Dual PanelMA’PENDUANNA SURA’ YESAYA (PASALA’ 40-66) ;KASALAMARANNA BANGSA LAN PA’PALIRAN (PASALA’ 40–48) ;La sae tu kadilendokanna Sion
1Pakatanai, pakatanai tu taungKu, kadanNa Kapenombammi.
2Ma’kadakomi la umpamanamanni tu penaanna to lan Yerusalem, pemandui meoli lako kalena, kumua upu’mo tu mintu’ kamasarasanna sia tila’bakmo tu mintu’ salana; naappa’mo penduan manglokkon dio mai limanNa PUANG belanna mintu’ kasalanna.
3Perangii, den gamaranna tau metamba-tamba, nakua: Pasakka’mi tu lalanNa PUANG lanlu padang pangallaran, ranteanni batatta dio padang talo tu Kapenombanta.
4Mintu’ lombok la dibumbun sia mintu’ buntu sia buttu-buttu la dirantei sia iatu mai batu ma’pongko’-pongko’ la mempadang marante.
5Iatu kamala’biranNa PUANG la dipaombo’ sia mintu’ tolino pada la untiroi, belanna sunmo dio pudukNa PUANG.
6Perangii, den tu gamara nakua: Metambako. Mebalimi, nakua: Apara la kupetamban? – Mintu’ to lino susi bangri to riu sia mintu’ kamala’biranna butung to bunga dio lu padang.
7Iatu riu malayu sia iatu bunga rondon, ke nairi’i penaanNa PUANG; tonganna iatu ma’rupa tau susi bangri to riu!
8Iatu riu malayu sia iatu bunga rondon, apa iatu kadanNa Kapenombanta tontong sae lakona.
9E Sion, ikomo tu umbaa kareba melo, la kendekko langngan misa’ buntu malangka’; e Yerusalem, ikomo tu umbaa kareba melo, pekapuai tonganni tu gamarammu; pekapuai tu gamarammu, da mumataku’; pokadanni mintu’ kota Yehuda kumua: Inde sia tu Kapenombammi!
10Manassa la sae tu Puangta PUANG situang kamawatangan, sia iatu limanNa umpalalo parenta. Iatu polean dio Kalena sia iatu pepakkan dolo dio oloNa.
11La Nakambi’ tu baanan dombaNa susito mangkambi’, la Napasipulung tu anak domba tama limanNa, anNa sembe’i; ia duka tu umpasusunnapa anakna la Napela’-pela’ Naramba.
To mala’bi’ sia To kuasa tu To ullendokan Sion
12Mindamora ussuka’i pala’na tu uai sia mindamora undangkanni limanna tu langi’ sia ungkararoi tu barra’-barra’ lan lino sia untimbangi dating tu mintu’ buntu sia umpalangnganni timbangan tu mai tanete?
13Mindamora tu mangka ullopianni tu PenaanNa Puang sia mindara tu tongkonan ada’Na umpatuduI?
14Mindamora tu Nanii undaka’ pa’timbangan la umbenNi pa’inaan la unnada’i lalan malolo, sia unnada’i kapaissanan sia umpatuduI diona lalan la ungkabu’tui tangnga’ kinaa?
15Iatu mintu’ bangsa dipasangtinti uai sangto’doan lan petimba sia pada to barra’-barra’ dao timbangan; iatu lebukan susito barra’-barra’ manisak titale’.
16Tae’ anna ganna’ tu kayunna Libanon la dipantunui sia iatu olo’-olo’na tae’ naganna’ dipemalaran ditunu pu’pu’.
17Iatu mintu’ bangsa dio oloNa Puang butung to tae’ bang apa, mintu’nato Nasanga susito apa tae’, sia tae’ gai’na.
18Mindara la mipasitintianNi tu Puang Matua sia rupa apara tu la mipasangrupanNi?
19Napati’norammi pande misa’ rapang-rapang dipodeata anna sapu’i bulaan pande bulaan, sia natampan ba’tu pira-pira rante salaka.
20Iatu to tang palambi’ doi’na la unggaragai rapang-rapang dipa’deatainna, umpilei misa’ kayu tang manapo, anna daka’ misa’ pande manarang la umpatunannanganni misa’ rapang-rapang dipodeata tang tibendon.
21Tae’raka miissanni? Tae’raka mirangii? Tae’raka midipokadan tempon dio mai? Tae’raka miissanni tu diona parandanganna lino?
22Iatu Puang unnisung dao lino malepong, na iatu tolino butung bangri batik. Ia umballa’ langi’ takua to sampin, Naballa’ susito tenda nanii torro.
23Ia umputtai mintu’ to paa, sia mintu’ to ma’parenta dao kuli’na padang Napatangkebattuan.
24Mane ra’pa’ ditanan, mane ra’pa’ diambo’, mane mennuaka’ rokko padang, anNa pamurru’i Puang, naurungan malayu tu tau iato mai, sia susi ongkan napettiaran angin bara’.
25Mindara tu la mipasitintianNa’, kumua angKu sangtinti? kadanna To masero.
26Mentingarakomi langngan, ammi tiroi; mindara umpadadi te mintu’ ma’dandan maritik dao? Iamotu Puang tu umpopa’lengkoanni tassu’ tu sangtuntunan kapua baananna sia tu untambai simisa’-misa’i sanganna tu mintu’nato tete dio kakapuanna matoto’Na sia kakapuanna paanNa; na moi misa’ tae’ torro.
27Iamoto, e Yakub, ma’apai ammu kua, sia ma’apai ammu ma’kada, e Israel, kumua: Karerungan tu lalanku dio oloNa PUANG sia tae’ bang nadisaile tu katonganangku dio oloNa Kapenombangku.
28Tae’raka ammu issanni, tae’paraka ammu rangii, kumua iatu PUANG, Iamo Kapenomban matontongan, To kumombongna mintu’ randan langi’. Tang mekaboyo’ sia tang mekata’ka’, tang dilambi’ tu kamanaranganNa.
29Ia umpamawatangi tu to boyo’ sia urrangnganni kamatotoranna to tang pakullemo.
30Iatu to mangura ma’din boyo’ sia longgo’ sia iatu pia muane ma’din tilende’ anna tobang.
31Apa iatu to untayan PUANG la umba’rui kamatotoranna, anna mettia’ kendek langngan susi langkan maega. Tau iato mai la lumingka tang mekaboyo’, la sumalong tang mekata’ka’.