Dual PanelIatu padang torro ditaa-taapa dio Silo
1Ditambaimi tu mintu’ kombongan to Israel sae sirampun dio Silo; napabendanmi dio tu Tenda Kasitammuan, belanna iatu tondok iato mangkamo natalo.
2Torropa pitu suku to Israel, tu tang unnappa’pa taa mana’na.
3Iamoto ma’kadami tu Yosua lako to Israel nakua: Sangapaporokomi la matukkun la unnalai tu padang iato la mipomana’, tu Nasorongmo PUANG, Kapenombanna nene’ to dolomi, lako kalemi?
4Pamanassami tallu tau, ke misa’oi suku; la kusua tu tau iato mai, male ullelei tu padang iato, anna sura’i tu mai angge sitinayanna taa mana’na ke simisa’oi, namane sule lako kaleku.
5Mangkato nasituru’imi untaa pitui. Iatu Yehuda la untorroimo lili’ padangna rampe lo’na lu, iatu bati’na Yusuf la untorroimo lili’ padangna rampe daanna lu.
6La misura’mo tu padang iato tu mangkamo ditaa pitu ammi baai lako kaleku, angku lotereiangkomi inde te dio oloNa PUANG, Kapenombanta.
7Iatu to Lewi tae’ nadipaketaa dio lu kalemi, belanna iatu katominaan, tu natoean PUANG, iamoto tu taa mana’na. Na iatu Gad sia Ruben sia sesena suku Manasye mangkamo unnappa’ taa mana’ sambalinna lu Yordan dio rampe matallo, tu napa’bengan Musa, taunNa PUANG, lako tau iato mai.
8Ke’de’mi male tu tau iato mai. Iatonna la ke’de’mo tu tau iato mai, napasanmi Yosua ussura’i tu padang iato, nakua: Malemokomi ullelei tu padang iato, ammi sura’i mimane sule lako kaleku; mangkato kulotereiangkomi inde te dio Silo dio oloNa PUANG.
9Malemi tu tau iato mai ullelei tu padang iato, anna sura’ simisa’i tu kota, dipapitu taanna, namane sule lako Yosua dio to’ tenda dio Silo.
10Nalotereiammi Yosua tu tau iato mai dio Silo dio oloNa PUANG, sia nataa-taa Yosua inde to dio lako to Israel tu padang iato, unturu’ bilangan sukunna.
Taa mana’na Benyamin
11Napamanassami loterei tu taa mana’na suku Benyamin unturu’ pa’rapuanna, na iatu lili’ padangna tu napamanassa loterei, naparitangnga to Yehuda na bati’na Yusuf.
12Iatu angge lili’na daanna lu randuk dio mai Yordan namane ma’palulangngan umpatu buntu ma’borong daanna lu Yerikho, sia tarru’ ma’palulangngan buntu rampe matampu’, na iatu tampakna lan padang pangallaran Bet-Awen.
13Inde to dio mai iatu anggenna tarru’ lako Lus, ma’palusau’ buntu ma’borongna Lus, iamoto tu Betel, namane ma’palurokko Atarot-Adar tu anggenna dao buntu lo’na lu Bet-Horon diongna lu.
14Namane tilekko tu anggenna nasepang ma’palusau’, rampe matampu’na buntu, tu lo’na lu Bet-Horon rampe matallo, na iatu tampakna ma’palulako Kiryat-Baal, iamotu Kiryat-Yearim, misa’ kota lili’na to Yehuda. Iamoto tu rampe matampu’na lili’na.
15Iatu anggenna lo’na lu randuk dio mai tampakna Kiryat-Yearim, namane ma’palurokko matampu’, anna tarru’ lako to’ kalimbuangna Me-Neftoah.
16Inde to dio mai ma’palurokkomi tu anggenna tampak buntu, tu sitingoan lombok Ben-Hinom tu daanna lu mellombokna to Refaim; namane ma’palurokko lombok Hinom, nama’palusau’ sipeupu’ mennaa’na buntu Yebus, anna mane ma’palurokko En-Rogel.
17Inde to dio mai tilekko ma’palurekke natassu’ lako En-Semes namane lu lako Gelilot, sitingoan lombok dao tanetena Adumim, anna male rokko to’ batunna Bohan, anakna muane Ruben,
18anna tarru’ ma’palurekke mennaa’na buntu, tu sitingoan Bet-Araba anna ma’palurokko Araba-Yordan.
19Inde to dio mai iatu anggenna ma’palurekke mennaa’na buntu Bet-Hogla, na iatu angge tampakna dio tasik mengkoko daanna lu tasik Ma’sin, dio minanganna Yordan lo’na lu. Iamoto tu anggenna lo’na lu.
20Yordan iamoto tu angge lili’ matallona. Iamoto tu mintu’ taa mana’na to Benyamin unturu’ pa’rapuanna sola lili’na tiku lao.
21Inde sia tu kotana suku to Benyamin unturu’ pa’rapuanna, iamotu Yerikho, Bet-Hogla, Emek-Kezis,
22Bet-Araba, Zemaraim, Betel,
23Haawim, Para, Ofra,
24Kefar-Haamonai, Ofni na Geba. Mintu’na to sangpulo dua kota sola kampongna.
25Sia Gibeon, Rama, Beerot,
26Mizpa, Kefira, Moza,
27Rekem, Yirpeel, Tarala,
28Zela, Elef, Yebus, iamotu Yerusalem, Gibeat na Kiryat. Mintu’na to sangpulo a’pa’ tu kota sola kampongna. Iamoto tu taa mana’na to Benyamin unturu’ pa’rapuanna.