Dual Panel1Inde sia tu kadanNa PUANG, Nakua: Manassa la Kuparampoi penaa pa’kasanggang tu Babel sia tau untorroi Indo’na to umbali-baliNa’.
2Sia la Kusua lako Babel tu ba’tu pira-pira to manta’pi la unta’pii sia iatu tondokna la napalino’ sia nabalittua’, belanna la natalimbung tama tau iato mai, ke allo kamandasan.
3Iatu to ma’pana la nabinting tu panana sia la ma’bayu kararran; iatu to manguranna da’mikatirinnai sia sabu’i tu mintu’ surodadunna,
4anna iatu mintu’ to dipatei situlambenan dio lu padang to Kasdim sia sisumpandanan tu to dirok dio lu batattana.
5Belanna iatu to Israel sia to Yehuda tae’ anNa patorro to balui Kapenombanna, PUANGna mintu’ ma’dandan maritik, moi nakabu’i kakadakean tu tondokna umbali-bali Tomaserona to Israel.
6Mallaikomi lan mai Babel, pantan la umpallaiangkomi katuoammi; da misanggang, ke naukungi Puang tu kakadakeanna, belanna attu iamote tu pa’bala’Na PUANG, la Nanii umbenni poleanna sitinaya penggauranna.
7Iatu Babel susi misa’ irusan bulaan lan limanNa PUANG, tu umpamalango mintu’ issinna lino; mintu’ bangsa unniru’mo uai anggoro’ lan mai, naurunganni bomboan nasang.
8Ta’kala tibambangmi sia ro’pok tu Babel, batingimi! Alanni gommo’ pedampi tu sakinna, napomondo sia manii.
9Mangkamo tadampi tu Babel, apa tang dampi-dampianna; tatampemi anta pantan sule lako tondokta; belanna landa’mo langngan langi’ sia sumpumo langngan massaleu’na tu ukunganna.
10PUANG umpasomboi tu katongananta; maikomi talao umpa’peissananni tu penggauranNa PUANG, Kapenombanta lako Sion.
11Asami tu tinaran, toemi tu balulang! PUANGmo umpatiakka’i tu penaanna mintu’ datu Media, belanna lanmo penaanNa Puang la ullaoi sia ussanggangi tu Babel; belanna iamote tu pa’bala’Na PUANG, iamotu pa’bala’Na diona banua kabusunganNa.
12Pabendanmi tu bandera la ullaoi tambakukunna Babel, pebudai tu to ma’kampa, pannii to ma’kampa dio lu tu mintu’ inan, pannii dukai to mangodo’; belanna PUANG la umparampo randannai tu tanan penaanNa, iamotu apa mangka Napokada diona to lan tondok Babel.
13E iko tu unno’ko’ dio to’ uai luang sia ma’ianan buda, nalambi’mo lampakmu sia nadete’mo sumpu suka’mu.
14Iatu PUANGna mintu’ ma’dandan maritik mangkamo umpalao sumpa tete dio Kalena, Nakua: Moi angKu pasitutu’iko tau susi batik budanna, manassa la naarrak-arrakkiko tau.
15Iamo PUANG tu mangka umpadadi lino tete dio kamatotoranNa sia tu umpatepu lipu daenan tete dio kakinaanNa sia umballa’ langi’ tete dio tanga’ kakinaanNa.
16Iake Napatassu’i kadanNa, mongo’ tu uai dao langi’ sia umpakendek salebu’ dio mai randan langi’; la umpadadii tu kila’ naturu’ uran, sia umpatassu’ angin lan mai pa’palumpunanNa.
17Attu iato iatu mintu’ tolino baga sia tang paissanmo; natodingmo siri’ tu mintu’ pande bulaan diona rapang-rapang dipodeata, belanna iatu mintu’ pa’pati’no’na tae’ natongan, sia tae’ penaa lan.
18Mintu’nato tae’ gai’na sia misa’ panggaraga pa’popetaa; iake narampoi ukungan, sabu’mi.
19Apa tae’ nasusito tu taana Yakub; Iamo To kumombongna sanda mairi’ sia Israel tu Garonto’ mana’Na; iamo digente’ PUANGna mintu’ ma’dandan maritik.
20Ikomo tu pepa’tongKu sia pa’buno kapararian; na ikomora angKu nisak-nisakki tu ba’tu pira-pira bangsa sia Kusabu’i tu batu pira-pira kadatuan.
21Sia ikomora angKu sanggang-sanggangi tu darang sia to ussakei, sia ikomora angKu nisak-nisakki tu kareta sia to untonangi.
22Sia ikomora angKu sanggang-sanggangi la muane la baine sia ikomora angKu sanggang-sanggangi la to matua la to mangura, sia ikomora angKu sanggang-sanggangi la pia muane lolle’ la anak dara.
23Sia ikomora angKu sanggang-sanggangi tu to manglaa sola domba ma’baanan na ikomora angKu sanggang-sanggangi tu to ma’pa’lak sola sapinna sangayoka sia ikomora angKu sanggang-sanggangi tu ba’tu pira-pira to maraa sia to ma’parenta.
24Apa la Kupabala’imo tu Babel sia mintu’ to untorroi Kasdim dio tingayomi belanna mintu’ kakadakean napogau’ lako Sion, kadanNa PUANG.
25Tonganna, la Kuukungko, e buntu, ma’kasanggang, tu ussanggang mintu’ lino, kadanNa PUANG, sia la Kuangka’ tu limangKu unta’paiko sia ullolinko dao mai buntu batu, angKu padadiko buntu pura nalalle api.
26Na moi misa’ batu tae’mo diala dio mai kalemu la dipobatu petau ba’tu la dipobatu parandangan, belanna la mempadang lo’bangko sae lakona, kadanNa PUANG.
27Pabendanni tu bandera lan lino, pannonii tu napiri tanduk dio lu mintu’ bangsa! Tambai tu mai bangsa anna pamarimbangan kalena la ullaoi tu kota iato, sia arakki tu mintu’ kadatuan ullaoi, iamotu Ararat, Mini sia Askenas! Angka’i tu misa’ pangulu la urrarii; pesuammi sae tu ba’tu pira-pira darang susito batik ma’uyun!
28Tambai tu mai bangsa anna pamarimbangan kalena la ullaoi, iamotu mintu’ datu to Media sia mintu’ to marayanna sia mintu’ to ma’parentana, sia mintu’ to nalili’ parentana.
29Attu iato iatu lino ma’parondo sia ma’paganggang, belanna Napalanda’mo PUANG tu tanan penaanNa la ussanggang Babel sia la umpopempadang lo’bangi tu tondok Babel, na moi misa’ tau tae’mo torro lan.
30Iatu mintu’ pa’baraninna Babel natorroimo parari, sia unno’ko’ tu tau iato mai lan tu tambakuku; tae’mo tu kabaranianna, susimoto baine. Iatu banuanna tappumo diballa sia iatu salli’ ba’bana puramo disanggang-sanggang.
31Iatu to disua ma’dondo-dondo pada sitammu to disua sia to umbaa kareba pada sitammu duka la umparampoi lako datu Babel, kumua di talomo tu kotana tiku lao;
32sia dialamo tu inan kalambanan, sia diballamo tu bentengna, sia mintu’ to parari narampoi kamatakuran.
33Belanna inde sia tu kadanNa PUANGna mintu’ ma’dandan maritik, Kapenombanna to Israel, kumua: Iatu anak dara Babel butung to inan panglulluran, ke attunnamo dilullu’-lullu’; sattu’mora narampomo tu attu pegandungan.
34Napepuraimo’ nakande Nebukadnezar, datu Babel, sia nasanggangna’ napatorrona’ susi kandean lo’bang; naampello’na’ susito a’ganna ula’ naga; napa’pediaran saponnona tambukna tu mai kande mammi’ku namane untumpuna’.
35Belanna kanapa’dikkiangku sia kanata’takangku, iamoto anna dipabala’i tu Babel, la nakua to tu tau lan Sion, sia belanna kadibolloanna raraku, anna dipabala’i tu mintu’ pa’tondokan Kasdim, la nakua to tu to Yerusalem.
36Iamoto kadanNa PUANG Nakua: Tonganna Akumo la umbendanni tu kara-karamu sia la Kupembalarangko, sia la Kupamarangke tu tasikna sia la Kupabe’ko’ tu kalimbuangna.
37Iatu Babel la daun lauan sia napoinan serigala sia dadimo misa’ apa megiangan sia ditelle, sia tae’mo natorroi tau.
38Iatu tau iato mai pada umburrung susito singa mangura sia sumau susito anak singa.
39Iake sirarrangammi tu tau mangiru’ la Kuparandanan pa’maruasan mangiru’ angKu pemalangoi, anna limpu tobang tu tau iato mai, naurungan tarru’ leppeng sae lakona sia tang pandiu len, kadanNa PUANG.
40La Kusolan rokko tu tau iato mai susi anak domba la ditunu, ten domba laki sia bembe’ laki.
41A’a, umba nakua naditalomo tu Sesakh sia dirampamo tu kapudianna mintu’ lino! A’a, umba nakua tu Babel anna mebangngoan ara’mo dio lu mintu’ bangsa!
42Iatu Babel nakabu’mo tasik, sia nasamboimo bombang tikalulun-lulunna.
43Mintu’ kotana mempadang lo’bangmo sia mempadang rangkemo sia mempadang aakmo, iamotu padang tang natorroimo moi misa’ tau sia moi misa’ ma’rupa tau tae’mo lendu’ lako.
44Sia la Kuukung tu Bel dio Babel sia iatu apa mangkamo naampello’ la Kupatassu’ pole lan mai sadangna, sia tae’mo nala ussirampunni mintu’ bangsa; ondongpi ro’pokmo tu rinding tembo’ Babel.
45E mintu’ taungKu, tassu’komi lan mai, ammi pantan umpallaian katuoammi dio mai kare’dekanNa PUANG.
46Da namoro’ tu penaammi ammi mataku’ tu diona kareba dirangi lan tondok, belanna den misa’ kareba la rorak lan sangtaun, na undinna pole’o den misa’ kareba senga’ lan taun ia dukato; sia la den pa’pakario-rio lan tondok iato, anna iatu mai pangulu pada siea pangulu.
47Iamoto manassa la sae tu allona, ke Kuukungmi tu mintu’ rapang-rapang dipodeata dipa’na Babel, anna mintu’ padangna la kasirisan sia iatu mai tau dipatei la tibambang lan lu tanga-tangana.
48Attu iato iatu langi’ sola lino sia mintu’ issinna la unnarrak-arrakki Babel, belanna saemo lu daa mai tu pa’kasanggang lako kalena, kadanNa PUANG.
49Susi Babel napobannang anna mintu’ issinna lino tibambang dipongko, la susi dukato tu Babel la tibambang napobua’ mintu’ to dipatei dio Israel.
50E kamu tu tilendok dio mai kandean pa’dang tarru’ liukomi male, da mitorro len; la mikilalai tu PUANG dio mai inan mambela sia Yerusalem, la mipalan bang penaammi.
51Masiri’mokan, belanna kirangimo tu pelo’bona tau; nakabu’mokan siri’ belanna iatu to sae tamamo inan maindanna banuanNa PUANG.
52Iamoto manassa la sae tu allona, kadanNa PUANG, ke Kupabala’imi tu mintu’ rapang-rapang dipodeata dipa’na sia la sumarro tu mai to diba’ta lan lu tondokna.
53Moronganna nala sumpu langngan langi’ tu Babel sia moi anna palayuk lamba’i tu tambakukunna, la narampoi duka pa’kasanggang dio mai Kaleku, kadanNa PUANG.
54Den urruk dirangi dio mai Babel sia kamarukkan kapua dirangi dio mai tondok to Kasdim.
55Belanna Nasanggang PUANG tu Babel sia Napa’dei kamarambanna; iatu bombangna tau iato mai tikalulun-lulun susi tasik kapua sia mongngo’ bang dirangi.
56Belanna iatu pa’kasanggang sae ullaoi Babel sia iatu mai pa’baraninna dirampa sia le’to tu mintu’ panana, belanna iatu PUANG, Puang Matua ma’pabala’, manassa la ma’pabala’i.
57Sia la Kupamalango tu mai arungna sia to matarru’na sia to marayanna sia to ma’parentana sia pa’baraninna, naurunganni tarru’ leppeng sae lakona sia tang pandiu len, kadanNa Datu, tu digente’ PUANGna mintu’ ma’dandan maritik.
58Inde sia tu kadanna PUANGna mintu’ ma’dandan maritik, kumua: Iatu tambakuku makambanna Babel la disanggang anna sirante padang, sia iatu babangan malangka’na la disumpun, naurungan bo’yok punala bang tu mintu’ bangsa sia mara’tak tu mai to sangpetayanan ungkarangi tu apa la nakande api.
59Iamote tu apa napa’pepasanan nabi Yeremia lako Seraya, anakna Neria, anakna Mahseya, tonna male lako Babel sola Zedekia, datunna Yehuda, tonna taun ma’penna’pa’na kadatuanna; iamotu Seraya pangulu sandan uainna datu.
60Nasura’mi Yeremia lan misa’ sura’ tu mintu’ kasanggangan la urrampoi Babel, iamotu mintu’ kada disura’ diona Babel.
61Ma’kadami Yeremia lako Seraya nakua: Iammu rampomo lako Babel, pengkilalai, ammu basai tu mintu’ kada iate.
62Sia la ma’kadako mukua: O PUANG, ma’kadaKomi diona kota iate, kumua la Misabu’i, naurungan moi misa’ tau tae’mo torro lan, la tolino, la olo’-olo’, sangadinna la mempadang lo’bang sae lakona.
63Iake tappumi mubasan te sura’ iate, la mupasipori misa’ batu, ammu tibei tama tangngana salu Efrat.
64Sia la mukua: Susimote tu Babel la tallan anna tae’mo nala kendek sule napobua’ kasanggangan Kuparampoanni. Padamo te tu kadanna Yeremia.