Dual PanelYerusalem narampoi parri’ anna dirampanan
1Upu’ allona Pantunuan pemalaran, Pantunuan pemalaran, tu tondok nanii Daud ma’banua!; pasita’papi sangtaun tu sangtaun, da’ito anna runduananni tu gau’ allo kapuana.
2Apa la Kupakapu’duran tu Pantunuan pemalaran; attu iato iatu tau la sumarro sia unnurruk sia iatu Yerusalem la Kupopantunuan pemalaran.
3Sia la saeNa’ umpatama limbuiko sia la umpalilingiko to manglio’ sia la untananna’ tambakuku unneako.
4Attu iato la sumuko diong mai posi’ tana lambe’ sia tang masero tu kadammu dirangi diong mai litak; sia susi gamara bombo to mate ditambai, tu gamarammu diong mai padang sia iatu kadammu ma’kisi’-kisi’ diong mai litak.
5Apa attu iato iatu uali budammu la susi barra’-barra’ sia la susi ta’pian sisarombonan tu mintu’nato umpandasako, iatu iannate ta’pa la dadi lan sangkappidian mata.
6Iatu PUANGna mintu’ ma’dandan maritik la sae untunduiko guntu’ sia lino’ sia galugu kapua sia talimpuru’ sia bara’ na api ma’kande pu’pu’.
7Attu iato iatu mintu’ bangsa tu urrarii Pantunuan pemalaran la sangtinti to tindo sia patiro mamma’, iamo mintu’ to ullaoi sia ullaoi tambakukunna sia iatu mai to umpandasai.
8La susito topo ma’tindo kumande, apa iake pana’dingi tangdia’ bangsia ba’tu susito ma’rang ma’tindo mangiru’, apa iake pana’dingi inang longgo’ sia ma’rang bangsia; susi dukamoto tu mintu’ bangsa nasirarian Sion.
Diona to Yehuda buta penaa
9Da’ito naalakomi pali sia simangnga, dai’to natitutu’ tu matammi sia maraun, iatu tau iato mai malango, apa tangia anggoro’ nairu’; re’ba len, apa tangia tuak palango nairu’.
10Belanna Naparampoimokomi penaa mamma’ kalupi-lupian PUANG sia Naparappak tu matammi, – iamotu mai nabimmi – sia Nabungku’ tu ulummi, – iamotu mai to patanda-tandammi.
11Iamoto anna mintu’ tu apa dipasombo, la sangtinti kada lan sura’ dica’ lako kalemi, tu diben to manarang ma’basa nakua: Basaika ade’ te, apa mebali nakua: Tang kubela, belanna iate sura’ manda’ tica’.
12Ba’tu iatu sura’ iato diben to tang naissan ma’basa nakua: Basaika ade’ te, apa mebali nakua: Tang kuissan aku ma’basa.
13Sia susipate tu kadanNa Puang, nakua: Iate bangsa iate dio bangri pudukna umpengkareke’iNa’ sia dio bangri lilana umpakala’bi’Na’, apa iatu penaanna mambela dio mai Kaleku; iatu a’ganna ungkasiri’Na’, pepasan tolino bangri.
14Iamoto angKu la umpalanda’i lako bangsa iate mai tu apa kalle-kallean, apa memangngan sia makalaen-laen, belanna iatu kakinaanna tu mai to kinaanna la pa’de, sia iatu tangnga’ kinaanna tu mai to unnampui tangnga’ kinaa la merrabunan.
15Upu’ allona tu to ullammakanni PUANG tu lalan tangnga’na sia iatu mai to naluang kamalillinan tu gau’na sia iatu to ma’kada kumua: Mindara la untiroki’ sia mindara la unnissanki’?
16E kamu to leko’ penaammu! la dipapadaraka to ma’tampa kurin tu pitti’, naurunganni iatu panggaraga la umpokadai tu diona to unggaragai, kumua: Tae’ na ia unggaragana’? sia iatu apa dikombong la umpokadai tu diona to ungkombongi kumua: Tae’ namanarang?
Lendu’ kamandasan, bu’tu kamanamanan
17Tang sangattu’moraka anna dipopembali pa’lak ballo tu Libanon sia iatu pa’lak ballo totemo la dibilang pangala’ tamman attu iato?
18Attu iato iatu to taru la urrangi kadanna Sura’, sia mata to buta tang malillin sia tang pittukmo, la patiro.
19Attu iato to umpamadiong penaanna la saumpoparannu-rannunna PUANG sia iatu to tarru’ bongko la kumalassi-lasi tu diona To maserona to Israel.
20Belanna attu iato iatu to kelok la pa’demo sia iatu to pabe’se la roto’mo sia mintu’ to untannun bang kakadakean la disabu’imo.
21Iamotu to umpasala tau diona sangbuku kada, sia iatu to untananni poya to untuntun salunna dio to’ babangan sia to lando pa’du untampun pusa’ kadanna to malambu’.
22Iamoto iatu PUANG tu mangka urrampanan Abraham ma’kada lako bati’na Yakub kumua: Iatu Yakub tae’mo nala kasirisan sia pa’de deata.
23Belanna ianna tiromi sia bati’na tu penggaurangKu dio lu tau iato mai, manassa la napamadatu tu sangangKu sia napamadatu tu To maserona Yakub sia napangke’ tu Kapenombanna to Israel.
24Attu iato iatu to pusa penaanna la paissan sia mintu’ to ma’paropo’ la untarima pangadaran.