Dual PanelKamaparrisanna sia kadirampananna Yerusalem
1Upu’ allomu, e pa’kasanggang, tu tang disanggang; e to tang maruru’ tu tang diballean len; iake upu’moko ma’kasanggang, iko kalenamo la disanggang; iake upu’moko umpogau’ tang maruru’, iko kalenamo la diballean.
2O PUANG, karimmannikanni, apa Kamuri kirannuan; dadimoKomi takia’ bassingki, ke melambi’oi, ondongpi kasalamarangki lan attu kapussakan.
3Belanna ongngo’ galugu, mallaimi tu to sangpetayanan; iake bendanKomi, sisarak-sarakmi tu mintu’ bangsa.
4Sia attu iato la napula’ikomi tau tu pangrampami, susi nango ussabu’i bura padang sia susi batik mangrapai, susi dukato la narapai tau.
5Layuk tu PUANG, belanna iatu isunganNa dao inan madao. Naponnoi katonganan sia kamaloloan tu Sion.
6Tang leluk tu attummu, iamotu misa’ kaseboan kapua dio mai ma’rupa-rupa kasalamaran sia kakinaan sia kapaissanan; kapengkaolan lako PUANG iamo iananna tau iato mai.
7Iato mai sumbung puduk unnurruk-urruk dio lu lalan, sia iato mai to dikomba-kombai umpengkamoyan kasikaeloan si’dan-si’dan tumangi’.
8Mintu’ batatta ditampemo, moi misa’ to lumio’ tae’mo unnolai tu lalan iato. Napokamo tu basse, tae’mo nadampangi tu kota, moi misa’ tolino tae’mo nakasayangi.
9Maru’gun sia talo tu padang iato; iatu Libanon masiri’ sia malayu; iatu Saron susimo padang aak na Basan sia Karmel tae’mo namendaun.
10Totemo la bendanMo’, kadanNa PUANG: totemo la tunannangMo’, totemo la tumananMo’.
11Untambukmokomi dalame, undadiammokomi ongkan; penaammi kalena iamo api tu ungkande pu’pu’komi.
12Iatu mintu’ bangsa dilallang susi kapu’, diballai api susi garonto’ duri dibela’i.
13Perangiimi, e kamu mintu’ mambelanna, tu apa mangka Kupogau’; sia kamu tu mintu’ mandappi’na, issanni tu kuasangKu.
14Tirambanmo tu mintu’ to umparri-parri kasalan dio Sion; narampoimo katigegaran tu mintu’ to tang mekaaluk anna ma’kada nakua: Mindariki’ tu ma’din unno’ko’ sikandappi’ kamapannangan masae lako?
15To umparri-parri kamaloloan sia umpokada apa tongan; tu untumpu saro bu’tu kadake tu lu dio mai pa’pakario-rio; tu tang tikarang limanna untarima pa’pappe’, tu untampun talinganna da narangii tu tangnga’ la papatean sia untutu’ matanna, da natiro apa kadake.
16Iatu tau iato torro dao inan malangka’; benteng dao buntu batu iamo tambakukunna; iatu kandena dipadenammo sia uai nairu’ inang sakka’mo.
17La natiro matammu tu Datu situang kamala’biranNa sia la natiro undinna tu misa’ padang mandu kalua’.
18Totemo ma’tangnga’ko lan penaammu tu diona apa metakuran dolona, kumua: umbami tu to massura’, umbami tu to ma’timbang, umbami tu to umbilang mintu’ menara?
19Tae’mo mula untiro lenni tu bangsa masa’ga’ iato, misa’ bangsa tang dipeamu’, tang dipeori’ tu basana, sia ma’basa susito nga’ngu’, anna moi misa’ tau tae’ umpebuyu’i.
20Tiromi tu Sion, iamotu kota passamayanta. La natiro matammu tu Yerusalem, misa’ inan marampa’, misa’ tenda tu tang dipalele len, tu tang tidu’duk len pantokna, sia tang tiko’ka’ len tu ulangna.
21Ondongpi inde to dio kamala’biranNa PUANG tu la urrondongki’. Iamotu inan nanii salu sia minanga kalua’; moi misa’ lopi dibosean tae’mo unnolai sia misa’ kappala’ tae’mo massombaran dio.
22Belanna PUANG tu To ma’paolainta salu, PUANG, tu To umbenki’ parenta, PUANG tu Datunta, sia Ia dukamo tu ungkaritutuiki’.
23Mintu’ ulangmu tikkondo’mo, tae’mo napabantangi tu lentongna sia tae’mo naballa’i tu somba’na. Attu iato untaa-taa pangrampa sebo, moi to kupi’ urrampun duka pangrampa.
24Moi misa’ pa’tondokan tae’mo tu la ma’kada, kumua: Masakina’, belanna mintu’ to torro lan dipa’deimo tu kasalanna.