Dual PanelKaditambaianna Yesaya
1Iatonna taun namatean datu Uzia, payanmi lako kaleku tu Puang unnisung dao isungan kapayungan masuanggana sia mala’bi’, na iatu Banua Kabusungan nasitutu’i rombe-rombe bayunNa.
2Den ba’tu pira-pira Serapin untalimbungI tama, rundunni pani’ siannan; da’dua pani’ nasamboan lindona, da’dua pani’ nasamboan lentekna, na da’dua pani’ napake mettia’.
3Metambami tu misa’ ungkuanni tu misa’ nakua: Maindan, maindan, maindan tongan tu PUANGna mintu’ ma’dandan maritik, iatu mintu’ lino naponnoi kamala’biranNa.
4Tigoyangmi tu mai manangnga lumpa-lumpa belanna galugu gamaranNa na iatu banua ponno rambu.
5Kukuami: Upu’ alloku, sumpu sumandakku, belanna aku te to maruttak puduk sia torrona’ sirau misa’ bangsa maruttak puduk, na nata’paimo matangku tu Datu, tu PUANGna mintu’ ma’dandan maritik.
6Apa misa’i tu Serapin sae mettia’ umpellambi’ina’ sitangke ruaya tu naala nasipi’ dao mai to’ pemalaran.
7Napalakoi pudukku nama’kada, nakua: Iake narumbumi tu pudukmu te, ta’pa tilossok ta’ga’mi tu kakadakeammu sia diseroi tu kasalammu.
8Mangkato kurangimi tu kadanNa Puang Nakua: Mindara tu la Kusua? Mindara tu la Kiposumbungan puduk? Mebalimo’ kukua: Indena’, suamo’.
9Ma’kadami Nakua: Malemoko, kuanni tu bangsa iate: Perangimi, apa tae’ mipebuyu’i; tiromi, apa tae’ miissanni.
10Pabattukki tu penaanna bangsa iate sia patarui tu talinganna, sia pasipi’da’i tu matanna, da napatiro sia da naparangi sia da napaissan, naurungan tae’ anna mengkatoba’ sia tae’ nadipamaleke.
11Kukuami: O Puang, la sangapai? Nakuami: Sasanggangna tu mai tondok iato sae lako puranna tu pa’tondokan sia banua sae lako tae’na tau lan sia samempadang talona tu tana iato.
12AnNa patoyangi PUANG male tu tau iato mai sia biung-biungammo tu tondok lo’bang lan bamba iato.
13Ke denpi taa sangpulona lan, la disanggangi dukapa. Ten to kayu tarpin sia jati dilemponni, den siapa tu garempongna, susi dukamoto tu garempongna tau iato mai, iamo misa’ banne masero.