Alkitab Mobile SABDA
[VER] : [ABUN]     [PL]  [PB] 
 <<  Lukas 12 >> 

1Ye Farisi si yeguru agama ben bi suk-i sa, yé mwa ye re sum mone wa án me Yefun Yesus. Yetu ge ribu bok yo, yé mwa ne ti buk mo yu. Sane Yefun Yesus yo ki sukdu nai yé mwa ne nde tó, Yefun Yesus ki nai An bi pakon do, "Nin mewa nin nggwa kadit ye Farisi bi bibit roti-i. Nin mewa nin nggwa subere nin ben suk tepsu ye Farisi ne nde. Ye Farisi duno nje su án syokwet sor, wo án yo benbot án bi sukduno nde.

2Yefun Allah jam suk mwa ne sino, sane suk gato yé gurik su ré, ri ma bere bor wa yé mwa jam. Suk gato ye dumik wa yu waré, bere yé mwa jam or re.

3Sane suk gato yé ki nai yu mo pe gato ndendu bere bor wa yé mwa jam su nombrak. Sane dom, suk gato ye yo tom mo ye deyo dabe mo gumwak mit, bere yé ki sye wa yé mwa ne sino jam."

4"Ji bi yesyim, Ji ki sare do, nin nyuwa ye gato nggiwa gu nin da kridek kwop ne nde. Ye ne gu nin da kridek kwop sor, wo an yo nggiwa ben suk yo o nde.

5Wo Ji ki rer subere nin jam ye gato nin nyuwa. Nin nyuwa Yefun Allah et. Yefun Allah sa, nggiwa gu nin da kridek kwop, orete Yefun Allah nggiwa bare nin da gesyos mo bot gesyos dom, wo yetu nggiwa gu men da kridek sor re. Sane, Ji ki sare do, nin nyuwa Yefun Allah sor re.

6Yé gwat ndam syik ge mek wa yé so, bere ye ku sugum det we sor re. Sarewo ndam syik ne, Yefun Allah yo misyar nde, wo Yefun Allah mewa ndam ne sor.

7Sane, mo nin dakai dom, nin sugo mwa ne sino, Yefun Allah newa re. Sane nin nyuwa suk daret nde. Yefun Allah bi sukjimnut sye kas subot men yetu ne ndo nde, sane Yefun mewa nin wai kadit ndam mwa ne o re."

8Yefun Yesus ki do, "Ji ki sare do, ye gato ki mo yé mwa gwem do, an tepsu dik su Ji, gato Yetu bi Pa, bere Ji waii ki sane nai Yefun Allah bi malaikat mwa ne.

9Wo ye gato rewa Ji mo yé mwa gwem, bere Ji waii rewa ye ne mo Yefun Allah bi malaikat gwem dom. Sarewo ye to da jam Ji gum sarewo an bambrai wa ki Ji gum mo yé mwa gwem, sane bere Yetu bi Pa waii rewa ye ne gum mo Yefun Allah bi malaikat gwem.

10Ye gato ki sukdu kwa yo ibit ket Yetu bi Pa yo, bere Yefun Allah misyar sukibit ne, An yo nutbot o nde. Wo sukibit gato ye kiket Yefun Allah Gen, bere Yefun Allah yo misyar nde, wo Yefun Allah maskwa ket ye ne pe sor.

11Yé gwat nin mu mo ye Yahudi bi nu ari e, mo yesukmise, mo yepasye gwem wa yé ndobot nin mone yo, nin jimnot teker subot suk gato nin ki nai nje mone nde. Nin nokwa teker nde,

12we bere su kam gane it yo, Yefun Allah Gen duno nin su suk gato nin ki nai nje mone re."

13Yetu ge dik yo mo yé mwa ne ki nai Yefun Yesus do, "Yeguru, Nan syogat ji bi nji syo men bi ai bi sukrok napyo nai ji et."

14Yefun Yesus ki nai ye ne do, "Je u anato bes Ji tepsu yepasye wa kibot nin ka we bi suk-i ne? Je u anato bes Ji tepsu yegweswai wa Ji syo nin ka we bi sukrok nai yu ne?"

15Orge Yefun Yesus ki nai yé mwa gato mone do, "Nin frawa nin nggwa et! Nin mewa nin nggwa subere nin gro sye wa suk mwa neya mo bur ré nde, we men do ku suk mwa ne yo, suk mwa ne yo ós men kem ndo nde."

16Orge Yefun Yesus gwat sukamno sare do, "Yekaya dik yo, an jan sukjan mo an bi bur det. Sukjan ne do kri sa, yekaya ne nai sugit mwa ye re.

17Sane, yekaya ne nut mo an syidem do, 'Ji bi nu wa ji grem suk mwa ré yo tep nde, sane ji ben suma ne?'

18Orge an bi sukjimnut mó do, 'Ndo sa, ji tarak ji bi nu wokgan ré wé, ete ji nggo nu sye wai o, subere ji grem ji bi sugit mwa ré si ji bi suk mwa kwop mone.'

19Yekaya dakai du mo an dakai do, 'Bere ji kem ndo it. Ji ku suk mwa yé re. Tahun bok yo o ete sugit ré yo or nde. Sane ji kem not it are. Ji yo ben suk o nde. Ji git, ji kamo, ji sem sor re.'

20Sarewo Yefun Allah ki nai ye ne do, 'Nan jimgon, su noru ré it yo, nan kwop it are. Sane bere je u anato ku nan bi suk mwa gato nan sum ré ne? Bere nan bi suk mwa ne sok mo ye yi.' "

21Sane Yefun Yesus ki do, "Ye gato sum suk mwa mo bur ré wa an dakai, wo an yo ben Yefun Allah bi suk-i nde, bere Yefun Allah waii ki do, ye ne jimgon dom."

22Orete Yefun Yesus ki nai An bi pakon o do, "Sane, Ji ki sare do, sugit wa nin git ne, suk gato nin mitmo wa nin kem mo bur ré, nin nutbot teker eta nde. Sane dom, san wa nin it mo nin kaim, nin nutbot teker eta nde.

23We sare, men kem mo bur ré anato ndo wai kadit sugit. Sane dom, men kaim anato ndo wai kadit san.

24Men me mo ndaok. Ndam ne yo jan suk nde, ndam yo sum sugit mo bi bat nde, ndam bi nu sye wa án grem sugit yo mo nde, wo Yefun Allah mewa ndam ne re. Yefun bi sukjimnut sye wai subot men yetu, sane bere An mewa nin wai kadit ndam ne o re.

25Sane nin nutbot suk mwa teker eta, bere ós nin kem wikgan yo o mo bur ré bado?

26Nin nutbot suk mwa teker sane, suk ne yo ós nin kem wikgan yo o mo bur ré nde. Saneyo, nin nokwa suk yi neya teker wa suma ne? Suk ne yo ós nin nde.

27Nin me es u gato dakai kom. Es ne yo werwa fro án bi san nde. Yeraja Salomo da it san gato ndo yé, sarewo Ji ki sare do, Salomo yo it san gato ndo wai kadit es u ne nde.

28Yefun Allah syo es u tepsu san wa es gato dakai kom ne. Es ne kom su kam ré, sarewo bere ik ete es ne te, orete yé syo bot git wé re. Yefun bi sukjimnut sye wai subot men yetu, sane bere An mewa nin su san gato ndo wai kadit ne o re. Sane nin onyar yo kem ri mo Yefun nde wa suma ne? Bere Yefun Allah syo suk gato nin mitmo ne.

29Sane nin bi sukjimnut sye mo suk gato nin git si suk gato nin da ne nde. Nin nutbot suk ne teker eta nde.

30Yé mwa ne sino gato jam nde Yefun mo bur ré bi sukjimnut sye mo suk mwa ré petok sor, wo nin bi Ai Yefun Allah jam do nin mitmo suk ne.

31Sane nin bi sukjimnut sye mo suk mwa ne nde, wo nin bi sukjimnut sye wa nin jammo Yefun Allah tepsu nin bi Yekwesu, ete nin ben sukndo tepsu Yefun mit sor. Sane bere Yefun syo suk mwa gato nin mitmo ne nai nin dom re."

32"Nin yé gato yo mwa nde, nin nyu nde, nin anato Ji bi suksi. Bere nin bi Ai mo gu bes nin tepsu yekwesu gato ós An wa jowa An bi suk mwa ne sino.

33Sane nin mu nin so nin bi suk mwa gato nin ku ne, orete sugum gato nin ku mone nin syo nai ye gato yo ku suk yo mo nde, sane bere nin ku suk mwa mo gu. Nin do ben sane, bere tepsu nin grem nin bi suk mwa ne mo gu, tepsu nin bok mbre mo sun bafar gato kem to kapyo. Nin ku suk mwa mo gu ne, suk mwa ne kem pe, yo or nde. Sane dom ye yo ku os wa sok mo gu ete gitsi nin bi suk nde. Kundun yo ku os wa ben suk ne ibit dom nde.

34Nin ben Yefun bi suk-i, nin grem suk mwa mo gu sane, we pe gato nin bi suk mwa kem mone yo, bere nin bi sukjimnut sye mone dom."

35"Nin fro nin nggwa wa nin ben Yefun bi suk-i et. Nin it nin bi san, nin mewa nin bi kak sawe kak ne te.

36Sato yenggras dik yo bi pakwerut ge bok yo eswa án bi yenggras satu kadit yé konwa ye we kra yu. Pakwerut ge bok ne kem su án fra ete eswa án bi yenggras satu ma. Yenggras ne do satu ma yo, an do nggo nusyo yo, pakwerut ne ma kekro ete kak nusyo wa án bi yenggras.

37Pakwerut ne bi yenggras do ma ku pá ne yo, pá gato mewa an bi nu tepsu yenggras syogat pá ben ne bere pá ku sukndo mone. Suk gato Ji ki ré suksangge anare, bere yenggras ne win an bi san, yenggras syogat an bi pakwerut ne kem, orete yenggras gwat sugit ma wa pakwerut ne git.

38Kapre yenggras ne ma su noru miten, yenggras do ku pá gato mewa nu ne eswa pá bi yenggras satu ma yo, bere pá ne ku sukndo mone.

39Sane nin napawa suk ré et. Ye gato bi nu jam do, ye gato syimsi suk ma su noru ne yo, bere an eswa yesyimsi ne ete yesyimsi ne yo ku os wa sok mo nu ne nde.

40Sane dom, nin fro nin nggwa petok sor, we bere Yetu bi Pa ma su jam gato nin jam ri nde."

41Petrus ki do, "Yenggras, Nan ki gado subot ye gato fro an nggwa wa an bi yenggras satu ma ne te, Nan gwat sukamno ne wa men bado, Nan gwat sukamno ne wa yé mwa ne sino, e?"

42Yefun Yesus ki do, "Pakwerut gato jam suk mwa, ete ben bi suk-i ri-roi tepsu bi yenggras mit ne te, men jam pa ne sa u ne? Pa ne ben bi suk-i sa u ne? Pa ne anato tepsu pa gato yenggras bes tepsu yesu wa yenggras bi pakwerut ne sino. Pa ne mewa pakwerut bok neya sisu ndo, pa syo sugit tep wa pakwerut mwa ne git sino.

43Pakwerut ne bi yenggras do ma ku pa ne yo, pa gato benbot suk gato bi yenggras syogat pa ben ne, bere pa ku sukndo mone.

44Suk gato Ji ki ré suksangge anare, bere yenggras ne bes pa ne wa mewa yenggras ne bi suk mwa ne sino.

