Alkitab Mobile SABDA
[VER] : [TORAJA]     [PL]  [PB] 
 <<  Yesaya 54 >> 

Kamala’biranna Sion la sae undinna

1Kumalasiko, e iko tu tamanangna, tu tae’na bangpa mukianak; unnarrakko sia unnangnga’ko, e iko tu tae’na lenpa mumangurria’, belanna iatu to tae’ balinna mandu buda anakna na iatu to mendapo’, kadanNa PUANG.

2Pekalua’i tu inan tendamu sia pamaluanganni muballa’ tu kulambu inan munii torro, da mudampai, pamalambe’i tu mintu’ pantokmu.

3Belanna la membaka’ka’ko lako kanan sia kairi sia la napomana’ bati’mu tu mintu’ bangsa sia ia la umpamapulu’ polei sule tu mintu’ kota daun lauanmo.

4Da mumataku’, belanna tae’ ammu kasirisan; da mumaila’, belanna tae’ ammu la matuna, sangadinna la mukalupaimo tu kamatunammu tommu mangura sia tang mukilalaimo tu kadibellerammu tommu balu.

5Belanna iatu muanemu, Iamo To tumampamu, PUANGna mintu’ ma’dandan maritik sanganNa; sia iatu Pela’bakmu, iamo To maserona to Israel, tu digente’ Kapenombanna mintu’ lino.

6Belanna Natambaimoko PUANG, susito misa’ baine ditampemo sia nalambi’ rosso inaa; sia ten to baine napobaine tau tonna mangurapa, apa nasayu undinna, kadanNa Kapenombammu.

7Sattu’roko Kutampe, apa tete dio kakapuanna mamaseKu, angKu alako sule.

8Diona kare’dekanna ara’Ku, angKu popentilindung lindoKu sattu’ dio mai kalemu, apa situang kamasokanan matontongan, angKu katuru-turuiko, kadanNa Pela’bakmu, Iamotu PUANG.

9Susi tonna linona Nuh, susi dukamo a’gangKu totemo; susi sumpaKu kumua tae’mo nala saba’ pole’ tu uai lan lino, susi tonna attunna Nuh, susi dukamo sumpaKu totemo to, kumua tae’mo Kula re’dek lako kalemu sia tae’mo Kula unggarrakko.

10Belanna moi nala tiberu tu mai buntu sia tigega’ tu mai tanete, apa iatu kamasokanangKu tae’ nala tiberu dio mai kalemu sia iatu basse kamarampasangKu tae’ anna la tigega’, kadanNa To maturu-turummu, iamotu PUANG.

11E iko, to mandasa sia to narua angin bara’ sia to tang dipakatana, tiroi, la Kuato’ tu batummu Kupi’da’ batu tambaga sia la Kuparandanganniko parimata lasuri’.

12Sia mintu’ randan tembo’mu ake’ api Kugaraga sia mintu’ babanganmu ake’ ra’rak sia mintu’ rinding tembo’mu parimata intan.

13Na mintu’ tu anakmu la Naada’i PUANG sia la kapua kasalamaranna mintu’ anakmu.

14Tete dio kamaloloan ammu dipatangtibendon. Sia la muissan, kumua toyangko dio mai pa’pakario-rio belanna tae’ mumataku’, sia la toyangko dio mai ma’patirambanna belanna iatu iannato tae’ nala urreke’ko.

15Iake masarrangi tu tau ullaoiko, tae’ anna lu dio mai Kaleku to; minda-minda tu la ullaoiko, iko la napotibambang.

16Akumote tu umpadadi pande bassi tu ussau ruaya sia unggaraga pa’buno situang kamanaranganna, apa Aku dukamo tu umpadadi tu to pasanggang la pasanggangan.

17Mintu’ tu pa’buno digaraga la unneako, tae’ anna la lolo’ sia mintu’ lila unneako lan inan pa’paolaian salu, la musau’. Iamote tu taa mana’na mintu’ taunNa PUANG, sia patu borongna tau iato mai tu lu dio mai Kaleku, kadanNa PUANG.


  Share Facebook  |  Share Twitter

 <<  Yesaya 54 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel