Dual PanelDiona kaditambaian lako kasalamaranNa PUANG
1E kamu mintu’ to ma’rang, maikomi lako to’ uai, sia e kamu to tae’ doi’na, maikomi mangalli sia kumande; maikomi, allii tu uai anggoro’ sia pangandu’ tang naolai doi’ sia tang dibaya’.
2Ma’apai ammi palaoi doi’ tu tangia kande sia polean ra’ta’mi tu tang mepedia’ina? Perangii meloNa’, ammi kandei tu apa maelo, sia anna pasende kalena tu deatammi situang kaseboan.
3Tananni talinga, maikomi perangii, anna tuo tu deatammi; la untananNa’ basse matontongan lako kalemi; mintu’ tanda pa’kamasean tang tilelukKu lako Daud.
4Kupatunannangmo la ma’katottongi lako mintu’ bangsa sia la napodatu sia la napekapuangi mintu’ bangsa.
5Misa’ bangsa tang mutandai la mutambai sia iatu bangsa tang untandaiko la sae lako kalemu belanna pa’poraianNa PUANG, Kapenombammu, sia belanna pa’poraianNa To maserona to Israel, saba’ Napakala’bi’ko.
6Daka’i tu PUANG, su’ding ma’din siaPi diappa’; massambayangkomi metamba lako, su’ding mandappi’ siaPi.
7Melo ke untampei lalanna tu to tang mekaaluk sia untampe tangnga’na tu to kelok penaanna, anna mengkatoba’ lako PUANG, Nakaturu-turui Puang, sia mengkatoba’ lako Kapenombanta, belanna inang mamase liu ma’pagarri’.
8Belanna iatu tangnga’Ku tangia tangnga’mi, sia iatu lalanmi tangia lalanKu, kadanNa PUANG.
9Belanna susi sikalangka’na langi’ anna lino, susi dukamoto tu sikalangka’na lalanKu anna lalanmi sia iatu tanga’Ku anna tanga’mi.
10Belanna susi uran sia ambun makko lu dao mai langi’, anna tang sule langngan, sangadinna ussakka’i padang sia napopembura sia umpatuo tananan sia umpadenan lise’ to mangambo’ sia kande la nakande tau.
11Susi duka tu kadangKu sunmo dio randan pudukKu, kumua tae’ anna la sule lo’bang lako Kaleku, sangadinna umpalolang apa Kuporai sia umpalalo mintu’ tu apa Kusuanni.
12Belanna la tassu’komi situang kasendean sia la direnden marampa’komi, iatu buntu sia tanete la unnangnga’ dio tingayomi sia mintu’ kayu dio lu padang la massala’pa-la’pa.
13La tuo tu kayu sanoba’ sondana duri sia kayu murdu’ sondana a’da’; iamote tu Naposanga mala’bi’ PUANG sia Napotanda matontongan, tu tang la dipa’dei.