Dual PanelDiona kota pentilindungan
1Ma’kadami tu PUANG lako Yosua, Nakua:
2Pokadai lako to Israel te: Pamanassai tu ba’tu pira-pira kota pentilindungan tu mangkamo Kupokada lako kalemi nalopian Musa,
3kumua minda-minda tu papatean tang naangga’i sia tang nakapang-kapang la mallai lako umpopentilindunganni dio mai to mangala puli.
4Ianna mallai tu tau iato lako sala umbannai tu kota iato, la torro bendan dio tingayo babangan kota, anna pa’peissananni tu a’ganna lako pekaamberanna kota iato; manassa la natarima tu tau iato tama kota, anna patiroanni inan pa’bongian, nanii torro sola.
5Iake naula’i to mangala puli, tae’ nama’din tau iato mai ussorongi tu to papatean tama limanna, belanna tae’ naangga’i umpatei tu solana sia tae’ duka nakabiri’i dolona.
6La torro ia lan kota iato sae lako mangkanna umpennoloi kombongan la urra’ta’i tu kara-karana, sae lako matena tu tominaa kapua, tu den to attu iato. Namane iatu to papatean la sule lako kotana sia lako banuanna, iamotu lako kota mangka nanii mallai lan mai.
7Napamarimbangan tau iato mai tu Kedesy dio Galilea dao buntu Naftali sia Sikhem dao buntu Efraim sia Kiryat-Arba, iamotu Hebron, dao buntu Yehuda.
8Iatu sambalinna lu Yordan, dio matallona Yerikho, napamanassa tau iato mai tu Bezer, lan padang pangallaran, dao padang rante membuntunna dio mai lili’na suku Ruben, sia Ramot dio Gilead dio mai lili’na suku Gad sia Golan lan Basan dio mai lili’na suku Manasye.
9Iamote tu mintu’ kota dipamanassan mintu’ to Israel sia mintu’ to sae tu torro mempue dio lu tau iato mai, dikua nama’din mallai inde to lako tu mintu’ to tang unnangga’i papatean, da napatei to mangala puli, ke tae’pi nara’ta’i kombongan tu kara-karana.