Dual PanelKasuleanna suku umpa’tondokki sambalinna lu Yordan
1Attu iato natambaimi Yosua sirampun tu to Ruben, to Gad sia sesena suku Manasye,
2anna ma’kada lako tau iato mai, nakua: Mikaritutuimo tu mintu’ apa napasan Musa, taunNa PUANG, lako kalemi sia miperangiimo’ lan mintu’ apa kupasan lako kalemi.
3Tae’ misa’bianganni tu siulu’mi lan te attu masaimo sae lako allo iate, sangadinna mipalalo tonganmo tu apa Napapassanangkomi PUANG, Kapenombammi.
4Totemo Nakamaseimo karapasan PUANG, Kapenombammi, tu mintu’ siulu’mi, susitu pangallu’Na lako kalemi. Iamoto melo ke malemokomi sule lako to’ tendami, lako tondok mana’mi, tu nabenkomi Musa, taunNa PUANG, sambalinna lu Yordan.
5Ia manna la mikaritutui tongan tu pepasan sia Sukaran aluk, tu napasan Musa, taunNa PUANG, lako kalemi, kumua la mikamali’ tu PUANG, Kapenombammi, la mituru’ tu mintu’ bate lalanNa, sia la mikaritutui tu mintu’ pepasanNa, sia la la’ka’komi lako Puang, sia la ponno penaammi sia deatammi umpengkaolai.
6Napassakkemi Yosua tu tau iato mai, anna suai male. Sulemi lako to’ tendana.
7Na iatu sesena suku Manasye nabenmo Musa taa mana’ dio Basan, sia iatu sangsesenapa nabenmo taa mana’ Yosua sisola tu mai taana siulu’na dio matampu’na Yordan. Iatonna suami Yosua sule tu tau iato mai lako to’ tendana sia napassakkemo,
8den dukapa kadanna lako, nakua: Sulemokomi lako to’ tendami umbaa ianan buda sia sapi, domba, bembe’ lendu’ budanna sia salaka, bulaan, tambaga, bassi sia pakean lendu’ budanna. La mitaa-taa sola mintu’ siulu’mi tu mintu’ pangrampa dio mai ualimmi.
Inan pemalaranna tu mai suku sambalinna lu Yordan
9Sulemi tu mintu’ to Ruben sia to Gad sia sesena suku Manasye, natampei tu to Israel lan mai Silo dio tondok Kanaan, anna male lako tondok Gilead, iamotu padang mana’na, tu napomana’ susitu Napa’parentan PUANG nalopian Musa.
10Iatonna rampomo tu tau iato mai lako Gelilot sikandappi’ Yordan, inde to nanii to Ruben, to Gad sia sesena suku Manasye umpabendan misa’ inan pemalaran dio biring Yordan, iamo misa’ inan pemalaran kapua.
11Narangimi to Israel tu kareba, nakua: Manassamo tu to Ruben sia to Gad sia sesena suku Manasye umpabendan inan pemalaran ma’palulako tondok Kanaan, dio to’ batu ma’talimbungan sikandappi’ Yordan, indena mai lan lili’na to Israel.
12Iatonna rangimi to Israel tu apa iato saemi sirampun tu mintu’ kombonganna to Israel la lao urrarii tu tau iato mai.
13Nasuami to Israel tu to minaa Pinehas, anakna Eleazar, lako to Ruben, to Gad sia sesena Manasye, lako tondok Gilead,
14na sangpulo pangulu nasolan, simisa’ pangulu rapu ke misa’oi suku to Israel. Pantanni pangulu tu rapunna dio lu pa’rapuanna to Israel.
15Iatonna rampomo tu tau iato lako to Ruben, to Gad sia sesena suku Manasye dio tondok Gilead, sipa’kadami tau iato nakua:
16Inde sia tu kadanna mintu’ kombonganNa PUANG: Umbara susitu katangmarurusammi, ammi balira Kapenombanna to Israel, na totemo sorongboko’komi dio mai PUANG, belanna umpabendanammokomi kalemi misa’ inan pemalaran. Susimoto minii umbali-bali PUANG totemo.
17Misangaraka sidi’ tu kakadakean umpemala’i Peor, tu tae’pa taseroi dio mai kaleta sae lako allo iate, iamo napobannang to narampoi kamandasan tu kombonganNa PUANG?
18Sorong-boko’morokomika dio mai PUANG? Iake mibalimi tu PUANG totemo, masiangmo anna re’dek tu ara’Na lako mintu’ kombonganna to Israel.
19Iake marutakki tu padang mana’mi, malekomi mai lako padang mana’Na PUANG, tu naninna kemaNa PUANG, anta ma’mana’ sola. Apa da mibali-bali PUANG sia da mieakan la umpabendanan kalemi misa’ inan pemalaran senga’ na iatu inan pemalaranNa PUANG, Kapenombanta.
20Iatonna kasalan tu Akhan, anakna Zerah, unnala apa dipemalii, tang narampoiraka kasengkean tu mintu’ kombongan to Israel? Tae’ naia manna misa-misa mate tu tau iato belanna kakadakeanna.
21Mebali tu to Ruben sia to Gad sia sesena suku Manasye lako mintu’ pangulu pa’rapuanna to Israel, nakua:
22Iatu Puang Matua undaoanni mintu’ deata, iamo PUANG, tu Puang Matua undaoanni mintu’ deata, iamo Puang, Iamo unnissanni sia to Israel duka la unnissanni: iake la kipogau’i tu umbalii ba’tu tang maruru’ lako PUANG melo ke tang Mikarimmannikanni!
23Iake la kibangunni tu inan pemalaran kumua la umboko’ikan PUANG, ba’tu iake la kinii umpemalaran pemala’ ditunu pu’pu’ ba’tu kande dipemalaran sia la kinii umpogau’ pemala’ kasalamaran, melo ke Napapakkanni PUANG tu gau’ iato.
24Apa tonganna kipogau’ te ianna te belanna kiposelang tu apa kebattuan tongan. Kikuami ma’kada: Undinna manii nakuami anakmi lako anakki: Siaparokomi tu PUANG, Kapenombanna to Israel?
25Tang Napadadiraka passaparan PUANG te Yordan lan alla’ki na kamu, to Ruben sia to Gad, tae’ misangbilangan PUANG. Ke susito iatu anakmi la umpasorong-boko’ anakki umpengkaolai PUANG.
26Iamoto angki ma’kada, kumua: Melo ke kipogau’i te: umbangun misa’ inan pemalaran tae’ nala dipoinan pemala’ ditunu pu’pu’ sia tae’ nala dipoinan pemala’ pangrere’.
27Sangadinna dipotanda sa’bi lan alla’ta sia lan alla’na bati’ta undinna, kumua angki pogau’ kamenomban lako PUANG dio oloNa, umpemalaran pemala’ ditunu pu’pu’ sia pemala’ pangrere’ sia pemala’ kasalamaran. Iake susito iatu anakmi undinna tae’mo nala ma’kada, kumua: Tang sangbilangangkomi PUANG.
28Kikuapa ma’kada kumua: Iake undinna nama’kada tu tau iato lako kami sia lako bati’ki susito, la ma’kadakan kumua: Tiromi tu a’ganna inan pemalaranNa PUANG, tu nagaraga nene’ to doloki; tae’ nala dipoinan pemala’ ditunu pu’pu’ sia pemala’ pangrere’, sangadinna la dipotanda sa’bi lan alla’ta.
29La kipatoyang ia dio mai kaleki la umbali PUANG sia sorong-boko’ dio mai PUANG allo iate, ke la umbangunkan inan pemalaran la dinii umpemalaran pemala’ ditunu pu’pu’ sia kande dipemalaran sia pemala’ pangrere’, sangadinna inan pemalaranNa PUANG, Kapenombangki, tu bendan dio tingayo kemaNa.
30Iatonna rangimi to minaa Pinehas sia mintu’ pangulu kombongan sia pangulu pa’rapuanna to Israel, tu nasisolan, tu kada napokada to Ruben, to Gad sia to Manasye, nasangami melo tu iannato.
31Ma’kadami to minaa Pinehas, anakna muane Eleazar lako to Ruben, to Gad sia to Manasye, nakua: Totemo kitandaimo kumua iatu PUANG den tasisolan, belanna tae’ mitang maruru’ lako PUANG. Iamoto milendokanni tu to Israel dio mai kare’dekanNa PUANG.
32Mangkato sulemi tu to minaa Pinehas, anakna Eleazar sia iatu mai arung, dio mai to Ruben sia to Gad, dio mai tondok Gilead lako tondok Kanaan sae lako to Israel, umparampoi tu kareba iato.
33Nasangami to Israel melo tu kada iato, iamoto anna pudi-pudi to Israel tu Puang Matua sia tae’mo lan penaanna la lao ullaoi sia ussanggangi tu tondok nanii to Ruben sia to Gad ma’tondok.
34Nasangaimi to Ruben sia to Gad tu inan pemalaran iato, nakua: Iamote tu tanda sa’bi lan alla’ta, kumua PUANGmo tu Kapenomban.