Dual PanelDiona kamasakianna sia kamatananna Hizkia
1Allo iato masanna’mi sakinna tu Hizkia, la mate mannamo; saemi nabi Yesaya, anakna Amos mennolo lako datu, anna ma’kada nakua: Inde sia tu kadanNa PUANG Nakua: Mepasanmoko lako mintu’ to lan tongkonan layukmu, belanna la matemoko sia tae’mo mula tuo.
2Messailemi tu Hizkia lako to’ rinding namassambayang lako PUANG.
3Nakua: O PUANG, la Mikilalai kumua umba kukua lolang maruru’ dio oloMi sia lantuk penaangku sia kupogau’ tu apa melo dio pentiroMi. Pakalan si’dan-si’danmi tumangi’ tu Hizkia.
4Saemi tu kadanNa PUANG lako Yesaya, nakua:
5Maleko, pokadanni Hizkia, kumua: Inde sia tu kadanNa PUANG, Kapenombanna nene’ to dolomu Daud: Kurangimo tu passambayangmu sia Kutiromo tu mintu’ uai matammu; tonganna la Kurangngannipa tu umuru’mu sangpulo lima taunna.
6Sia aku la ullendokangko dio mai kuasanna datu Asyur, susi dukato tu kota iate sia la urrinding pala’i te kota iate.
7Iamote tu la dadi tanda lako kalemu dio mai PUANG la umpogau’i tu apa mangka Napokada, nakua:
8Iatu bayo-bayo mata allo, tu solo’mo dio eranna Ahas, la Kukondoran sule sangpulo pellesean. Kendekmi sule tu mata allo sangpulo pellesean diong mai tu naninna solo’.
Nanian pa’kurre sumanga’na Hizkia
9Iamote tu sura’na Hizkia, datu Yehuda, tonna mangka masaki anna maleke.
10Kukua: Mane tauna’ angku la lumingkamo lako babangan lino tomate, iatu apa torro dio mai mintu’ katuoangku la sisayuranna’.
11Kukua: Tae’mo kula untiro PUANG iamotu PUANG lan tondok to tuo, tae’mo kula untiro tolino sia torro sisola issinna lino.
12Iatu pa’bongiangku dirondonmo sia dilendokammo dio mai kaleku susito tenda to mangkambi’; ullulunmo’ katuoangku butung to ma’tannun: Nara’ta’mo’ Puang dio mai tandaan. Misa’bianganmo’ allo bongi.
13Sae lako melambi’na kunii undaka’i tu kamanamanan. Susito singa tu Puang ulle’to mintu’ bukungku. Misa’bianganmo’ allo bongi.
14Susi kaluppini’ ma’kisi’-kisi’, susi dukamoto tu gamarangku. Mamali’na’ mentingara lu langngan, o PUANG; mataku’na’, Kamu la unnindo’ina.
15Apara la kupokada, apa ma’kadamo tu Puang lako kaleku sia mangkamo Napogau’ tu iannato? La kupela’-pela’ lumingka lan tu taun kadadiangkupa, belanna kamapa’diranna penaangku.
16O Puang, tete dio te mintu’na apa iate natuo tu tolino sia lan mintu’na te nanii tuo deatangku, kumua Puang umpamalekena’ sia umpatuona’.
17Iatu kamaparrisan kapuaku membalimo kasalamarangku. Puangmo tu ullendokanna’ dio mai patuang lambe’ nanii kaburukan, belanna mintu’ kasalangku Mitibemo lako boko’Mi.
18Belanna iatu lino to mate tae’ napudi-pudiKomi sia iatu kamatean tae’ napakala’bi’Komi; minda-minda tu rokkomo lamunan tae’ narannuanni tu kamarurusamMi.
19Sangadinna iatu to tuo, tu to tuo umpudi-pudiKomi, susite aku umpudiKomi totemo; iatu mai ambe’ la umpokadai tu kamarurusamMi lako mintu’ anakna.
20Tumayamo tu PUANG la untunduina’, iamoto la undedekki’ katapi lan mintu’ allo katuoanta lan banuanNa PUANG.
21Iatu Yesaya mangkamo ma’kada, nakua: La naala tau tu bua ara nagaragai petamba’ sia napalako bundang iato, anna mondo.
22Iatu Hizkia mangkamo ma’kada, nakua: Apara la dadi tandana, kumua la kendekna’ langngan banuanNa PUANG?