Dual PanelNubua’ diona to Amon
1Diona to Amon. Nakua kadanNa PUANG: Tae’raka anakna tu to Israel, tae’raka to ma’mana’na? Ma’apai anna alai Milkom tu Gad la napomana’ sia iatu mintu’ taunna male umpa’tondokki kotana Gad?
2Iamoto, tonganna la sae tu allona, kadanNa PUANG, la Kuparangian Raba to Amon tu arrak kasirarian, sia la mempadang lo’bang, nanii ma’toppo’-toppo’ batu tuan sia iatu lili’na la diballa api; sia iatu to Israel la unnalai sia umpomana’i tu tau iato mai, tu mangka umpomana’ tondokna Gad, kadanNa PUANG.
3Unnurrukko, e Hesbon, belanna sanggangmoko sia daun lauammoko; tumangi’komi, e anak dara Raba; ma’potedibolongkomi, sia umbatingkomi, sia sumayokomi lan alla’na rinding tembo’ pa’lak, belanna la dipali’ tu Milkom sola mintu’ to minaanna sia arungna.
4Ma’apai ammu sattuanni tu lombokmu? Iatu lombokmu nasapamo uai, e pia baine matampo, tu urrannuan iananna sia ma’kada nakua: Mindara la ullaoina’.
5Tonganna la Kuparampoiko kamagiangan dio mai mintu’ inan tiku lao, kadanNa PUANG, PUANGna mintu’ ma’dandan maritik, sia ammi dipatisambo’ simisa’-misa’ male, anna moi misa’ tau tae’mo la urrampunni tu to salambasalao.
6Namangka to Kumane umpopembali toto’na tu to Amon, kadanNa PUANG.
Nubua’ diona Edom
7Diona Edom. Nakua kadaNa PUANGna mintu’ ma’dandan maritik: Tae’moraka kapaissanan lan T’eman? Lanna’moraka tu pa’tangngaranna to unnampui tangnga’ kinaa sia pa’demoraka kapaissananna tu tau iato mai?
8Memboko’komi mallai sia mentirerungkomi lan lu inan mandalan, e to untorroi Dedan, belanna Kuparampoimo kasangganganna siamo tu Esau, iamotu attu Kunii unnukungi.
9Iake saei lako kalemu tu to mebua anggoro’ tae’raka nala untampei pira? Ba’tu iatu to boko ke bongi, tae’raka na ia manna naala tu silasanna lako kalena?
10Apa la Kukalokoi tu Esau sia mintu’ tu inan membuninna Kupaombo’mo; iake la morai umbuni kalena, tae’ nakullei. Iatu mintu’ tarukna sia mintu’ bati’na la disabu’i sia moi misa’ sangbanuanna tae’ untundui, kumua:
11La kukaritutui tu mintu’ anak biungmu sia melo ke rannu lakoi kaleku tu mintu’ baine balummu.
12Belanna nakua kadanNa PUANG: Iatu tau tu tang sipatu la unniru’i tu apa lan irusan, manassa la nairu’ duka; ma’apaoi ammu la lappa’? Inang tae’ mula lappa’, sangadinna la muiru’.
13Belanna mangkaMo’ umpalao sumpa tete dio Kaleku, kadanNa PUANG, kumua iatu Bozra la mendadi apa metakuran sia kaditattan sia megiangan sia tampakan ropu sia iatu mintu’ tondokna la daun lauan tontong sae lakona.
14Denmo kareba kurangi dio mai PUANG sia misa’ sumbungan puduk disua ullelei tu bangsa iato, nakua: Sirampunkomi ammi laoi tu Edom sia ke’de’komi parari!
15Belanna tonganna la Kupabitti’ko dio lu mintu’ bangsa sia matuna dio mintu’ tolino.
16Iatu apa metakurammu sia kamatampoammu umpakenamoko. E to untorroi lo’ko’ buntu batu sia la’ka’ lako botto tanete, moi unggaragako serangmu pada langka’ serang langkan maega, la Kutua’ dukako inde to dao mai, kadanNa PUANG.
17Susi dukamoto tu Edom la dadi apa megiangan; minda-minda tu ullendu’i la magiang sia natelle diona mintu’ kasangganganna.
18Susitu Sodom sola Gomora mangka diro’pok sola mintu’ lili’na, kadanNa PUANG, susi dukato moi misa’ tau tae’mo la torro dio sia moi misa’ ma’rupa tau tae’mo la mempue dio.
19Tonganna susi misa’ singa sun lan mai pangala’-ala’ makampunna Yarden, susi dukamoto tu uali ullaoi tu inan matoto’, belanna lan sangpekkappidian matari Kuula’imi tu tau iato mai inde to lan mai. Sia mindara tu dipilei tu Kuangka’ la umparentai? Belanna mindara tu padangKu sia mindara untuntun lalan poissanangKu, sia pangkambi’ umbara tu ungkullei bendan dio oloKu?
