Dual PanelDa mikataku’i tu tolino
1PerangiiNa’, e kamu tu unnula’ kamaloloan, e kamu to undaka’ PUANG. Tiroi tu buntu batu tu minii dipa’ lan mai, sia iatu patuang dinii ungkalikomi.
2Tiroi tu Abraham, ambe’mi sia Sara to undadiangkomi, belanna Kutambai tonna mane kale-kalena sia Kupamasakke sia Kupopemba’ka’ kalle-kallean.
3Belanna la Napakatana PUANG tu Sion sia la Napakatana tu mai kota daun lauanna; la Napopembali susi Eden tu padang aakna sia iatu pangala’-ala’na Napasangtinti pa’lakNa PUANG; la ponno kaparannuan sia kasendean lan, sia pa’pudi-pudian sia nanian.
4PerangiiNa’, e taungKu, sia e kamu to sangpetayanangKu, tananniNa’ talinga. Belanna la sun tu sukaran aluk dio mai Kaleku sia la Kupatulangdan tu katonganangKu butung misa’ arrang lako mintu’ bangsa.
5Mengkareke’mo lako kalemi tu kapataloan dio mai Kaleku sia kasalamaran dio mai Kaleku la bu’tumo, sia limangKu la umpaolai salunna tu mintu’ bangsa; mintu’ randan tasik untayanNa’ sia urrannuan limangKu.
6Mentingarakomi langngan langi’, sia mentirokomi rokko kuli’na padang; belanna iatu langi’ la pa’de poton susi rambu sia iatu lino la buruk susi tamangkale sia iatu mai to untorroi, mate susi kasisi’; apa iatu kasalamaran lu dio mai Kaleku tontong sae lakona, sia iatu kamaloloangKu tae’ nala disanggang.
7PerangiiNa’, e kamu to untandai kamaloloan, e bangsa unnanna rara’ Sukaran alukKu lan penaanna. Da mikataku’i tu pelo’bona tolino sia da mipotirambanni tu pebe’sena tau iato mai.
8Belanna tau iato mai la maimbak susito sampin naimbakan busung sia sangtinti bulu domba nakande ulli’; apa iatu kamaloloangKu tontong sae lakona sia iatu kasalamaran dio mai Kaleku tontong la disiosso’i.
9MatangkinKomi, matangkinKomi, pakei tu kamawatangammi e takia’Na PUANG! MatangkinKomi susito pirambongi’, tonna linona to dolo-dolo. Tae’raka na Kamu tu umba’ta Rahab sia urrok naga tasik?
10Tang Kamuraka tu umpamere tasik sia uai tasik kalua’ sia umpopembali lalanni tu tasik mandalan, kumua anna olai lamban mintu’ to Mirampanan?
11Iatu mintu’ to Narampanan PUANG la sule sia la kumalasi-lasi sae lako Sion; sia kaparannuan masae lako la napomakota dao ulunna, tau iato mai la unnappa’ kasendean sia kaparannuan, anna mintu’ kamasussan sia kasumarroan la mallai dio mai kalena.
12Aku, Akumo tu umpakatanako; ma’patumbaroko ammu kataku’ri tu tolino inang la mate, sia ma’rupa tau tu sangtinti riu dibela’i!
13Ammu kalupai tu PUANG, To tumampamu, tu umpalumbang langi’ sia umparandanganni lino, ammu tontong bang tu’tu’ allo ungkataku’ kamasarranganna to ma’pakario-rio, ke tumayai la pasanggangi? Umbamira tu kamasarranganna to ma’pakario-rio?
14Inang madomi’ duka la dirampanan tu to tikongkomo dirante bassi, tae’ nala mate, sia tae’ nala rokko panglamunan sia tae’ nala kapu’duran kande.
15Belanna Akumo tu PUANG, Kapenombammu, tu umpatikalulun len tasik anna mariak bombangna; iatu sanganNa: PUANGna mintu’ ma’dandan maritik.
16Kupadiomo pudukmu tu kadangKu sia Kuongannimoko pala’ limangKu, Akumo tu umpalumbang langi’ sia umparandanganni lino sia ma’kada lako Sion, kumua: Kamumo tu taungKu.
Ma’katampakanna parri’na Yerusalem
17Pana’dingko, pana’dingko, millikko e Yerusalem; e iko tu mangka unniru’i tu lan irusan nanii kare’dekanNa PUANG tu Natadoangko, sia mangka umpepurai nairu’ tu apa palango lan irusan.
18Iatu mintu’na pia nadadian, tae’i misa’ tu urrenden mana’pai; sia mintu’na tu pia nadaranai, tae’i misa’ untoei tu limanna.
19Iate iannate da’dua narampoimoko – mindapara tu la umpopa’di’ko? – iamotu kasanggangan sia kamasolangan, kapangeloan sia bassi mataran – umbara la Kukua umpakatanako?
20Mintu’ anakmu limpu nasangmo dio lu to’ tetuk lalan, susi nuang naala patuang: nalango liumo kare’dekanNa PUANG sia pa’garrakNa Kapenom-bammu.
21Iamoto, perangii te, e to mandasa sia e to malango, apa tangia to nalango uai anggoro’.
22Nakua tu kadanNa Puangmu PUANG, iamotu Kapenombammu, tu untonganan taunNa: La kualaimo lan mai limammu tu irusan nanii apa melango; sia tu lanna irusan nanii kamare’dekangKu tae’mo ammu la unniru’i.
23Sangadinna la Kupaka’panan to mangka umpakario-rioko sia ungkuangko kumua: Lumbangko angki ponanakanni tu boko’mu; ammu lumbang anna polalanni, sia napobatattai tau tu boko’mu.