45Wo sato pakwerut ne nut mo pa dakai do, 'Ji bi yenggras, nam ete bere ma,' ete pa ne kwam pakwerut yi ne daret e, pa ne kwam nggon kwerut mo nu ne dom, ete pa git sugit sor, pa da nau, an yenau bu e ne.

46Orete pa bi yenggras satu ma su mit, sisu kam gato pa jam ri nde, si jam gato pa jam ri nde. Sane yo, bere pa bi yenggras sap pa kaim wip ndo nde, orete yenggras syun pa ne mu ngga mo pe gato ibit, mo pe gato ye gato jam nde Yefun ku sukye mone.

47Pakwerut gato jam suk gato an bi yenggras mitwa an ben ne, sarewo pa ne yo fro nggwa wa pa benbot nde yo, bere pa ne ku sukye ndo nde. Pa gato yo benbot suk gato an bi yenggras syogat an ben ne nde yo, bere an bi yenggras syogat yé gu pa ndo nde.

48Wo pakwerut gato jam nde suk gato an bi yenggras mitwa an ben ne, ete pa ne yo ben suk tepsu nde, bere yé kwam pa tep yi. Pa gato jam suk mwa, bere pa bi yenggras syogat pa ne ben suk mwa. Sane dom, pa gato jam suk mwa teker, bere pa bi yenggras syogat pa ben suk mwa teker."

49"Ji ma mo bur ré wa Ji gwat bot gato git suk mwa. Bere yé wat yu, yé maskwa yu mo Ji. Ji iwa bot ne ru it.

50Bere Ji ku sukye ndo nde, bere yé gu Ji kwop. Ji kwabom dek subot sukye ne kom mo pe gato or mó.

51Te, nin nut do Ji ma mo bur ré wa Ji ben yetu kem ndo su yu bado? Sane nde, Ji ki sare do, Ji ma wa Ji ben yetu kem ndo su yu nde, wo Ji ben yé maskwa yu sor re.

52Kadit kam ré yo, sato yetu ge mek gato kem mo nu dik, bere ge mek ne maskwa yu mo Ji, ge gri maskwa ket ge we, ge we maskwa ket ge gri.

53Ye gato kem mo nu dik ne, bere pa bi ai maskwa ket bi gan, pa yebris maskwa ket bi ai, pa bi im maskwa ket bi mam, pa donggon maskwa ket bi im, nggon maskwa ket bi nyam, nggonkra maskwa ket bi om. Bere yé maskwa yu ete yé wat yu mo suk gato Ji ben ne."

54Yefun Yesus ki nai yé mwa mone do, "Nin me nyotem it tak de ket, orge nin ki do, nogi it are. Sangge, sugane nogi dom.

55Sane dom, nin me nobu nyot kas kadit nden ma ti, nin ki do, ré ne, nokro it anare. Sangge bere nokro dom.

56Nin ki nin bi sukdu nin syokwet wik sor re. Nin watbot bur ré si gu nim ne, nin me nyotem e, nin me nobu ete nin jam suk gato bere bor. Sarewo suma ben anato nin watbot suk gato Ji ben ré, ete nin jam nde suk gato bere bor ne?"

57"Nin nai sukjimnut gato sangge nde wa suma ne? Nin nutbot suk sisu ndo et.

58Ye yi do maskwa nan, ete werwa nan bi denda kit an, orete an gwat nan mu mo pe gato yepasye kibot sukmaskwa ne yo, sa ndo sa nin ka we yo mu kom mo pe ne nde tó, nan si an kibot sukmaskwa ne or wé mo os miten. Wo nan yo ben sane nde yo, bere ye ne gwat nan kom mo yepasye gato kibot sukmaskwa ne. Bere yepasye ne syo nan mo yesukmise syim, ete yesukmise gwat nan mu sok mo sel.

59Ji ki sare do, bere nan kem mo sel mit sane sor, nan bi denda kit ye ne orete nan syesyar."


  Share Facebook  |  Share Twitter

 <<  Lukas 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran