Dual PanelTae’ na Mesir tu la untundui to Israel, sangadinna PUANG
1Upu’ allona tu mintu’ to male rokko Mesir la umpalaku pa’tunduan, tu umposande’ darang sia urrannuan kareta, belanna buda, sia pakkanarang, belanna seba’ bilanganna, apa tae’ namengkamoya lako To maserona to Israel sia tae’ namekutana lako PUANG.
2Apa Ia duka tu Puang sundun kinaa, Iamo la umpasaei tu kasanggangan undinna sia tae’ Napere len; sangadinna la bendan unnea mintu’ to lan banuanna to umpogau’ kakadakean, sia unnea pa’tunduanna to umpogau’ kakelokan.
3Apa iatu to Mesir tolino duka, tangia Puang Matua, sia mintu’ darangna ma’a’gan duku’, tangia penaa; iake unnangka’i limanNa tu PUANG, titongko’ tu to patunduan anna songka tu to ditundui, anna sanggang sola nasangi.
4Inde sia tu kadanNa PUANG lako kaleku, nakua: Susito misa’ singa ba’tu anak singa umburrungi pealanna, moi anna pomarambai sangtuntunan pangkambi’, tae’ duka natiramban sia tae’ napomataku’i tu kamarambanna tau iato mai –, susi dukamoto tu PUANGna mintu’ ma’dandan maritik la mengkalao rokko buntu Sion sia tanetena la parari.
5Susi manuk-manuk mettia’, susi dukamoto tu PUANGna mintu’ ma’dandan maritik la umpetayanni Yerusalem, Narampanan sia Nakarimmanni, Nalendokan sia Nakaritutui.
6Mengkatoba’komi lako Kalena, tu mambela lalanmo nanii to Israel sorong boko’.
7Manassa allo iato pada la miboko’i tu rapang-rapang salaka dipodeata sia bulaan, tu migaragai la umpogau’ kasalan.
8Iatu Asyur la tibambang nakande pa’dang, tangia penai muane, sia la nakande tangia penai tolino, sia la mallai duka lussu’ dio mai penai iato sia mintu’ to manguranna la mengkanorong dipokaunan.
9Sia diona kamatakuran narondon tu buntu batunna sia mintu’ arung untampe bate-batena situang katirambanan; kadanNa PUANG, tu ma’api dio Sion sia ma’dapo’ dio Yerusalem.