Dual PanelTAUNNA PUANG (PASALA’ 49–55) ;Pa’nubua’ ma’penduanna diona TaunNa PUANG
1PerangiiNa’, e mintu’ lebukan, sia tananni talinga, e kamu mintu’ bangsa mambela. Tempon lanpa mai pa’tambukan Nanii untambaina’ PUANG sia randuk lan mai inan tau Nanii ussa’bu’i tu sangangku.
2Napopendadi la’bo’ mataran tu pudukku; Naongannina’ limanNa, Napadadina’ misa’ tinaran matadi’, Napalanna’i tambilanNa.
3Sia ma’kada lako kaleku Nakua: Ikomo tu taungKu, Israel, tu dinii umpakala’bi’Na’.
4Apa kukua: Tae’ gai’ku mara’ta’, tae’ bua’ku sia tang kebattuan umpura-purai kamatotorangku. Apa iatu taaku dio Ia PUANG sia iatu saro ra’ta’ku dio Ia Kapenombangku.
5Apa totemo Nakua tu PUANG tu umpadadina’ taunNa tempon lan mai pa’tambukan angku pasulei tu Yakub lako, sia angku pasipulungi tu to Israel lako – sia dipakala’bi’mo’ dio pentiroNa PUANG sia Kapenombangku tu kupomatoto’s-
6Nakua: Maringanpako dadi taungKu la umpabendanni sule tu mintu’ sukunna Yakub sia umbaai sule tu dikarimmanninnapa dio mai to Israel; Kupatulangdanko naposulo mintu’ bangsa, kumua anna iatu kasalamaran dio mai Kaleku landa’ lako mintu’ randan langi’.
7Nakua kadanNa PUANG, Pela’bakna to Israel, To maserona, lako to tarru’ nasokkoi tau, sia nakagi’gi’ bangsa iato, tu napokaunan mintu’ to ma’parenta: La natiro mintu’ datu anna bendan; susi dukato tu mintu’ arung anna tukku, belanna PUANG, To maruru’, To maserona Israel, tu umpilei langsa’ko.
Sule tama dandanna
8Nakua kadanNa PUANG: Kutanannimoko talinga lan attu kamasorokan sia Kutunduiko lan attu kamanamanan: la Kurinding pala’ko sia la Kupadadiko basse lako bangsa iato mai, la umpasulei tama dandanna tu padang iato sia napourungi umpoapa polei sule tu padang mana’ talona tau iato mai,
9sia la umpokadanni to dipattang kumua: Tassu’komi sia lako to lan mapi’tukna kumua: Sunkomi lako masiangna! Iatu tau iato mai la dikambi’ dio lu lalan sia mintu’ tanete nanii undaka’ kande.
10Tang la mekatopo ba’tu mekama’rang, tae’ nala ussarussu’i angin padang aak sia tae’ nala ulla’da’i allo, belanna iatu tau iato mai la Nasolan To madulu’na sia la Naanta’ lako to’ mata kalimbuang.
11La Kurantei tu mintu’ buntungKu sia mintu’ batattaKu la Kupemeloi.
12Iate tau iate mai lu dio mai padang mambela, lu daa mai ulunna salu sia dio mai matampu’, na iatu senga’na to dio mai tondok Sinim.
13Siarrakangkomi, e langi’ sia sikumalasiangko, e lino, unnangnga’komi, e buntu, belanna PUANG umpakatanai tu mai taunNa sia ungkaturu-turui mintu’ to dipandasaNa.
14Apa nakua tu Sion: Natampemo’ PUANG sia tang Nakilalaimo’ Puang.
15Ma’dinraka misa’ baine ungkalupai anak sumusunna, anna tang ungkatirinnai tu anak natibussanan? Kenna la ungkalupai tonganni baine iato mai, manassa tae’ Aku Kukalupaiko.
16Kusura’moko diong pala’ lima patomalingKu, sia iatu rinding tembo’mu dio bang oloKu.
17Iatu mintu’ anakmu madomi’ sae; mintu’ to umbala’-bala’ko sia to ussanggangko toyang dio mai kalemu.
18Bangunanni tu matammu tiku lao, ammu tiroi tu mintu’ tau iato mai; sirampunmo anna sae unpengkareke’iko. La lelukraka tuoKu, kadanNa PUANG, mula umpakeanri kalemu butung to belo, sia la mukassaran kalemu sangtinti baine diparampo.
19Belanna iatu tembo’ ro’pokmu sia tondok sanggangmu sia padang talomu – apa totemo si’pi’mo tu tau umpa’tondokkiko, sia mintu’ tu to umbala’-bala’ko la toyang mambela dio mai kalemu.
20Ondongpi, e iko tu sisayuraan anak la murangi tu mai anakmu ma’kada nakua: Tarru’ si’pi’mo te inan iate lako kaleku, benpa’ inan angku nii torro.
21Mukuami lan penaammu: Mindara umpadadianna’ te mintu’ anak iate, belanna dolona sisayuranna’ anak sia tamanangna’; dolona dirampana’ sia ditibena’; mindara ungkaritutui te mintu’na te? Tang aku mannaraka torro misa’ pirangbongi’, naumbara nanii attu iato te mintu’na te?
22Inde sia tu kadanNa Puangta PUANG, Nakua: La umpakarangNa’ limangKu lako mintu’ bangsa, sia la umpabendanNa’ banderaKu lako mintu’ to sangpetayanan, sia la sae ungkepakki tu mintu’ anakmu muane sia ussompoi tu mai anakmu baine.
23Iatu mai datu la dadi ambe’ passarakmu sia iatu datu baine la dadi to ma’pasusummu; iatu tau iato mai la menomba sae rokko padang dio olomu, sia ullepa’i barra’-barra’ dio lentekmu. Attu iato la muissan, kumua: Akumote tu PUANG, naminda-minda untayanNa’, tae’ nala kasirisan.
24Ma’dinraka ditoro’ tu pangrampa dio mai to mawatang, ba’tu dipallaian tu pealanna to sipatu umpoapai.
25Apa moi susito, kadanNa PUANG Nakua: Iatu pangrampa la ditoro’ dio mai to mawatang sia iatu pealanna to lalong la dipallaian. Belanna Aku kalena la siea tu to unneako sia la untundui mintu’ anakmu.
26Iatu mintu’ to umpakario-rioko la Kupakande duku’na, sia la unniru’ kalena rarana sae lako malangona susito unniru’ uai anggoro’ mangura anna issanni mintu’ ma’rupa tau kumua Akumote, tu PUANG, To pakarimmanammu sia To kuasanna Yakub, iamo Pela’bakmu.