Dual PanelTae’ gai’na tu ma’puasa, ke tae’i naden menturu’
1Iatonna taun ma’penna’pa’na kadatuanna Darius, tonna allo ma’penna’pa’na bulan ma’pengkaseranna, iamotu bulan Kislew, saemi kadanNa PUANG lako Zakharia.
2Iatu to Betel ussuamo Sarezer sia Regem-Melekh sola tu mai taunna la undaka’ pa’kamaseanNa PUANG,
3sia la mekutana lako tu mai to minaa, tu dio banuanNa PUANGna mintu’ ma’dandan maritik, sia lako mintu’ nabi, nakua: Sipatura’ka la tumangi’ sia ma’puasa lan bulan ma’pellima, susitu kipogau’ ba’tu pirang-pirang taunmo lendu’na?
4Attu iato saemi kadanNa PUANGna mintu’ ma’dandan maritik lako kaleku, Nakua:
5Pokadai lako mintu’ tau lan lu tondok sia lako mintu’ to minaa, kumua: Iammi ma’puasa sia umbating lan bulan ma’pellima sia bulan ma’pempitu lan pitungpulomo taun lendu’na, tonganrokomika ma’puasa belanna Aku?
6Sia iammi kumande sia mangiru’, tae’raka nakamu kalena kumande sia mangiru’?
7Tang susi dukaraka to tu diona mintu’ kadanNa PUANG tu Napa’peissanan nalopian mintu’ nabi dolona, tonna torroipi tau tu Yerusalem sola mintu’ kota untikui sia tonna rapa’pa sia tonna torroipi tau tu padang rampe Lo’na lu sia Padang Merrantenas-
8Lako duka Zakharia sae tu kadanNa PUANG –:
9Inde sia tu kadanNa PUANGna mintu’ ma’dandan maritik, Nakua: La bulo lollongkomi ma’paolai salu sia sipatiroangkomi pa’kaboro’ sia kamamasean;
10sia da mipakario-rioi tu baine balu, pia biung, to sae, sia to bongko sia da misitangnga’ kadake lan penaammi.
11Apa manoka ma’perangi tu tau iato mai, umpatanan palempengna la mangea sia nasissing tu talinganna, da naperangii.
12Sia napamakarra’ tu penaanna susi intan, kumua da naperangii tu pangadaran sia kada, tu Naparampo PUANGna mintu’ ma’dandan maritik lako kalena tete dio PenaanNa, tu nalopian mintu’ nabi dolo. Iamoto napodenni kasengkean kapuaNa PUANGna mintu’ ma’dandan maritik.
13Susitu katangma’perangianna tau iato mai, tonna tambai Puang, la susi dukato tu tau iato mai metamba, apa tae’ Kutananni talinga, kadanNa PUANGna mintu’ ma’dandan maritik.
14Iamoto la Kupamurru’i tu tau iato mai susi angin bara’ lako ma’rupa-rupa bangsa, tu tae’ natandai, sia la disanggang tu tondok naboko’i, naurunganni moi misa’ tau tae’mo lu lako lu dio mai lan tondok iato. Susimoto tu tau iato mai umpopempadang lo’bangi tu tondok maballo.