Alkitab Mobile SABDA
[VER] : [BUGIS]     [PL]  [PB] 
 <<  1 Tawarikh 11 >> 

1Laoni sininna pamimping bangsa Israélié ri Daud ri Hébron sibawa makkeda, "Idi’é sellaonaki Datu.

2Riyolopa nariyolo, mala wettunna mupa Saul paréntaki, Datu ritu pimpingngi tentara Israélié sises-siseng mennang maju mammusu. Nainappa PUWANG Allataalana Datu pura majjanci makkedaé Datu ritu iya maéloé pimpingngi umma’-Na sibawa mancaji arunna mennang."

3Nanaébbuna Daud assijancing sibawa sining pamimping Israéliéro. Nainappa nalanti mancaji arunna Israélié pada-pada iya puraé najjanciyang PUWANGNGE naolai Samuél.

4Séuwa wettu Arung Daud sibawa sininna tentara Israélié laowi musui kota Yérusalém. Iyaro wettué, iyaro kotaé riyasengngi Yébus, sibawa naonroiwi tau Yébus-é, pabbanuwa tulénna kotaéro.

5Purai makkeda sining tau Yébus-é lao ri Daud, makkedaé dé’ namakkullé muttamakiwi kotana mennanro. Iyakiya naulléi Daud sittaiwi bénténna mennang iya riyasengngé Sion. Iyaro wettué purai nappallebbangeng Daud ri ana’ buwana makkedaé tau bunge mpunoéngngi séddié tau Yébus mancajiwi matu pallima. Nasaba Yoab ritu bunge-bunge gasai tau Yébus-é, riyakkani mancaji pallima. (Indo’na Yoab riyasengngi Zéruya.) Puranana nasittai bénténg Sion, monroni Daud kuwaro. Iyanaro saba’na mappammulai wettuéro iyaro bénténgngé riteppui "Kota Daud".

6(11:5)

7(11:5)

8Napatettonni Daud paimeng kotaéro mappammulai ri onrong iya ripakatanré sibawa tana ri seddé alauna bulu-bulué; nainappa iyaro appatettongengngé napatterui Yoab gangka tépu.

9Pédé maitta pédé mawatang Daud, nasaba PUWANGNGE Pommakuwasa tulungngi.

10Iyanaé aseng-ngasenna sining parawirana Daud iya tarompoé. Silaong sininna ra’ya’ Israélié, purani mennang méwa kuwammengngi Daud namancaji arung pada-pada iya puraé najjanciyang PUWANGNGE. Sibawa matterui mennang sokongngi apparéntanna.

11Parawira mammulangngé iyanaritu Yasobam tau Hakhmoni, pamimpinnai "Triwira". Engka naengka na ri laleng séuwaé ammusureng naéwai 300 tau nanauno manengngi mennang sibawa bessinna.

12Tau maduwaé ri laleng Kalompo Telluéro iyanaritu Eléazar ana’ Dodo polé ri appanna Ahohi.

13Ri laleng musué ri Pas-Damim mammusui silaong Daud méwai tau Filistingngé. Wettunna tentara Israélié mammula lari, mattahangngi silaong ana’ buwana ri tengnga-tengngana séddié dare gandong sibawa mammusu méwai sining tau Filistingngéro. Nariwérénna apakalang battowa ri PUWANGNGE.

14(11:13)

15Ri séuwaé esso 3 tau polé ri 30 parawirana Daud iya mariyoloé, lao méwai sita Daud riséuwaé onrong iya mabbénténgngé riséddié bulu batu seddéna Gowa Adulam. Iyaro wettué makkémai tau Filistingngé ri Lompo Réfaim, sibawa sipasukang polé ri mennang tudangiwi Bétléhém.

16(11:15)

17Muddanini Daud ri kampong assalennaro sibawa makkeda, "Ah, ébara’na ripainukka uwai polé ri bujung seddéna pintu gerbangngé ri Bétléhém."

18Naéngkalinganaro, iya tellu parawiraéro bettui akkémanna tau Filistingngé nanaséro uwai polé ri bujungngéro, nainappa natiwi lao ri Daud. Iyakiya dé’ namaélo Daud ménungngi, mala natiri’i selaku pakkasuwiyang lao ri PUWANGNGE.

19Makkedai, "Nasabbing Allataala, dé’ nawedding uwénung iyaé uwai! Rékko uwénungngi, samanna uwénungngi darana tau iya puraé mappésonangngi nyawana!" Jaji dé’ sises-siseng Daud namaélo ménungngi uwaiéro. Iyanaro jasa-jasana iya tellu pajuwang iya poréro.

20Iya telluppulo parawira iya tarompoéro riyaseng towi "Telluppulo Parawira". Ripimpingngi mennang ri Abisai anrinna Yoab. Engka naengka naunoi 300 tau sibawa bessinna, narimakkuwannanaro namancaji tarompo. Iyakiya dé’ napada-pada héba’na Kalompo Telluéro.

21(11:20)

22Séddi parawira laing iya tarompoé iyanaritu Bénaya ana’ Yoyada, tau Kabzeel. Barani senna’i. Duwa pahlawang battowa polé ri Moab pura nauno. Engka séuwa esso massaljué muttama’i ri laleng séddié kalebbong sibawa mpunoi séddi singa kuwaro.

23Engkato naengka naunoi séddié tau Maséré iya battowaé watakkaléna; tanréna lebbi duwa météré. Iyaro tauwé massenjatai bessi iya battowa senna’é, iyakiya Bénaya moloiwi banna sibawa tarasulu. Bessi iya engkaé ri limanna tau Maséré’éro nasittaiwi nainappa napaké untu’ mpunoi tauwéro.

24Iyanaro jasa-jasana Bénaya, séddiwi polé ri Kalompo Telluppuloé.

25Ri laleng kalompo’éro, Bénaya kaminang mariyolo, iyakiya dé’ napada-pada héba’na Kalompo Tellué. Daud makkai mancaji kapala pengawal paribadinna.

26Mangoloéwé iyanaritu parawira-parawira laing iya tarompoé: Asaél anrinna Yoab, Elhanan ana’ Dodo tau Bétléhém, Samot tau Harod, Héles tau Péloni, Ira ana’ Ikes tau Tékoa, Abiézer tau Anatot, Sibkhai tau Husa, Ilai tau Ahohi, Maharai tau Nétofa, Héléd ana’ Baana tau Nétofa, Itai ana’ Ribai tau Gibéa ri daérana suku Bényamin, Bénaya tau Piraton, Hurai tau lompo-lompo Gaas, Abiél tau Araba, Azmawét tau Bahurim, Elyahba tau Saalbon, Hasyem tau Gizon, Yonatan ana’ Sagé tau Harari, Ahiam ana’ Sakhar tau Harari, Elifal ana’ Ur Héfer tau Mékhérati, Ahia tau Péloni, Hézrai tau Karmél, Naarai ana’ Ezbai, Yoél silessurenna Natan, Mibhar ana’ Hagri, Zélék tau Amon Naharai tau Beerot, pattiwi senjatana Yoab, Ira sibawa Garéb tau Yétri, Uria tau Hét, Zabad ana’ Ahlai, Adina ana’ Siza (sala séddinna ponggawa ri laleng suku Rubén iya mappunnaiyé pasukang 30 tau), Hanan ana’ Maakha, Yosafat tau Mitni, Uzia tau Asytarot, Syama sibawa Yéiél, ana’-ana’na Hotam, tau Aroér, Yédiaél sibawa Yoha, ana’-ana’na Simri, tau Tizi, Eliél tau Mahawim, Yéribai sibawa Yosawya, ana’-ana’na Elnaam, Yitma tau Moab Eliél, Obéd sibawa Yaasiél tau Mézobaya.

27(11:26)

28(11:26)

29(11:26)

30(11:26)

31(11:26)

32(11:26)

33(11:26)

34(11:26)

35(11:26)

36(11:26)

37(11:26)

38(11:26)

39(11:26)

40(11:26)

41(11:26)

42(11:26)

43(11:26)

44(11:26)

45(11:26)

46(11:26)

47(11:26)


  Share Facebook  |  Share Twitter

 <<  1 Tawarikh 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran