Dual PanelPopengkadionganni tu penaammi, ke tae’pi nasae tu ukungan
1Timbang meloi lan penaammi, sia mengkatoba’komi, e bangsa tang unnissan siri’,
2ke tae’pi nadipalalo tu apa Napondok Puang – belanna iatu sangallo lendu’ susi ta’pian mettia’ –, ke tae’pi narampoikomi tu kasengkean dukkunNa PUANG, ke tae’pi narampoikomi tu allo kasengkeanNa PUANG.
3Daka’i tu PUANG e mintu’ to umpamadiongan penaanna lan tondok, unturu’i tu atoranNa; daka’i tu kamaloloan, daka’i tu kamadiongam penaa; den sia manii upa’, ammi dipopentilindung, ke allo kasengkeanNa PUANG.
4Belanna iatu Gaza la ditampe sia iatu Askelon la dipopempadang lo’bang, iatu Asdod la diula’i tu tau lan mai, ke tangngai allo, sia Ekron la didu’dukki.
5Upu’ allomi, e mintu’ to dio randan tasik, iamotu bangsa Kreti! Iatu kadanNa PUANG la sae ullaoikomi, e Kanaan, tondokna to Filistin, sia la Kusanggangko, naurungan moi misa’ pa’tondokan tae’mo torro lan.
6Iatu randan tasik la dadi padang kariuan, bubun to manglaa, sia bontong domba.
7Iatu randan tasik la napotaa to Yehuda torronapa, la nasolan tu domba inde to lako anna kande riu, lan lu banuanna to Askelon la nanii torro ma’bongi, belanna PUANG iamo Kapenombanna, la umparinaai sia la umpopembalii tu dalle’na.
8Kurangimo tu pelo’bona Moab sia pebe’sena to Amon, tu nalo’boan taungKu sia tu napokapua penaanna unnea lili’na.
9Iamoto, la lelukraka tuoKu, kadanNa PUANGna mintu’ ma’dandan maritik, Kapenombanna Israel, tonganna iatu Moab la dadi susi Sodom, sia iatu to Amon la susi Gomora, iamotu padang nanii a’da’ sia nanii pangkalian sia, sia padang lo’bang sae lakona. Iatu torronapa tu taungKu, la urrampai tu tau iato mai na iatu sesanna sangpetayanangKu la umpomana’i.
10Iate apa iate la urrampoi tau iato mai pakkanna kamatampoanna, belanna ullo’bo sia umpakapua penaanna unnea taunNa PUANGna mintu’ ma’dandan maritik.
11La masarrang tu PUANG lako tau iato mai, belanna la Napisanni tu mintu’ deatanna kuli’na padang, anna dio oloNa la nanii tukku menomba tu mintu’ bangsa dio mai tondok ma’biring tasik’ pantan lu dio mai inanna.
12Susi dukato tu kamu, e to Etiopia, la natarru’komi pa’dangKu.
13Sia la Nae’te’ tu limanNa unnea tondok rampe daanna lu, anNa sanggangi tu Asyur sia la Napopempadang talo tu Niniwe, anna marangke susi padang pangallaran.
14Inde to dio la nanii torro tu olo’-olo’ sikapan, iamotu mintu’ olo’-olo’, tu biasa torro ma’rampun; la mundan la kayo la membuya dao parande lentongna; perangii umba nakua tu ongngo’na ullendu’i pentiroan; iatu ampangna nalolinni apa tuan, belanna nasanggangi tau tu pareanna kayu arasi’.
15Iamote tu kota kasode-sode bang, tu tang untandai kamasussan, tu ma’kada lan penaanna nakua: Aku mannari, na moi misa’ tae’ tu senga’na. Umba nakua anna mempadang lo’bangmo, sia napoinan kapelayoan olo’-olo’ masuru! Minda-minda lendu’ inde to dio mai la ma’uik-uik untelle-tellei sia nadullu-dullu.