Alkitab Mobile SABDA
[VER] : [TORAJA]     [PL]  [PB] 
 <<  Yunus 3 >> 

Pa’pakilalanna Yunus dio Niniwe sia buanna pengkaranganna

1Saemi tu kadanNa PUANG tonna ma’penduanna lako Yunus, nakua:

2Ke’de’ko mumale lako Niniwe, kota kapua iato, ammu pa’peissananni tu pa’pakilala, la Kupokadangko.

3Ta’kala ke’de’mi tu Yunus, anna male lako Niniwe, unturu’ kadanNa PUANG, Iatu Niniwe misa’ kota kapua tongan, iatu lua’na kalingkan tallung allo.

4Naparandukmi Yunus ullingkai tu kota iato lan kalingkan sangallo, anna ma’pakilala sia ma’kada nakua: Patangpulopa allona nadisanggang-sanggang tu Niniwe!

5Napatonganmi to Niniwe tu Puang Matua, anna sangra’banan metamba, kumua anna ma’puasa tu tau, pantan ma’pakean karung randuk dio mai kapuanna sae lako bitti’na.

6Iatonna rampomo tu kada iato lako datu Niniwe, mengkalaomi tu datu dao mai isungan kapayunganna, nalossokki tu pakean kadatuanna, anna ma’pakean karung, anna unno’ko’ diong to’ barra’-barra’.

7Metambami tu tau sia ma’kada lan kota Niniwe tete dio parentana datu sola tu mai to kapuana, nakua: La tau la patuoan, la sapi ba’tu domba tang la ullepa’ kande, tang la unde’pa’ riu sia tang la unniru’ uai.

8Sangadinna iatu mai tau sola patuoan la ma’pakean karung sia la napemandui metamba-tamba lako Puang Matua sia la pantan mengkatoba’ dio mai lalan kadakena sia kamasa’garan tu dio limanna.

9Mindara unnissanni den sia manii upa’ natibalik tu Puang Matua sia menassan, anna pasalai penaa tu kasengkean dukkunNa, naurunganni tae’ anta sanggang.

10Iatonna tiromi Puang Matua tu penggauranna tau iato mai, kumua mengkatoba’mo dio mai lalan kadakena, Napenassannimi Puang Matua tu kamandasan, tu Napokada la Naparampo lako tau iato mai, sia tae’mo Napogau’i.


  Share Facebook  |  Share Twitter

 <<  Yunus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel