Dual PanelDiona kasalamaran tu la naappa’ to Nalendokan PUANG
1Iatu padang aak sia padang talo la sende paiman sia padang pangallaran la sikumalasi-lasian sia la membunga susi danga-danga busa.
2La loboran sia membunga sia sikumalasi-lasian, la sikumalasi-lasian tongan sia siarrakan. Na mintu’ kamala’biranna Libanon dikamaseammi sola kameloanna Karmel sia Saron; tau iato mai la untiro kamala’biranNa PUANG sia kamaballoanNa kapenombangki.
3Pamatoto’i tu lima langga’ sia pabatta’i tu guntu’ ma’parondo.
4Pokadanni tu to magiang penaanna kumua: Pabatta’i tu penaammi, da mimataku’! Manassa iatu Kapenombammi la sae ma’papakkanni, la sae umbaa pa’pabala’Na Puang Matua; la sae anNa rampanangkomi.
5Attu iato to buta la dipapakita sia to taru la dipaparangi.
6Attu iato to kupi’ la mekkondong susi donga sia lila to mamang la kumalasi-lasi, ke tikula’dakki tu uai dio padang aak sia salu dio padang pangallaran.
7Attu iato padang bungin malallang la membali limbong sia padang ba’ta’ la membali kalimbuang; na dio inan nanii serigala la natuoi riu sola tille sia tuyu.
8Sia inde to la den misa’ batatta marante, tu digente’ lalan maindan; moi misa’ to maruttak tae’ unnolai; sangadinna tau ia manna to mai umpolalanni, sia tang nalomban to lumio’ sia to baga.
9Iatu singa tae’ nala dio sia olo’-olo’ masuru tae’ nala rampo inde to lako; olo’-olo’ iato tang la ditiro dio. Apa iatu mai to mangkamo dilendokan la umpolalanni;
10mintu’ to Nala’bak PUANG la sule sia la kumalasi-lasi sae lako Sion; sia kaparannuan masae lako la napomakota dao ulunna; tau iato mai la unnappa’ kasendean sia kaparannuan, apa mintu’ kamasussan sia kasumarroan la mallai.