Dual PanelPa’pakilalanNa Puang Matua lako Yunus
1Apa iatu ianna te mandu umpamasussa penaanna Yunus, naurunganni sengke.
2Massambayangmi lako PUANG nakua: O PUANG, tang mangkamoraka kupokada, tongku lanpa tondokku? Iamoto angku padoloi mallai lako Tarsis, belanna kuissan, kumua iatu Kamu Kapenomban sumpu mamase sia sa’pala buda, kalando pesuka’ sia kapua tu kamasokananNa sia umpenassanni tu diona kamandasan.
3Iamoto, o PUANG, alami tu sunga’ku, belanna kula’biran mate na iatu tuo.
4Ma’kadami tu PUANG Nakua: Sipaturokoka la sengke susito?
5Tassu’mi tu Yunus lako salian kota, anna unno’ko’ dio rampe matallona kota; unggaragammi kalena misa’ lantang inde to dio, namale unno’ko’ dio to’ karionganna, kumua anna tiroi apa la urrampoi tu kota iato.
6Napadenmi PUANG Kapenomban misa’ kayu pallan, tuo dao patunna Yunus, kumua naonganni tu ulunna, la umpakatanai dio mai kamasussanna. Mandumi napoparannu tu kayu pallan iato.
7Apa iatonna masiang pole’, tonna berre’ allo tete dio panglampakNa Puang Matua denmi misa’ ulli’, ungkandei tu garonto’ kayu pallan iato, naurunganni malayu.
8Iatonna dellekmo allo, pakalan Napadenni Puang Matua tu misa’ angin lu dio mai rampe matallo mapannang tongan, anna nanangi allo tu ulunna Yunus, naurungan malayu tu kalena, sia napalaku, anna matemo, sia ma’kada nakua: Kula’biran mate na iatu tuo.
9Ma’kadami Puang Matua lako Yunus Nakua: Sipaturokoka la sengke diona kayu pallan iate? Mebalimi nakua: Sipatuna’ sengke, sakupomatena.
10Ma’kadami tu PUANG Nakua: La mukasayangi te kayu pallan iate, tu tang mukara’ta’i sia tang mupatuo, tu sangbongiri tuo, sia sangbongi dukari anna pa’de.
11Bua’raka Ku la tang ungkasayangi tu Niniwe, kota kapua iato, tu nanii tau la’bi saratu’ duangpulo sa’bu, tu to tang untandaipa umpasisengaranni tu lima kananna na lima kairinna, sia iatu mai patuoan makamban?