Dual Panel1Ap sa ap enemingmingangge wereg lit iniknisi enepma werehon arimanowen Allah wene niren hiyag isaruk laheyon siyahap tuhup tohon iniknisi enele holtuk lit fano peruk lamuhup.
2Iniknisiyen Allah fam wenggel haruk halug enemingmingangge arimanowen te Kristus apma ambi roho wereg lit niniknisi enele nungge fahet holtul peruk lamuhup fug. Iniknisiyen Allah fam wenggel harukmu Allahn indi enesug lit weregma enemingmingangge arimanowen oho enesukun fano anggolo roho ler eneptuk lamuhup. Obog toho aru hiyag isaruk lit komo eneptuk laruhun.
3Ap misihen Nonowe Yesus Kristus inowen fano ane hiyag nisibahon hikit toho uk fug angge amu-amu ane uruk lit wene niren wenggel harukon hikit toho uruk eleg halug
4ap ino mun ane man ane noluk nahun ulug awelwel taruk angge famen tem toho apeleg ahun hag toho wereg. Ap inowen ori men suwahal ul peruk lit alem yami rurukon ari ouk hag toho ubam atuk. Ouk hag toho ubam atukon ariyen ori fahet ahummu het toho wenggel harukon men ori fam hili roho werehon men ap unubam sibiling-sibiling ane urukon men ori fahet siyag peruk lit wereg.
5Ari roho turuk inap itano inindi elehon hag toho wereg lit we tem toho puk fug angge wene hiyag isaruk laheyon fahet onggo anggolo og nisahupmu tung ninap hag toho welamuhuk peruk.
6Wene hiyag isaruk lit nanggengge tot werehon an men wirim teg peruk ahun ino tem toho tung ahun hag toho welaruhu.
7Kinang tu fam kik waharuk lit tor angge oho walug kik waharukuk fug angge wilip atuk lir oho tor angge oho hilalug wilip amuhuk fug.
8Naruk angge men sum wan turuk angge tot wereg halug tiya nit fahet wirim teg puhuk.
9Tung ninap welamuhuk perukon siyahonen wal isahumu yebangge elma luhur amuhup. Inindimuwen ilamna wereg angge fahet tu helele ari helele peruk ane ariyen ininggareg siyahap taruk lit mako wamburuk hag toho welamuhup.
10Aben uang ninindi pulmu wereg perukon ariyen siyag-siyag ane ap inindimu alem yatuk. Ap winonen te uang inindimu enesehet teg lit yami ruruk latusa ane ariyen Allah wene fanowon embeserusareg inindimu ouk hag toho atisimu it arimano enehummu siyag atisi.
11Hat Allah apma welahenon obog toho ari hambolma hik isahun: Pikir ane eneg wenggel haruk lit Allah fahet tem toho peruk lit Awene mondabi seneg laruhun. Ap hindi enesug lit hindi imbik wamburuk lit yuwag toho welaruhun. Ari roho welaruhuk ulug yami ruruk laruhun.
12Haren wene fano seneg lahenon aru siyahonen taluk habuk oho waharuk isalug hinggareg mondabi holuk welaruhunon ino hinggik ine roho seneg laruhun. Ari fahet Allahn wol haptisimu hat in haptusa sambil ino ap anggolo onolohotman Kristus apma welaruhuk irikin.
13Allahn mun angge man angge werehap tibahon ino Unuk uruk lit, Yesus Kristus ino Pontius Pilatus alukeman Allahn mon Naptisi ulug fag toho ibahon ino Unuk uruk lit hat komo haptuk lahi.
14Wene hiyag hisaruk lahiyon aru il misig siyaha fusuk fug angge fano roho forohoman Yesus Kristus ino inam aruhu.
15Inam aruhu sambil ino o tu sambil ulug Ap misihen eneg uk hag teg lit werehon ino At suwon Indi fanowon misig eneg Oluk teg lit wereg. Ap kinangmonen suwon wereg urukon arimano palimu At wereg. Ap kinangmonen ninikni urukon arimano Inikni At wereg.
16At misig ino war am fug angge seleg teg ambeg weregma ap kinangmon ekeyen pen ha fug teg. Ap kinangmon misihen oho At harisi fugmu ap winonen oho At yet ha fug teg. At mondabi Ine werehon wel turuk lamuhup. Amin.
17Ap enenggengge anggolo kinangma forohowon komo eneptuk lit, "Palimu welahe ulug henewelwel tubat ta fug angge henenggengge eleg am tehon ari fahet anggolo wenggel haruk lamuhup fug. Wenggel haruk lamuhup fugmu Hinikni Allahn mun angge man angge og hisahuwen henehiyeg toho wereg lit At ubam eneg hinindi peruk lamuhup.
18Iren ap unubam fano ane turuk lamuhup. It enenggengge anggolo werehon arimanowen enenggengge eleg inap ler eneptuk lamuhup. Undaman og usul puhupteg fibir eneptuk lamuhup.
19We tem toho mondabi onoluk welamuhuben mun angge man angge fanowon eleg am fuhon andog toho foroho lamuhup," ulug komo eneptuk laruhun.
20Timotius namloho, Allahn hinggikmu emberisiyon ari fuki roho foroho laruhun. Siyahon sabilik-sabilik ane urukon holuk fug angge hambol fil hik isahun. Mun ane man ane obog toho nonoluk teg lahe uruk lit suwahal uruk inap arimano iniraham in am fug.
21Ap winon arimanowen wene fanowon holtusa angge famen nonoluk teg lahe urusa ane ino holtusareg un ke laruk latusa. Ninikni Allah indiyen fet henesug laruhuwen we ita hiyag hisihi.