Dual Panel1Dolu pemmai'di ma'tula' Puang Alataala pano di neneta nalombung senabiang, anna mai'di lalanna ang napake ma'tula' pano.
2Ampo' tempo dinoa ang marungku'mi allo katämpä'anna, napa'tula'iingkea' yaling di Änä' Kalaena. Ungngolai inde Änä'na, langi' anna lino natampa Puang Alataala. Anna nadandi pano yato di Änä'na ingkänna aka-akanna la namana'ing.
3Dianto ang mampalanda'ingkea' kamatandeanna Puang Alataala. Pengkerona anna kakuasaanna sinnoa siang pengkerona anna kakuasaanna Puang Alataala. Dianto ang ungkuasai anna undakai ingkänna-ingkänna siamo ungngolai bahtakaranna ang ma'kuasa. Puhanna umbasei hupatau di hao mai di dosannaii, ya' le'ba'mi dai' anna mohko'i yaho di tando kuananna Puang Alataala yaho di suruka.
4Ohko'ang ang natahimbo yato Änä'na malängkä' puha nei' andana ohko'anna ingkänna malaeka', aka' yato sanga ang nabea Puang Alataala londo puha andana yato sanga ang nabea pano diii.
5Dai aha natula' Puang Alataala pano di moi poro la mesa malaeka' sinnoa yato ang natula' pano di Änä'na naoatee, "Dionto Änä'ku. Mengkalao dinoa umpoambemä'." Datuke' aha natula' Puang Alataala didiona malaeka' sinnoa yato ang natula' didiona Änä'na naoatee, "Kodi' la napoambe anna Dia nei' la kupoänä'."
6Anna tahpana Puang Alataala unsuo Änä' uluana mentama inde di lino, ma'tula'mi naoatee, "Ingkänna malaeka'ku pahallu umpenombai yato Änä'ku."
7Yatone' malaeka' nasangai nei' Puang Alataala, "Pesuoku ang madihhi' noa pepahi, bahtu' sabua'ku ang meahha noa api."
8Ampo' panone' di Änä'na naoatee, "O Dehata, Dionto Tomaraya lambi' sapano-panona. Umpahenta sitonda kamarohoang.
9Ungkärä'i pengkero maroho ampo' ungkahiri' nei' pengkero karake. Dianto anna napakeangka'o Puang Alataala, Dehatammu, londo puha andana ingkänna solamu. Naminnä'io tandana napakeangka'o anna malai mahasa inahammu."
10Naoa toe'tee Puang Alataala pano di Änä'na, "O Puang, Dionto ang umpadahi lino mengkalao dolu, teyyemuntoo ang umpadahi langi'.
11Ingkänna yatoo inang la ditallangngi, ampo' Dio nei' dao la tirende. Langi' anna lino la mendahi sinnoa kaya' malullu'.
12La ulluhpi' mane umbala'ii ang bakahu. Ampo' Dio, la tontong loloo. Dai la aha kapuhaanna katuhoammu."
13Dake' aha natula' Puang Alataala pano di mesa malaeka' sinnoa yato ang puha natula' pano di Änä'na naoatee, "Ohko'o done di tando kuanangku lambi' ingkänna balimmu kupadihoi'ingko di pengngindä'ammu."
14Ampo' semalaeka'ang nei', dianto sabua'na Puang Alataala ang nasuo undului ingkänna tau ang la dipasalama'.