20Iamoto perangiimi tu panglampakNa PUANG, tu mangka Napamanassa la naposanggang Edom, sia tanan penaanNa, tu mangka Nara’ta’ la ullaoi tu to untorroi Téman: Manassa nariu’ pia to mangkambi’ domba tu tau iato mai, sia iatu padangna la magiang diona tau iato mai.
21Iate lino tigega’ napobua’ oni katibambanganna sia iatu urrukna dirangi sae lako tasik Teberau.
22Tonganna kendek sia mettia’ sae susi langkan maega sia umballa’ pani’na daona lu Bozra, sia allo iato iatu penaanna mintu’ to lalongna Edom la susi penaanna misa’ baine manguria’.
Nubua’ diona Damsyik
23Diona Damsyik. Kasirisammo tu Hamat sola Arpad, belanna urrangimo kareba kadake; tigianggiangmo penaanna tu tau iato mai susi tasik mariak sia masussa tu penaanna na tae’mo narapa’ len.
24Bonnong penaanna tu Damsyik, memboko’mo la male mallai, narampoi katirambanan, narua kapussakan sia kamaparrisan, susito baine manguria’.
25Lendu’ ia makarorrongna tu kota kalelean, iamo inan kasendean!
26Iatu mintu’ to manguranna la tibambang mate dio lu mintu’ pasa’na sia mintu’ surodadunna la disanggang allo iato, kadanNa PUANGna mintu’ ma’dandan maritik.
27La Kupadukku tu misa’ api rampe tamanna rinding tembo’ Damsyik, tu la unnimbakan mintu’ tongkonan layukna Benhadad.
Nubua’ diona to Arab
28Inde sia tu diona Kedar sia diona kadatuanna Hazor, tu natalo Nebukadnezar, datu Babel. Nakua kadanNa PUANG: Ke’de’komi ammi male ullaoi Kedar sia sanggangi tu mintu’ suku dio rampe matallo!
29Da’ito anna dirampa tu mintu’ tendana sia mintu’ dombana; iatu sampin tendana sia mintu’ pareananna sia mintu’ untana da’ito namale tau urrampai sia napeolian tau lako kumua: Den kamaramban tiku lao.
30Ma’dondo-dondokomi mallai, mentirerungkomi lan lu inan mandalan, e to untorroi Hazor, kadanNa PUANG, belanna nara’ta’mo Nebukadnezar, datu Babel, lan penaanna tu misa’ tangnga’ la ullaoikomi sia umpana’ta’mo misa’ pa’timbangan.
31Ke’de’komi ammi male ullaoi misa’ bangsa manaman, tu torro mana’pa, kadanNa PUANG, tu tae’ ba’bana ba’tu salli’ tendana, tu torro misa.
32Da’ito natiramban mintu’ tu untana sia la diala tu mintu’ patuoanna; sia la kupatisambo’-sambo’ male tu mintu’ tau iato mai lako mintu’ kabu’tuan angin, iamotu to disoppo kurin, sia dio mai mintu’ randan langi’ la Kupasae tu kasanggangan la urrampoi tau iato mai, kadanNa PUANG.
33Iatu Hazor la napoinan serigala sia la mendadi misa’ padang lo’bang sae lakona; na moi misa’ tau tae’ untiroi sia tae’ ma’rupa tau la mempue dio.
Nubua’ diona Elam
34Inde sia tu kada sae lako nabi Yeremia, iamotu kadanNa PUANG diona Elam tonna pamulanna kadatuanna Zedekia, datu Yehuda.
35Nakua kadanNa PUANGna mintu’ ma’dandan maritik: Tonganna la Kule’to tu panana Elam, tu oto’na kamatotoranna.
36Sia la Kuparampoi a’pa’ matanna angin dio mai a’pa’ tetukna langi’ tu Elam sia la Kupatisambo’-sambo’ tu tau iato mai lako mintu’ kabu’tuan angin, naurungan moi misa’ bangsa, tae’ tu tang nanii rampo to Elam dirambai lako.
37La kupatiramban tu penaanna Elam dio tingayona ualinna sia dio tingayona tu tau undaka’ lalan la ungka’tu sunga’na sia la Kuparampoi kamandasan, iamotu kare’dekanna ara’Ku, kadanna PUANG, sia la Kupaula’i pa’dang, sae lako Kusabu’ina.
38Sia Kupaunnisung tu isungan KapayungangKu dio Elam sia Kuroto’i inde to dio tu datu sia mintu’ arung, kadanNa PUANG.
39Apa allo ma’katampakanna la Kupopembali tu toto’na Elam, kadanNa PUANG.