Alkitab Mobile SABDA
[VER] : [ARALLE]     [PL]  [PB] 
 <<  Kisah Para Rasul 28 >> 

1Kende'dangkang dai' di kalantanang mane kiinsangngi sanganna dianto Malta.

2Sangka' marohta' yato to pa'bohto aka' natammuiang nasalama'i anna napakamayaang. Sika mehompommi umpapuhpu api anna natambaiang mamindu aka' napahandu'mi kene' anna madi'ngi'.

3Ya' le'ba'mi Paulus ungngala hängkäng napatamai di api. Tahpa tisollo' siang ile keipo yaling mai yato di alla' hängkäng aka' maluhsung, anna ungkeki'i teyyena Paulus.

4Tahpana naita yato to pa'bohto mendehke' di teyyena Paulus yato ile, sipa'tula'-tula'mi naoatee, "Si papateang setonganna inde tau aka' moinnakato anna malang umpasalama' kalaena yaling mai di tängngä le'bo', ampo' inang dai napabei dehata bahine ang si umbala' kasalaanna tau la tuho."

5Ampo' napentahpi'ing tama di api Paulus; dai aha maaka nasa'ding.

6Ya' laonang sika naempei lolo naoatee la bängkä'mitoo bahtu' la tilumbäng mate, ampo' dae' aha maaka. Katämpä'anna sika naoante pole', 'Setonganna indee umbai dehatae'!'

7Yato ang kiongei tohho sirungku' tampona Publius, tuambahsa' yato di hao di ongeang. Marota' liu natahimboang lambi' tallung allo tallung bengi napotosuleang.

8Donetoo sipatu makorong ambena lumalla' anna metäi haha. Ya' le'ba'mi Paulus tama di tambinna yato to makorong. Nasambayangnging anna nasahpai. Ya' bono' siang donetoo.

9Tahpana napelele inde kaha-kaha tau, suleing ingkänna ang makorong senga' yaling yato di bohto, ya' sangka' napabono' tung nei'.

10Napakeangka' liuang anna mai'di aka-akanna si nabea tomande'ang. Tahpaki' la le'ba', napatoka bumingkang samai ang kipahallu.

11Tahpaki' tallu bulang di hao di Malta, ya' mengkalao bumang. Aha mesa kahpala' ang luilau' mai di Aleksandria tohho lolo tuke'ne' di hao yaling di tempona kamadingingang aka' pepahi tahuhu. Kahpala' yatoo disanga Dioskuri bahtu' dioatee dehata To Hendu. Ya' diang kiongei.

12Lambi'ang sau di Sirakusa, ya' tohhomang di lau' tallu benginna.

13Mane kipalao boi kahpala'ki' ungngolai behing le'bo', ya' lambi'mang sau di Bohto Mahoa' Regium. Tahpana marondonna, suleng pepahi di hao mai di tandoi kebo'na kahpala', ya' dombengirang mane lambi'ang sau di Putioli.

14Donetoo sitammuang mai'di ang umpetahpa' Puang Yesus. Sika napalau anna tohhokang di hao, ya' di haomang sammingku. Mane kipatahhi'i pole' pano di Roma.

15Nainsanna to mampetahpa' di hao di Roma naoatee la sule, ya' sika sule siang natammuiang di hao di Pasa' Apius anna pano di 'Tres Taberne,' ang bahtuanna: Tallu Pa'bengiang. Sitammungki', ya' ma'kuhhu'sumanga'mi Paulus dai' di Puang Alataala aka' masannang liu.

16Tahpana di haomang di Roma, ya' dipabei tubunne' Paulus di dasang senga' sibaha mesa tantara ang la mandakai.

17Tahpana tallu bengingki' di hao, inde Paulus untambaing ingkänna pongkahana to Yahudi. Tihimpunna, ya' ma'karang Paulus naoatee, "O ingkännakoa' solasohongku, setonganna dai aha umbabeä' kakarakeang pano di solataa' anna umpa'bali ada' kabiasaanna neneta. Ampo' moinnakato noa, disahka siamä' yaho di Yerusalem anna dibehoä' pano di to ma'pahenta Roma.

18Puhaä' dipahehsa, ya' pemalang la nalahpa'ä' yato to pampahehsa aka' dai aha kasalaangku ang la sihatang dipateiingkä'.

19Ampo' aka' daliui naaku to Yahudi ang yaho la dilahpa'ä', ya' kupalaung sitonda kabahaniang anna malai yato kaha-kahangku dihohto' pano di olona Kaisar; dai dioatee suleä' indee anna la unghahpo'ä' solata to Yahudi.

20Dianto suhunna anna kutambaimokoa' anna malaingkea' siita aka' la kupa'tula'ikoa'. Dinoa dipungoä' aka' umpetahpa'ä' yato ang masaeng tapemitaia' ingkänta to Israel."

21Ampo' natimba' to Yahudi naoatee, "Daang aha untahimbo suha' yaho mai di Yudea didiomu. Datoi aha solataa' ang sule yaho mai mantula'ingkang kakarakeammu.

22Ampo' pemala kihingngi ihsi inahammu, aka' kiinsang kioatee inde peada'ang ang umpepakuhuing, mai'di tau ang mambahoi."

23Ya' sika umbohtung mesa allo ang la naongei bou sitammu. Tahpana lambi' tempona, mai'di liung tau sule di hao di ongeanna Paulus. Dahi mengkalao di mebengngi' lambi' di maloe umpakaleso anna umpepainsangnging didiona Kapahentaanna Puang Alataala. Anna untula' toi ihsinna pepakuhunna Musa sibaha tula'na ingkänna nabi aka' umpeäng lalang anna malai yato to Yahudi mampetahpa' dai' di Puang Yesus.

24Ampo' yato tula'na, aha ang mampetahpa' anna aha ang dai mampetahpa'.

25Ampo' aka' dai para-para mampetahpa', ya' sika le'ba'ing umpellei yato dasang puhanna naoate Paulus, "Inang tahpa'ete' yato ang puha natula' lohpo' Inaha Masero, umpake Nabi Yesaya pano di neneta ingkäntaa' to Yahudi, ang naoatee:

26Laoo pano di alla'-alla'na inde tau anna ungngoaintee, 'La unghingngi loloa' ampo' dai la mentama di ahkalammu, anna la ungngita loloa' ampo' dai la ungnginsang.'

27Aka' sika makahha' bää'mi anna ma'binga-binga, anna noa toi sika kamba' buta. Sika napanoa inde andana paitai sibaha matanna, pahingngi sibaha talinganna anna andana sika napähängngi. Aka' andana sika sumulei di Kalaeku lambi' kupabono'.

28Dianto anna pahalluke'a' la umpengnginsangngi ungngoatee: Kasalama'ang yaho mai di Puang Alataala puha tunne' dipalambi' pano di tau ang tadia to Yahudi anna la natahimbo manahpai."

29[Tahpana puha ma'tula' Paulus, ya' le'ba'mi yato to Yahudi anna siteläng-telängngi aka' dai mala mesa inaha.]

30Dompahiama tohho Paulus yaling yato di dasang ang naseba toboe' di hao di Roma, anna si untahimbo mapia ingkänna tau ang sule mampellambi'i.

31Sibaha kabahaniang umpepainsangnging Bahtakaranna Puang Alataala anna umpepakuhuing didiona Dehatanta Puang Yesus, To Dilanti' la Mepasalama', anna dai aha tau mangkalapai.


  Share Facebook  |  Share Twitter

 <<  Kisah Para Rasul 28 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran