Dual PanelTo umpa’peissanan kasalamaran
1Narondongna’ PenaanNa Puangta PUANG belanna mangkamo’ Natakko PUANG; Nasuana’ umbaa kareba kaparannuan lako to madiongan penaanna, la umpamanaman to rantang buana sia umpetamban katassuranna to dipattang sia kadirampananna to dirante bassi.
2Sia la umpetamban taun kamasorokanNa PUANG sia allo pa’pakkanNa Kapenombanta sia la umpakatana to rosso inaanna.
3La umpapatui mintu’ to Sion tu nalambi’ rosso inaa, anna diben passapu maramba’ la dipasondana au sia minna’ kasendean la dipasondana ma’pote dibolong, pakean pa’tendeng la dipasondana penaa si’pi’. Anna disangai tu tau iato mai: tarpin kamaloloan, tanananNa PUANG, dikua anna pakala’bi’I.
4Attu iato la napemeloi sule tu kota masaimo daun lauan sia la nabangun pole tu inan disanggang pirambongi’ sia la umba’rui tu mintu’ kota ro’pok tu mangsanmo disituran-turananni.
5Iatu to sae ma’parandan lako kalemi la ungkambi’ mintu’ baanan dombami sia iatu to salian lembang la umposara’ umammi sia la ungkampai pa’lak anggoro’mi.
6Apa iatu kamu la digente’komi to minaanNa PUANG sia la disangaikomi taunNa Kapenombanta; la miappa’ tu iananna mintu’ bangsa sia la misattuan tu kamala’biranna.
7Iatu la diposondana siri’mi la dikasiri’komi penduan manglokkon sia iatu la diposondana kaditattammu la unnarrak-arrak tu tau iato mai belanna upa’na; iamoto anna la umpokataananni penduan manglokkon tu apa lan tondokna sia la unnappa’ kasendean masae lako.
8Belanna Akumo, PUANG, umporai tu katonganan, Kukabiri’ tu pangrampa sia kakelokan, sia la Kusipatui tu sarona tau iato mai sia la untananNa’ basse matontongan sola tau iato mai.
9La kalelean tu bati’na dio lu mintu’ bangsa sia iatu mai lanto mimi’na dio lu mintu’ to sangpetayanan, mintu’ tu to untiroi, la natandai kumua iatu bati’ iato Napamasakke PUANG.
10Iatu penaangku umpoparannu tongan PUANG, iatu deatangku unnarrak-arrak umposende-sende Kapenombangku, belanna Natamangkaleimo’ pakean kasalamaran, sia Napabayuina’ bayu lamba’ kamaloloan, sangtinti to muane diparampo ma’passapu susito minaa sia ten to baine diparampo umbeloi kalena.
11Belanna susito padang umpatuo tanananna sia ten to pa’lak umpopentaruk apa diambo’ lan, ten dukamoto tu Puangta PUANG la umpabutu’ kamaloloan sia kapa’pudian dio olona mintu’ bangsa.