Dual Panel1Sugane yé bok yo mone nuk sukdu subot ye Galilea ge bok yo gato gre suge mo bot wa un Yefun Allah. Ye Galilea gre suge saresa, Pilatus syogat yesukmise gu án bok ne wé.
2Yefun Yesus jam ye ne bi sukdu, orete Yefun Yesus ki do, "Nin nut do ye Galilea bok gato yé gu ne, ye Galilea ne ben sukibit mwa wai kadit yé mwa gato kem mo Galilea anato yesukmise gu án wé ne bado?
3Sane nde re. Ji ki sare do, nin yo kwet kadit sukibit gato nin ben ne nde, bere nin waii kwop sato yé ne dom.
4Sane dom, men nut subot yetu ge musyu dik sop munggwo gato nu syu é ma gwa kwop mo Siloam ne. Nin nut do yé ne ben sukibit mwa wai kadit ye yi neya gato kem mo Yerusalem ne bado?
5Sane nde re. Ji ki sare do, nin yo kwet kadit sukibit gato nin ben ne nde, bere nin waii kwop sato yé ne dom."
6Orge Yefun Yesus gwat sukamno dik yo sare do, "Yetu ge dik yo jan nak ke dik mo nggwe gur mit. Kam dik yo ete ye ne ma me nak ne bo mó bado bo yo mo nde.. An do ma sa, an yo ku nak bo yo mo nde.
7Sane ye ne ki nai ye gato mewa nggwe ne do, 'Tahun bok yo ji ma meret nak bo ware, ji yo ku nak bo yo mo nde. Men jan nak ré kom wa suma ne? Sa ndo sa, men gwa wé sor.'
8Sarewo ye gato mewa nggwe ne ki do, 'Yenggras, men misyar nak ré kom tahun dik yo o et. Bere ji gut es kadit i-ke, ete ji bare burka gato ndo mo i-ke dom.
9Men me do tahun dik ne ma, bo it yo, ndo it, men misyar dakai kom sor. Wo men me do yo bo nde yo, men gwa nak ne wé sor.' "
10Kam Sabat, ye Yahudi bi kam sye, ete Yefun Yesus duno nje mo ye Yahudi bi nu ari dik yo.
11Mo yé mwa ne, nggon dik yo gato yenggwak ben, nggon ne i sor kom mo tahun musyu dik sop munggwo. Nggon ne, yenggwak syat an nyoran kwek. Nggon ne yo ti ri ndo nde.
12Yefun Yesus sokme nggon ne sa, Yefun Yesus kendo nggon ne ma mo yé mwa gwem, ete An ki nai nggon ne do, "Im o, Ji ben nan ge kadit nan bi suki ré, nan nyoran ri satu it anare."
13Orete Yefun Yesus ak An syim mo nggon ne. Yefun Yesus do ak An syim mo nggon ne sa, nggon ne nyoran ri satu it anane, orete mom un Yefun Allah.
14Yefun Yesus ben nggon ne ge su ye Yahudi bi kam sye, kam Sabat, sane yekwesu mo ye Yahudi bi nu ari ne, yekwesu ne maskwa Yefun Yesus. An ki do, "Ari dik bi kam mumat rek wa men ben suk, men ben su kam Sabat nde. Sane nin iwa nin ge kadit nin bi suk-i ne yo, kam mumat ne tep wai mo re, wo nin ma su kam sye sare nde."
15Orge Yefun Yesus ki do, "Nin ki su nin syokwet sor re, nin yo benbot nin bi sukduno-i nde. Nin dom, ben suk su kam sye. Nin kadik-kadik sombok nin bi suksi, nin gwat mu meret syur su kam sye, fe?
16Nggon ré, Abraham bi dat, yenggwak ben mom i sor kom mo tahun musyu dik sop munggwo. Ndo sa, Ji sombok mom wé kadit yenggwak gato rai mom su kam sye ré."
17Yefun Yesus ki An bi sukdu ne sa, ye gato maskwa Yefun Yesus ne damen ndo nde, sarewo yé mwa nut do suk gato Yefun Yesus ben ne, suk mwa ne ndo wai o re.
18Or o Yefun Yesus ki do, "Yefun Allah jowa men yetu tepsu men bi yekwesu sa u ne? Ji ki rer subot Yefun Allah bi rus-i sa u ne?
19Yefun Allah bi rus-i tepsu kwe nam gro mo sukamno ré. Ye yo nai kwenam gro dik yo ete jan mo bi nggwe. Kwe nam gro ne kom sye wai o re. Kwe namke ne sye sor ndam ma tom mo i-guk."
20Yefun Yesus ki o do, "Ji ki rer subot Yefun Allah jowa men yetu tepsu men bi Yekwesu sa u ne?
21Sare, Yefun Allah bi rus-i tepsu bibit roti mo sukamno ré: Nggon ge dik yo nai bibit roti wokgan ete nggon ne karwet su tepung sak dik, sane sor, tepung mwa ne it sino."
22Yefun Yesus mu mo Yerusalem saresa, Yefun Yesus mubot kampung si kota mwa mo os, Yefun Yesus duno nje gato kem mone.
23Yefun Yesus duno nje mone sa, yetu ge dik yo ndo mo Yefun Yesus do, "Yenggras, bere yetu ge bok yo sor ete sok mo Yefun Allah bi rus-i wé kadit bot gesyos bado?" Sane Yefun Yesus ki nai yé mwa mone do,
24"Nin werwa nin sok mo Yefun Allah bi rus-i tepsu nin werwa nin sokbot nusyo gato buk wa nin. Ji ki sare do, bere yé mwa werwa sok mo Yefun Allah bi rus-i ware, ye ne yo ku nusyo gato nggwot ne nde re.
25Nusyo ne kak tó, sarewo yenggras gato bi nu ne ti ete syimwa nusyo krat yo, yenggras do ben sane yo, bere nin ma ti mo nusyo de nden, nin ki do, 'Yenggras, nan kak nusyo wa men sok et.' Orge bere yenggras ne ki nai nin do, 'Ji jam nde nin, nin mu kadit u ne?'
26Bere nin waii ki o do, 'Men si nan git sugit sino mó re. Yenggras nan ma nan duno men mo men bi kota mó re.'
27Yenggras ne ki o do, 'Ji jam nde nin re, nin yé gato ben sukibit, nin mu kadit Ji tom!'
28Bere nin me Abraham e, Isak e, Yakub sisu yenabi mwa ne sino mo pe gato Yefun Allah jowa men tepsu men bi Yekwesu. Sarewo nin dakai, bere Yefun bare nin mu mo nden kadit re. Sane bere nin wo ndo nde, nin nderku nin dakai mone.
29Bere yetu mwa mo bur ré iwedewe, ye wis mwa ne sino ma git sugit mo pesta sye mo pe gato Yefun Allah jowa men tepsu men bi Yekwesu.
30Sane yé mwa gato yé bes gum kok su ré yo, bere kam sari ne ma Yefun Allah is yé ne gum wé, án gum yo mo nde re. Sane dom yé mwa gato su ré án gum yo mo nde yo, bere Yefun Allah bes yé ne gum kok mone tó."
31Sugane ye Farisi bok yo ma ku Yefun Yesus, ete ye Farisi ne ki nai Yefun Yesus do, "Nan kem more nde, Nan mu mo pe yi kadit ré, we Herodes mitwa gu Nan kwop wé."
32Yefun Yesus ki nai ye Farisi ne do, "Nan mu ki nai ye gato meret os mwa tepsu ndar krok ne do, 'Su ré it yo, Ji ben ye gato i ne ge, Ji syun semda wé kadit ye gato semda ben ne, Ji ben suk ne tó, wo kam we rek o ete suk gato Ji ben ré tut mone.'
33Ji kwop o Ji mbau o, Ji mu su, Ji mu mo Yerusalem sor. Ji ben Ji bi suk-i su kam re, ik o kam we rek ete or mone. Ji mu mo Yerusalem it anare, we mo Yerusalem ne pe gato yé gu yenabi mó. Sane Ji mu mone dom, pe yi yo tepsu wa yé gu yenabi mo nde."
34Yefun Yesus ki do, "Kamapa! Nin yé gato kem mo kota Yerusalem, nin gu yenabi kwop, nin am ye gato gwat Yefun Allah bi suktaru ma ne su jok. Kapre nin gu yenabi kwop sane o, Ji iwa Ji mewa nin tepsu ndam kokor mewa bi gan mo i desnak, sarewo nin bariwa re.
35Sane bere Yefun Allah misyar nin re. Bere Yefun Allah yo kem mo bi nu sisu nin mone o nde. Sane kadit kam ré, Ji ki sare do, bere nin yo ku Ji o nde, sane sor, tepsu kam gato nin ki do, 'Ye gato Yefun Allah syogat ma ré, Yefun Allah ben sukndo su An et!' "