Dual Panel1Apa iatonna bulan ma’pempitu, saemi tu Ismael, anakna Netanya, anakna Elisama, misa’ bati’ datu, iamo misa’ pa’baraninna datu sola tau sangpulo lako Gedalya, anakna Ahikam, dio Mizpa, anna ma’talimbungan kumande dio Mizpa.
2Ke’de’mi tu Ismael, anakna Netanya sia iatu to sangpulo nasolan, anna ba’tai pa’dang tu Gedalya, anakna Ahikam, anakna Safan. Susimo kanapateianna to, tu to mangka naangka’ datu Babel umparentai tu tondok iato.
3Sia napatei duka Ismael tu mintu’ to Yehuda nasolan, iamotu nasolan Gedalya dio Mizpa, sia iatu mintu’ surodadu to Kasdim, tu torro dio.
4Iatonna masiangmo tonna mangka dipatei tu Gedalya, moi misa’ tau tae’pa unnissanni,
5saemi dio mai Sikhem sia Silo sia Samaria karua pulona tu to diku’ku’i danggo’na sia serek-serek pakeanna sia ditori’-tori’ kuli’na sia umbaa kande la dipemalaran sia dupa lako banuanNa PUANG.
6Tassu’mi tu Ismael, anakna Netanya, dio mai Mizpa umpentammui tu tau iato mai situang tangi’na. Iatonna sitammumo nakua lako tau iato mai: Maikomi tamale lako Gedalya, anakna Ahikam.
7Iatonna tamamo tangnga kota, napateimi Ismael, anakna Netanya, sola tau nasolan tu tau iato mai, anna pembuanganni rokko bubun.
8Apa dio lu tau iato mai den sangpulo tu tau ma’kada lako Ismael, nakua: Da mipateikan, belanna dio kaleki den ba’tu pira-pira pangnanna dibuni dio lu padang, iamotu gandung sia dalle sisikan sia minna’ sia tani’ enoan. Iamoto napopa’elo’nai tu tau iato mai, tae’ napatei sola mintu’ solana.
9Iatu bubun nanii Ismael umpembuanganni tu mintu’ batang rabukna tau napatei, misa’ bubun kapua, iamotu nabo’bok datu Asa, belanna ungkataku’ Baesa, datu to Israel; bubun iamoto naponnoi Ismael, anakna Netanya, to dipatei.
10Na mintu’ tu to torropa dio Mizpa, male narampa Ismael sola tu mintu’ anakna baine datu sia iatu mintu’ to torropa dio Mizpa, tu mangka nasorong Nebuzaradan, pangulunna to ma’kampa lako Gedalya, anakna Ahikam, la umparentai; iatu tau iato male nasang narampa Ismael, anakna Netanya anna male malengka’ lako to Amon.
11Apa iatonna rangimi Yohanan, anakna Kareah sia mintu’ pa’barani nasolan tu diona mintu’ kakadakean napogau’ Ismael, anakna Netanya,
12narampunmi tu mintu’ surodadunna, anna male urrarii Ismael, anakna Netanya, anna lambiranni sikandappi’ limbong kapua dio Gibeon.
13Iatonna tiromi mintu’ to nasolan Ismael tu Yohanan, anakna Kareah sia mintu’ pa’baranni nasolan parannumi penaanna tu tau iato mai.
14Sia iatu mintu’ to buda narampa Ismael dio Mizpa, tibalikmo anna sule lako Yohanan, anakna Kareah.
15Apa iatu Ismael, anakna Netanya, mallai lussu’ sola tau karua dio mai tingayona Yohanan, anna male lako to Amon.
Kamallaianna Yohanan sola to Yehuda lako Mesir
16Attu iato naalami Yohanan, anakna Kareah, sia mintu’ pa’barani nasolan tu to buda torronapa, tu narampa Ismael, anakna Netanya, dio mai Mizpa, tonna mangkamo umpatei Gedalya, anakna Ahikam, iamotu mintu’ muane, surodadu, baine, pia sia mintu’ to masse’ponna datu, tu napasule dio mai Gibeon.
17Ke’de’mi tu tau iato mai, anna torro ba’tu pirang-pirang allo dio Gerut-Kimham, tu sikandappi’ Betlehem, la male tarru’ lako Mesir,
18tu diona to Kasdim, belanna mataku’ tu to Yehuda lako tau iato mai, saba’ napateimo Ismael, anakna Ahikam, tu naangka’ datu Babel umparentai tu tondok iato.