeremia susito.
13Nariu’mi ulang tau iato mai tu Yeremia diong mai bubun. Anna torro tu Yeremia dio tarampak pa’kampan.
Ma’penduanna Zedekia umpopetambai Yeremia
14Nasuami datu Zedekia tu tau ussolan nabi Yeremia lako to’ ba’ba ma’pentallunna dio banuanNa PUANG, nama’kada tu datu lako Yeremia, nakua: La umpekutananna’ misa’ apa lako kalemi, moi misa’ da mibunianna’.
15Mebalimi Yeremia lako Zedekia nakua: Iake kupokadai lako kalemi, tae’ siaraka mila umpateina’? Sia iake kupakilalakomi, ammi tang umpasiolai.
16Membunimi tu datu Zedekia, umpalao sumpa lako Yeremia, nakua: La lelukraka tuoNa PUANG, tu mangka ungkombong penaanta, inang tae’ kula umpateikomi ba’tu ussorongkomi tama limanna tu to undaka’ lalan la umpateikomi.
17Nakuami Yeremia lako Zedekia: Inde sia tu kadanNa PUANG, Kapenombanna mintu’ ma’dandan maritik, iamotu Kapenombanna to Israel, kumua: Iake penaammu kalena male ussorong kalemu lako arungna datu Babel, manassa la tontongko mana’pa sia tae’ nala disumpun api te kota iate, sangadinna la tuo mana’pako sola sangdadiammu.
18Apa iake tae’i mumale ussorong kalemu lako arungna datu Babel, manassa kota iate la disorong tama limanna to Kasdim, tu la ussumpunni api sia iko kalena tae’ mula tilendok dio mai limanna.
19Nakuami Zedekia lako Yeremia: Mataku’na lako mintu’ to Yehuda, tu menta’pamo lako to Kasdim, nasorongna’ manii lako tau iato mai, anna telle-tellena’.
20Nakuami Yeremia: Tae’ nala umpogau’i tau iato mai lako kalemi, sangadinna la mituru’ tu kadanNa PUANG, tu kuparampo lako kalemi, na iake susito, la salama’komi sia tuo mana’pakomi.
21Apa iake tang mipasiolai tassu’ na kada iate mangkamo Napaombo’ PUANG lako kaleku:
22Tiromi, iatu mintu’ baine, tu tinampe lan tongkonan layukna datu Yehuda, la male disolan lako arungna datu Babel, anna ma’kada nakua: Mangkamoko naada’ sala sia napa’budai to musisangmanean; napopennosokmo tu lette’mu rokko pullan, anna sorong boko’ tu tau iato mai dio mai kalemu.
23Susimoto tu mintu’ bainemi sia anakmi la male nasolan tau lako to Kasdim sia kamu duka tae’ mila tilendok lan mai limanna, sangadinna la naalakomi datu Babel na kota iate la disumpun.
24Nakuami Zedekia lako Yeremia: Moi misa’ tau da naissanni te mintu’ kada iate, da mimate dipatei.
25Iake narangii mintu’ arung, kumua kusipa’kadangkomi, anna male lako kalemi, nakuangkomi kumua: Pokadangkanni tu apa mangka mipokada lako datu, da mibuniangkan, da angki pateikomi, sia apara nakuangkomi datu?
26La mipokadan tau iato mai, kumua: Umpennoloanna’ palakungku lako olona datu, da namesua datu ussolanna’ sule lako banuanna Yonatan, da angku mate dio.
27Iatonna saemo tu mintu’ arung lako Yeremia sia ungkutanai, nabalimi tu tau iato mai susitu mintu’ kada napa’pepasanan datu lako; iamoto napopa’elo’nami torro, belanna tae’ nakaissanan len tu iannato.
28Torromi tu Yeremia dio tarampak pa’kampan sae lako allo ditalona tu Yerusalem sia torro dukapa dio tonna ditalo tu Yerusalem.