Alkitab Mobile SABDA
[VER] : [KARO]     [PL]  [PB] 
 <<  Bilangan 10 >> 

Terompet pirak

1Nina TUHAN man Musa,

2"Bahan dua terompet. Terompet e itepa i bas pirak nari gelah ipake guna ndilo kalak Israel pulung ras nuruh berkat nadingken ingan erkemah.

3Adi duana terompet e iembus alu sora nggedang, kerina perpulungen e arus pulung njumpai kam i bas dalan bengket Kemah Perjumpan.

4Tapi adi sada terompet saja ngenca iembus, kepala-kepala terpuk saja ngenca pulung njumpai kam.

5Adi sora terompet gendek-gendek, suku-suku si erkemah arah Timur arus berkat ndarat.

6Adi terompet ersora gendek-gendek pedua kaliken, suku-suku si arah Selatan arus berkat. Sora terompet arus ibahan gendek-gendek tuhu-tuhu nandaken maka kemah arus itadingken.

7Tapi ndilo perpulungen pulung, sora terompet nggedang ibahan.

8Terompet-terompet e arus iembus anak-anak Harun, imam-imam e. Peraturen-peraturen si arah teruh enda pe arus ikutken i bas kerina paksa-paksa si reh enda.

9Adi kam sangana erperang i bas negerindu, mpertahanken dirindu i bas musuh si nerang kam, embus lah terompet enda jadi sada tanda erperang. Aku, TUHAN Dibatandu, si nampati ras mulahi kam i bas musuh-musuhndu nari.

10Bage pe i bas paksa-paksa keriahen i bas Pesta-pesta Bulan si mbaru ras pesta-pesta agama si debanna arus iembusndu terompet e tupung ibahanndu persembahen tutungen ras persembahen-persadanndu. Adi bage Aku si nampati kam. Aku kap TUHAN Dibatandu."

Bangsa Israel mindahken inganna erkemah

11I bas wari pedua puluhken bulan si peduaken kenca bangsa Israel dua tahun dekahna nadingken Mesir, nangkih me embun si lit i babo Kemah Perjumpan e.

12Emaka ibenaken bangsa Israel perdalanenna si ndauh ndarat i bas gurun pasir Sinai nari. Embun e seh i bas sada ingan si la ingani jelma, Paran gelarna, janah ngadi ia i je.

13Kenca reh perentah TUHAN arah Musa, mulai me kalak Israel erdalan.

14Janah tep-tep kali ia pindah uruten si erdalan tetap seri. Kalak si i teruh bendera perpulungen si ipinpin suku Juda erdalan arah lebe, erterpuk-terpuk. Si minpinsa eme kap Nahason anak Aminadap.

15Netanel anak Suar minpin suku Isakar,

16janah Eliap anak Helon minpin suku Sebulon.

17Kenca bage Kemah e ibongkar, jenari terpuk Gerson ras Merari, si maba Kemah e, mulai berkat.

18Kenca bage, kalak si i teruh bendera perpulungen si ipinpin suku Ruben mulai ka berkat erterpuk-terpuk. Si minpinsa eme kap Elisar anak Sedeur.

19Selumiel anak Surisaddai minpin suku Simeon,

20janah Eliasap anak Rehuel minpin suku Gat.

21Kenca bage suku Lewi i bas terpuk Kohat berkat maba barang-barang si badia e, janah adi nggo seh ia i bas ingan erkemah si mbaru, Kemah nggo dung ipajekken.

22Seterusna, kalak si i teruh bendera perpulungen si ipinpin suku Eperaim mulai ka berkat erterpuk-terpuk. Si minpinsa eme kap Elisama anak Ammihut.

23Gamaliel anak Pedasur minpin suku Manase,

24janah Abidan anak Gideoni minpin suku Benyamin.

25Kedungenna, kalak si i teruh bendera perpulungen suku Dan, si ertugas njagai perpulungen e kerina arah pudi, mulai ka berkat erterpuk-terpuk. Si minpinca eme kap Ahieser anak Ammisaddai.

26Pagiel anak Ohran minpin suku Aser,

27janah Ahira anak Enan minpin suku Naptali.

28Bagenda me dage uruten perdalanen, erterpuk-terpuk, adi berkat kenca bangsa Israel mindahken inganna erkemah.

29Ikataken Musa man silihna, Hobap anak Jetero, kalak Midian, nina, "Ate kami berkat ku ingan si ikataken TUHAN si AteNa IberekenNa man kami. Nggo Ia erpadan erbahan si mehuli man Israel, emaka marilah ras kita, janah banci irasken kami kebayaken kami e ras kam."

30Erjabap Hobap nina, "Aku mulih saja gia ku kutangku."

31"Ula min itadingkenndu kami," nina Musa. "Kam itehndu i ja kami banci erkemah i bas taneh si mesawang e, janah banci kam si nuduhken dalan man kami.

32Adi nggit kam berkat ras kami, ibereken kami pagi baginndu i bas kerina pasu-pasu si ibereken TUHAN man kami."

Berkat bangsa e

33Tupung bangsa e nadingken Sinai, deleng TUHAN e, erdalan ia telu wari dekahna. Peti Perpadanen TUHAN tetap leben asa kalak ndai guna ndatken sada ingan erkemah man bana kerina.

34Adi pindah ia i bas tep-tep ingan erkemah nari, embun TUHAN tetap i babona suari.

35Tupung Peti Perpadanen e ipeberkat, emaka nina Musa, "Tedis lah, o TUHAN, kerapken imbang-ImbangNdu janah bahan lah maka lompaten kerina kalak siernembeh ate man BaNdu!"

36Janah adi ngadi kenca Peti e nina Musa, "Mulihlah, TUHAN, ku Israel si meribu-ribu keluarga teremna."



 <<  Bilangan 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel