Dual PanelPatiro mendeata ma’pengkaruanna, iamotu a’pa’ kareta
1Kubangunan pole’omi tu matangku, kutiroi den a’pa’ kareta tassu’ lan mai alla’na da’dua buntu. Na iatu buntu iato, buntu tambaga.
2Dio tu kareta bunga’na nanii darang balibi, dio kareta ma’penduanna nanii darang bolong,
3dio kareta ma’pentallunna nanii darang busa’ naiatu ma’penna’pa’na’ nanii darang saleko; mintu’nato darang mawatang.
4Mekutanamo’ lako tu malaeka’ kusipa’kadan kukua: Apara battuananna te, puang?
5Mebalimi tu malaeka’ iato lako kaleku nakua: Iate apa iate tassu’ dio mai inanna sikandappi’ Puangna mintu’ lino, nalulako a’pa’ mata angin dao langi’.
6Iatu kareta nariu’ darang bolong male rekke tondok rampe Daanna lu, iatu busa’na male unturu’i, na iatu salekona male sau’ tondok rampe Lo’na lu.
7Tassu’mi tu darang mawatang, morai male ullelei te lino; ma’kadami Nakua: Malemokomi ullelei te lino. Malemi ullelei te lino.
8Mangkato metambami lako kaleku sia ma’kada Nakua: Manassa iatu malenamo rekke tondok rampe Daanna lu, umparapa’ penaangKu lan tondok rampe Daanna lu.
Makota dipasakkaran Yosua; a’ganna Taruk dipa’peissanan
9Saemi kadanNa PUANG lako kaleku, Nakua:
10Tarimai tu pamengan dio mai to dipali’, iamotu dio mai Heldai, Tobia na Yedaya, na iko allo ia bangsiamote mumale, mutama banuanna Yosia, anakna Zefanya, tu nanii ma’bongi to rampo dio mai Babel.
11Alai tu salaka sia bulaan mugaragai misa’ makota, ammu palangnganni ulunna Yosua, anakna Yozadak, tominaa kapua,
12sia ma’kadako lako, mukua: Inde sia tu kadanNa PUANGna mintu’ ma’dandan maritik, Nakua: Manassa la den misa’ muane diganti Taruk. Iamo la tuo diong mai inanna sia iamo la umbangunni tu Banua kabusunganNa PUANG.
13Ondongpi Iamo la umbangunni tu Banua kabusunganNa PUANG sia la umpopake kamala’biran sia la unnisung dao isungan kapayunganna butung to ma’parenta dao isungan kapayunganna. Dio kananna la den misa’ to minaa anna iatu kada situru’, tu umpabu’tu kasalamaran naparitangnga sola duai.
14Na iatu makota iato la torro lan banua kabusunganNa PUANG dipotanda kapengkilalan diona Heldai, Tobia, Yedaya na Yosia, anakna Zefanya.
15Iatu to mambela la sae umbangunni tu Banua kabusunganNa PUANG, ammi tandai, kumua PUANGna mintu’ ma’dandan maritik ussuana’ lako kalemi. Iate iannate la dadi, ke miperangii sia mipalan penaai tu kadanNa PUANG, Kapenombammi.