Alkitab Mobile SABDA
[VER] : [SIMALUNGUN]     [PL]  [PB] 
 <<  Kolose 1 >> 

Tabi ni Apostel Paulus

1Hun bani si Paulus, apostel ni Kristus Jesus marhitei rosuh ni Naibata, ampa si Timoteus sanina in,

2marayak halak na mapansing na i Kolosse ampa sanina na porsaya bani Kristus in, idop ni uhur ma bani nasiam ampa damei humbani Naibata, Bapanta in.

Tarima Kasih ni Apostel Pasal Sidea ampa Tonggoni

3Mangkatahon tarima kasih do hanami tongtong bani Naibata, Bapa ni Tuhanta Jesus Kristus, ibagas tonggonami bani nasiam,

4ai ibogei hanami do pasal haporsayaon nasiam bani Kristus Jesus ampa holong ni uhur nasiam dompak haganup halak na mapansing in,

5halani pangarapan, na dob pinasirsir bani nasiam i nagori atas. Domma ibogei nasiam hinan pasal in marhitei hata hasintongan in, in ma Ambilan Na Madear in.

6In ma na dob adong bani nasiam, age i sab dunia on; na marbuah do in anjaha lambin marbanggal, songon na bani nasiam, mulai humbani panorang, dob ibogei nasiam anjaha itanda nasiam idop ni uhur ni Naibata ibagas hasintongan.

7Sonin do iguruhon nasiam humbani si Epapras, hasomannami juakjuak, na hinaholongan, ia do parugas hatengeran ni Kristus mangkopkop nasiam,

8anjaha ia do patugahkon bannami holong ni uhur nasiam ibagas Tonduy.

9Halani ai, mulai humbani panorang dob ibogei hanami in, seng maronti hanami manonggohon nasiam anjaha mangindo, ase igoki bani nasiam panandaion pasal rosuh ni uhur-Ni, marhasoman sagala hapentaran ampa pangarusion partonduyon,

10ase marparlahou na talup nasiam bani Tuhan in, gabe harosuh tumang Bani, marbuah nasiam bani sagala horja na madear, anjaha martambah bani nasiam panandaion pasal Naibata,

11gabe ipargogohi tumang nasiam domu hubani gogoh ni hasangapon-Ni in, mangkorhon hasabaron ampa hatahanon marhasoman malas ni uhur,

12martarima kasih bani Naibata, na dob patalupkon nasiam marparbagianan bani siteanon ni halak na mapansing ibagas haliharon.

13Ia do na paluahkon hita humbani kuasa ni hagolapan, anjaha ipapindah do hita hubagas harajaon ni Anak na hinaholongan ni uhur-Ni in.

14Ibagas Ia do adong banta haluahon, ai ma hasasapan ni dousa.

Hatimbulon ampa Horja Pardearan na Binahen ni Kristus

15Anjaha Ia do usihan ni Naibata na so taridah in, na parlobei tubuh humbani sagala na tinompa,

16ai marhiteihon-Si do itompa haganup, na i nagori atas ampa na i tanoh on, na taridah pakon na so taridah, atap paratas pe ai atap harajaon atap gomgoman atap kuasa. Haganupan ai itompa marhiteihon-Si anjaha marhadoban hu Bani.

17Parlobei do Ia humbani haganup, anjaha ganupan in marhiteihon-Si do torus adong.

18Ia do ulu ni badan in, in ma kuria in. Ia do parmulaan, na parlobei tubuh humbani na matei, ase Ia na parlobei bani haganup.

19Ai ibagas Ia do itontuhon Naibata marianan hagogok-Ni in,

20anjaha padear haganup marhiteihon-Si bani diri-Ni, na i tanoh on age na i nagori atas, dob ipajongjong damei marhitei daroh-Ni na madurus in bani hayu pinarsilang.

21Anjaha nasiam na daoh hinan anjaha munsuh marhitei paruhuron ampa horja hajahaton,

22ipadear Jesus nuan ibagas daging hajolmaon-Ni, marhitei parmatei-Ni, laho pajongjongkon nasiam ase pansing, lang dong sihataon anjaha sipinsangon i lobei-Ni.

23Asal ma marianan nasiam jonam anjaha toguh ibagas haporsayaon, anjaha lang ra mosor humbani pangarapan na binogei nasiam ibagas Ambilan Na Madear na binaritahon bani haganup na tinompa, na i toruh ni langit, anjaha ahu, si Paulus, do gabe siparugas bani in.

Sitaronon ampa Horja ni si Paulus Mambalosi Kristus

24Malas do uhurhu nuan ibagas sitaronon mangkopkop nasiam, anjaha ibagas dagingku hugoki na so jumpah ope bani na tinaron ni Kristus, laho mangkopkop angkula-Ni, in ma kuria in.

25Na dob gabe siparugas-Ni in do ahu, domu hubani jabatan, na pinadas ni Naibata bangku halani nasiam, laho padaskon hata ni Naibata,

26in ma rusia in, na ponop marabad-abad ampa marsundut-sundut; tapi sonari ipatalar do bani halak na mapansing-Ni in.

27Hu bani sidea do pabotohkonon ni Naibata surung ni hamuliaon ni rusia on, i tongah-tongah ni sipajuh begu-begu, ai ma, Kristus ibagas nasiam, pangarapan in bani hasangapon.

28Ia do ibaritahon hanami, ipaingat anjaha iajari hanami do sagala jolma pasal sagala hapentaron, laho pajongjongkon ganup jolma gokan dear ibagas Kristus.

29Halani in do ase loja anjaha maruntol ahu, domu hubani hagogohon-Ni na marhorja gogoh ibahen ibagas ahu.



 <<  Kolose 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran