Dual PanelTaa mana’na Simeon
1Napamanassami loterei ma’penduan tu taa mana’na Simeon, iamotu suku to Simeon unturu’ pa’rapuanna. Iatu taa mana’na naparitangnga taa mana’na to Yehuda.
2Iatu taa mana’ napotaa, iamotu Bersyeba, Syeba, Molada,
3Hazar-Sual, Bala, Ezem,
4Eltolad, Betul, Horma,
5Ziklag, Bet-Hamarkabot, Hazar-Susa.
6En-Rimon na Saruhen. Mintu’na to sangpulo tallu kota sola kampongna.
7Ain, Rimon, Eter na Asan. Mintu’na to a’pa’ kota sola kampongna.
8Sia mintu’ kampong untikui tu kota sae lako Baalat-Beer, iamotu Rama lo’na lu. Iamoto tu taa mana’na suku to Simeon unturu’ pa’rapuanna.
9Iatu taa mana’na to Simeon diala lan mai taa mana’na to Yehuda. Belanna iatu to Yehuda tarru’ buda napotaa, iamoto naketaa tu to Simeon dio lu tau iato mai.
Taa mana’na Zebulon
10Napamanassami loterei ma’pentallun tu taa mana’na to Zebulon unturu’ pa’rapuanna. Iatu anggenna taa mana’na sae lako Sarid.
11Iatu anggenna dio rampe matampu’ ma’palulangngan Marala, natu’tun lako Dabeset, anna sae sikandappi’ biring salu’-salu’ sitingoan Yokneam.
12Sule dio mai Sarid natarru’ lako matallo urrundu’ lili’na Kislot-Tabor, natassu’ dio Dobrat, namane male langngan Yafia.
13Inde to dio mai tarru’ lako matallo, lako Gat-Hefer sia lako Et-Kazin anna tassu’ dio Rimon, tu ma’palulako Nea.
14Tilekkko male ullendu’i tu kota iato daanna lu Hanaton sia iatu tampakna diong lombok Yiftah-El.
15Sia Katat, Nahalal, Simron, Yidala na Betlehem. Mintu’na to sangpulo dua kota sola kampongna.
16Iamote tu taa mana’na to Zebulon unturu’ pa’rapuanna, iamotu kota iato sola kampongna.
Taa mana’na Isakhar
17Napamanassami loterei ma’penna’pa’ tu taa mana’na Isakhar, iamotu to Isakhar unturu’ pa’rapuanna.
18Iatu mai lili’na, iamotu Yizreel, Kesulot, Sunem,
19Hafaraim, Sion, Anaharat,
20Rabit, Kisyon, Ebes,
21Remet, En-Ganim, En-Hada na Bet-Pazes.
22Iatu anggenna tu’tun sae lako Tabor, Sahazima na Bet-Semes; iatu tampak katonanna iamotu Yordan. Mintu’na to sangpulo annan kota sola kampongna.
23Iamote tu taa mana’na to Isakhar unturu’ pa’rapuanna iamotu kota iato sola kampongna.
Taa mana’na Asyer
24Napamanassami loterei ma’pellima tu taa mana’na to Asyer, unturu’ pa’rapuanna.
25Iatu mai lili’na, iamotu Helkat, Hali, Beten, Akhsaf,
26Alamelekh, Amad na Misal; dio rampe matampu’ tu’tun sae lako Karmel sia biring salu’-salu’ Libnat.
27Namane sule (tu anggenna) ma’palutama matallo lako Bet-Dagon, tu’tun sae lako Zebulon sia lombok Yiftah-El daanna lu, Bet-Emek sia Nehiel, natassu’ daanna lu Kabul;
28sia Ebron, Rehob, Hamon na Kana sae lako Sidon-Kapua.
29Namane sule tu anggenna lako Rama sia sae lako kota ditambakukunna Tirus, nasule ma’palulako Hosa, na iatu tampakna sae lako tasik, dio mai Mahalab sae lako Akhzib;
30sia Uma, Afek na Rehob. Mintu’na to duangpulo ndua kota sola kampongna.
31Iamote tu taa mana’na suku to Asyer unturu’ pa’rapuanna iamotu kota iato sola kampongna.
Taa mana’na Naftali
32Napamanassami loterei ma’pennannan tu taa mana’na to Naftali, iamotu to Naftali unturu’ pa’rapuanna.
33Iatu lili’na randuk dio mai Helef dio mai Tarpin dio Zaananim, Adami-Nekeb na Yabneel sae lako Lakum, na iatu tampakna sae lako Yordan.
34Nasule tu anggenna ma’palurokko matampu’ lako Aznot-Tabor, inde to nanii tassu’ lako Hukok, tu’tun sae lako Zebulon lo’na lu, sae lako Asyer dio rampe matampu’ sia sae lako Yehuda dio randan salu Yordan dio rampe matallo.
35Inde sia tu mintu’ kota ditambakuku, iamotu Zidim, Zer, Hamat, Rakat, Kineret,
36Adama, Rama, Hazor,
37Kedesy, Edrei, En-Hazor,
38Yiron, Migdal-El, Horem, Bet-Anat na Bet-Semes. Mintu’na to sangpulo kota sola kampongna.
39Iamote tu taa mana’na suku to Naftali unturu’ pa’rapuanna, iamotu kota iato sola kampongna.
Taa mana’na Dan
40Napamanassami loterei ma’pempitu tu taa mana’na suku to Dan.
41Iatu mai lili’na taa mana’na, iamotu Zora, Estaol, Ir-Semes,
42Saalabin, Ayalon, Yitla,
43Elon, Timna, Ekron,
44Elteke, Gibeton, Baalat,
45Yehud, Bene-Berak, Gat-Rimon,
46Me-Yarkon na Rakon sola lili’na tu nasitingoan Yafo.
47Belanna iatu lili’na to Dan dio si’pi’ napa’tondokki, iamoto nake’de’ tu to Dan urrarii Lesem. Natalomi sia napatei pa’dang tu tau lan sia naalamo nanii ma’tondok, nasangaimi Dan tu Lesem napasikona sanganna Dan, ambe’na.
48Iamote tu taa mana’na suku to Dan unturu’ pa’rapuanna, iamotu kota iato sola kampongna.
Taa mana’na Yosua
49Iatonna upu’mo tu to Israel untaa-taai tu padang unturu’ patu borongna, naben duka taa mana’ tu Yosua, anakna muane Nun, lan tangngana tau iato mai.
50Unturu’mi parentaNa PUANG, tu tau iato mai nabenni Yosua tu kota mangka napalaku, iamotu Timnat-Serah, tu dao lu buntu Efraim. Nabangun pole’mi tu kota iato, anna ma’tondok dio.
51Iamoto tu taa mana’ mangka naloterei anna pamanassai to minaa Eleazar sola Yosua, anakna muane Nun, sia pangulu rapu lako mintu’ suku to Israel dio Silo dio oloNa PUANG, dio tingayo lalan tama Tenda Kasitammuan. Susimoto nanii tu tau iato mai umpaupu’i untaa-taa padang iato.