Alkitab Mobile SABDA
[VER] : [TORAJA]     [PL]  [PB] 
 <<  Yesaya 9 >> 

Kadadianna Messias

1(8-23) Apa iatu padang maparri’ susito, tae’mo anna la kalillinan. Susi tonna dolona, Napamatuna tu tana Zebulon sia Naftali, ten dukamoto la Napakala’bi’, ke ma’katampakannai, tu lalan lako tasik, rampe lianna Yordan, lili’ to kapere’.

2(9-1) Iatu to lolang lan kamalilinan, la untiro arrang kapua sia iatu mintu’ to naluang bayo-bayo kamatean la bu’tu tu arrang lako.

3(9-2) Mipopemba’ka’mo te bangsa, amMi pekapuai tu kaparannuanna; la parannu paiman tu tau iato mai dio oloMi susi to kaparannuanna tau, ke pepareanni, sia sangtinti to sila’tekan, ke untaa-taai pangrampa.

4(9-3) Belanna iatu ayoka napassan sia lemba dao palempengna sia ta’ba perambana Mirebongmo susi tonna allo (kaditaloanna) to Midian.

5(9-4) Belanna mintu’ sepatu, tu tumutu mentarassa, sia mintu’ bayu lamba’ ussarrin rara, la ditunu napepurai api.

6(9-5) Belanna dipadadiammiki’ misa’ Pia, misa’ Pia muane dikamaseangki’ umpobayu bayu kapayungan, sia iatu sanganNa nasa’bu’ tau: Rangga inaa kalle-kallean tu ma’patudu, Kapenomban kuasa, Ambe’ matontongan sia Datu pasali rampa’.

7(9-6) La kapua tu parentaNa sia tae’ upu’na tu kamarampasan dao isungan kapayunganna Daud sia lan nalili’ parentaNa, la Napabantang sia Naparandanganni katonganan sia kamaloloan randuk totemo tontong sae lakona; kamamaliranNa PUANGna mintu’ ma’dandan maritik la umpogau’i tu ianna te.

To Efraim diparampoi kamaparrisan

8(9-7) Napasonglo’mo Puang tu misa’ kada lako Yakub, nata’pa lan Israel.

9(9-8) Iatu iannato la naissan makalima’na bangsa iato, to Efraim sia pa’tondokan Samaria umpamadao penaanna sia matampo ma’kada kumua:

10(9-9) Rondonmo tu batu tela, apa batu dipa’ la tabangunanni sule; dilellengmo tu ara pangala’, apa kayu arasi la tatanan tasondanni!

11(9-10) Iamoto anna mintu’ balinna Rezin la Napake’de’ PUANG la unnea tau iato mai sia la Nasarrang tu mintu’ ualinna:

12(9-11) Iamotu to Aram dio mai matallo, to Filistin dio mai matampu’, anna mummunni tama sadangna naampello’ tu to Israel. Moi anna susito iate mintu’na, tae’ anna poradanni kasengkeanNa Puang sangadinna tontong bangpa tie’te’ tu limanNa.

13(9-12) Belanna tae’ anna mengkatoba’ te bangsa iate lako To umpa’dikki sia tae’ anna daka’i tu PUANGna mintu’ ma’dandan maritik.

14(9-13) Iamoto anna sangallo bangri la Nanii PUANG unta’takki dio mai to Israel, la ulu, la ikko’, la tangke koroma, la tille.

15(9-14) Iatu tedong pariu’ sia to la’bi’ iamo ulu, na iatu nabi umpa’pangadaran buttok iamo ikko’.

16(9-15) Iatu mai panglalanna bangsa iate iamo panglalan sala, sia napapusa nasang tu tau nalalanan.

17(9-16) Iamoto anna tang umposendei PUANG tu mai to manguranna, sia tae’ anNa katuru-turui tu mai pia biungna sia mintu’ baine balunna, belanna to untananni nasang boko’ Puang sia to bulituk sia kapanglangdoan sun dio pudukna. Moi anna susito iate mintu’na, tae’ anna poradanni kasengkeanNa Puang, sangadinna tontong bangpa tie’te’ tu limanNa.

18(9-17) Belanna iatu katangmekaalukan ma’laka-laka butung api, tu ussopui duri sia a’da’ naballa, tu ummampu’i ranga’-ranga’ makamban lan pangala’, naurunganni kendek tu rambunna meumbun.

19(9-18) Tu belanna kare’dekanna ara’Na PUANGna mintu’ ma’dandan maritik anna kandei api tu tana iato, anna potaai api tu pa’tondokan naurunganni tae’mo nakatirinnai siulu’na tu tau.

20(9-19) Dio rampe kanan ma’karu’bek tu tau, apa topo sia, na dio kairi mangampello’ tu tau, apa tae’ sia anna dia’; pantan la ungkande bale-bale takia’na.

21(9-20) To Manasye anna to Efraim, sia to Efraim anna to Manasye; la umpapada penaa unnea to Yehuda. Moi anna susito iate mintu’na, tae’ anna poradanni kasengkeanNa Puang sangadinna tontong bangpa tie’te’ tu limanNa.


  Share Facebook  |  Share Twitter

 <<  Yesaya 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran