Alkitab Mobile SABDA
[VER] : [GULLAH]     [PL]  [PB] 
 <<  Galatia 3 >> 

Wen We Trus God, We Lib de True Life

1People ob Galatia! Oona ain got no sense! Whodat da mek oona so mix op dat oona ain know wa oona da do? A beena tell oona cleah as could be, how people done kill Jedus Christ pon de cross.

2Oona tell me jes dis one ting. God ain gii oona e Sperit cause oona da do wa de Jew Law tell oona fa do, ainty? E gii oona e Sperit cause oona yeh de Good Nyews an bleebe um, ainty dat so?

3Oona ain got no sense? God Sperit mek oona staat fa lib dis nyew way. Fa sho, oona ain wahn fa lib da res ob oona life oona own way, jes by oona powa, ainty?

4Oona tink dat all wa happen ta oona ain mean nottin? Fa true, dat haffa mean plenty ta oona!

5God ain da gii oona de Sperit an mek miracle happen mongst oona cause oona da do wa de Jew Law tell oona fa do, ainty? E da do all ob dat jes cause oona yeh de Good Nyews an bleebe um.

6Now den, leh we tink bout wa happen ta Abraham. Dey write een God Book say, “Abraham trus een God. An cause e trus een God, God say all ting done been mek right tween Abraham an esef.”

7So den, oona oughta ondastan dat de people wa trus een God fa true, dey Abraham chullun-chullun. Dey Abraham chullun-chullun mo den dem wa done been bon ta Abraham fambly.

8Fo e happen, God Book done say dat God gwine mek all ting right tween esef an dem people dat ain Jew, cause dey trus een pon um fa true. An fo e happen, wa dey done write een God Book show how Abraham been yeh de Good Nyews wen God tell um say, “A gwine nyuse ya fa bless all de people een de wol.”

9Abraham trus een God fa true, an God bless um. Same way, God da bless all dem dat trus een um fa true, jes like e bless Abraham.

10De one wa tink all ting gwine be right twix um an God cause e da try fa do wa de Jew Law say, dat one dey da lib all de time da know dat God gwine pit E cuss pon um. Cause dey write een God Book say, “God gwine pit E cuss pon de one wa ain da do all de time all dat de Book ob da Jew Law say.”

11Now den, ebrybody kin see dat God ain mek nottin right twix um an a poson jes cause dat one da do wa de Law say e haffa do. Cause God Book tell we say, “Wen somebody trus een God, God mek all ting right twix um an dat one, an dat gwine mek dat poson lib de true life.”

12Bot wen somebody da do all wa de Law say, dat ain tall de same as wen a poson da trus een God. Steada dat, God Book say, “Ef somebody da do wa de Law say e haffa do, dat one gwine jes git de life dat de Law say e git.”

13Bot Christ done mek we free. E mek de Law so e ain hab no cuss pon we no mo. Cause Christ leh um cuss um fa dead pon de cross fa we sake, like dey write een God Book say, “God gwine cuss de poson dey hang pon a tree.”

14Christ mek we free so dat cause ob wa e done do, de people dat ain Jew gwine git de blessin jes like e promise Abraham, so dat we gwine git God Sperit wa e promise cause we trus een God.

De Jew Law an de Promise wa God Gii

15Me Christian bredren, A gwine taak bout ting dat we all know. De promise ob God same like wen two people gree bout sompin an sign a paper fa say dat. Dat mean fa say dey mek a cobnant. Ain nobody kin change wa dey gree fa do een dat cobnant an pay no tention ta um. An nobody kin add mo wod ta um needa.

16Now den, God mek e promise den ta Abraham an ta de chile ob e chullun-chullun. God Book ain say, “an ta ya chullun-chullun,” meanin God beena taak bout lotsa people wa all been Abraham chullun-chullun. God Book say, “an ta de chile ob ya chullun-chullun.” Dat mean fa say dat God beena taak bout jes one poson, an dat one da Christ.

17Wa A mean fa say ta oona, e dat God been mek a cobnant wid Abraham, an e promise fa do wa e tell Abraham e gwine do. Wen God gree fa mek dis cobnant yah, e wait fo hundud an tirty yeah fo e gii de Jew people de Law. An dis Law yah ain neba gwine change wa God promise o mek um come ta nottin.

18Ef wa God gii, come ta somebody cause dat one da do jes wa de Law say, den dat mean fa say dat blessin ain come ta de poson cause ob wa God promise e gwine do. Bot cause God promise dat blessin ta Abraham, dat wa mek God gim de blessin.

19So den, wa mek God gii people de Jew Law? God gii people de Law atta e gim de cobnant fa show um dat dey da sin. An God mek de Law fa las til Christ come. Christ de chile ob Abraham chullun-chullun. An e de one wa God taak bout wen e mek de promise. God sen some angel dem fa come gii de man Moses de Law. An Moses been de poson wa gone tween God an de Jew people. E pass de Law on ta de people dem.

20Now dey ain no need fa a oda poson fa go tween, cep wen dey mo den jes one poson. An God, e jes one, an ain need no oda poson fa go tween.

Wa God Wahn de Law fa Do

21Fa true, de wod ob de Law ain ginst wa God done promise, ainty? No, not eben a leeleetle bit! Cause ef God done been fa gii people some special kind ob law dat kin mek um lib fa true, den fa true, God been gwine mek all ting right tween people an esef wen dem people do wa dat special law say.

22Bot dey write een God Book say, dat sin da rule all de wol, so dat God could gii ta dem wa trus een Jedus Christ wa e promise fa gim. An wa e promise fa gim come jes wen dey trus een Jedus.

23Fo de time come wen people could trus een Jedus Christ, de Jew Law dat Moses gii we, beena guard we like we been prisona. We been shet op een de jailhouse by de Law til dat time come wen God would show people, say dey oughta trus een Jedus.

24So den, til Christ come, de Jew Law been like a poson wa da rule oba we fa try fa mek we do wa we oughta do. De Law done dis so dat wen Christ done come, God could mek all ting right tween we an um wen we trus een Christ.

25Bot now dat we kin trus een Christ, de Jew Law ain rule oba we no mo.

26Cause oona trus een Christ Jedus, God done mek all ob oona e chullun.

27Ebry one ob oona wa done git bactize, oona come fa be one wid Christ, an so oona all come fa be like Christ.

28All ob oona wa come fa be one wid Christ Jedus, oona togeda come fa be one. Jew an dem wa ain Jew, slabe an freedman, man an ooman, all come fa be one, cause oona all come fa be one een Christ Jedus.

29Cause oona all blongst ta Christ, dat mean fa say dat oona be Abraham chullun-chullun, an oona gwine git wa God promise fa gii ta Abraham chullun-chullun.


  Share Facebook  |  Share Twitter

 <<  Galatia 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel