Dual PanelPadang ditaa-taa dio tondok Kanaan
1Inde sia tu padang mana’ napotaa to Israel dio tondok Kanaan, tu nataa-taa to minaa Eleazar sia Yosua, anakna Nun, sia mintu’ pangulu rapu suku to Israel, lako to Israel, la napomana’.
2Diona pa’loterei napada dipamanassa tu taa mana’na, susitu Napasan PUANG nalopian Musa diona tu suku kasera ssangsese.
3Belanna mangkamo tu Musa umbenni taa mana’ tu da’dua suku ssangsese sambalinna lu Yordan; apa iatu to Lewi tae’ nabenni mana’ dio lu tau iato mai.
4Sia iatu bati’na Yusuf da’duamo suku, iamotu Manasye sola Efraim. Sia tae’ nabenni mana’ lan tondok tu to Lewi, sangadinna ba’tu pira-pira kota la napa’tondokki sia padang kariuan tu nanii sapinna sia dombana sia bembe’na sia mintu’ barang apanna.
5Susitu mangka Napasan PUANG lako Musa, susi dukamoto napogau’ to Israel, tonna taa-taai tu tondok iato.
Kaleb umpotaa Hebron
6Attu iato mennolomi tu to Yehuda lako Yosua dio Gilgal, anna ma’kada tu Kaleb anakna Yefune, to Kenas lako, nakua: Mitandai sia tu kada Napokada PUANG lako Musa, taunNa Kapenomban, diona te aku sia diona kamu dio Kadesh-Barnea.
7Patang pulomo taun dadingku, tonna suana’ Musa, taunNa PUANG, dio mai Kadesh-Barnea male usserre’i tondok; angku sule umbanni kareba susitu kupemanassanna.
8Iatu mintu’ siulu’ku tu male kusolan umparosso penaanna to buda, apa iatu aku tontong bangna’ maruru’ lako PUANG, Kapenombangku.
9Iamoto umpalaomi sumpa tu Musa allo iato, nakua: Tae’ nala tang tongan tu padang munii umpellesean lentekmu, la mupotaa mana’ musiosso’i tontong sae lakona, belanna tontongko maruru’ lako PUANG, Kapenombangku.
10Manassa Napatuomo’ PUANG situru’ pangallu’Na. Totemo patang pulomo llima taunna, tu Nanii PUANG umpokadai te kada iate lako Musa, tonna salamba salao tu to Israel dio lu padang pangallaran. Totemo manassamo iatu taun kadadiangku karuamo pulona llima.
11Allo iate iatu kamatotorangku susi bangsiapa tonna suana’ Musa; susi kamatotorangku tonna allo iato, susi bangsiapa te allo iate; matoto’pa’ la parari sia lu tama lu lan mai.
12Iamoto benmo’ te padang ma’buntu, tu Napokada PUANG tonna allo iato, belanna mirangi kalenamo, kumua iatu to Enak dio sia ba’tu pira-pira kota kapua ditambakuku. Podo Narondongna’ PUANG, manassa kuula’ tu tau iato mai, susitu mangka Napokada PUANG.
13Napassakkemi Yosua tu Kaleb, anakna Yefune, sia naben tu Hebron la napomana’.
14Iamoto anna pomana’i Kaleb, anakna Yefune, to Kenas, tu Hebron sae lako allo iate, belanna tontong maruru’ lako PUANG, Kapenombanna to Israel.
15Iatu Hebron dolona disanga Kiryat-Arba; iatu Arba misa’ to ma’iringanna kapua dio to Enak. Marampa’mi tu tondok dio mai tananan ra’.