Dual Panel1A Paul, a postle, da write ta de people ob de choch dem een Galatia. Ain no man wa pick me an gii me de tority fa be a postle. Jedus Christ an God we Fada wa done mek Jedus git op fom mongst de dead an lib gin, dey pick me fa be a postle.
2An all de Christian bredren yah wid me een Galatia da write ta oona too.
3A aks God we Fada an we Lawd Jedus Christ fa bless oona an gii oona peace een oona haat.
4Christ done leh people kill um fa pay fa we sin. E done dat fa set we free, so we ain haffa lib like people lib now een dis wol weh ebil da rule. Wen Christ do dat, e do wa we Fada God wahn.
5Leh we praise God faeba an eba! Amen.
Fa True Dey Ain No Oda Message ob Good Nyews
6Oona mek me stonish fa true! Oona da ton way so fas fom folla God wa call oona. Oona done come ta God cause ob Christ blessin pon oona. Bot now oona da ton ta noda message wa some people say de Good Nyews.
7Fa true, dey ain no oda Good Nyews tall. Bot some people da trouble oona an mek oona opsot. Dey da try fa change de Good Nyews bout Christ.
8Bot ain nobody nohow oughta preach no Good Nyews ta oona wa ain de same message wa we beena preach ta oona. Ef we o a angel esef wa come outta heaben, preach diffunt message ta oona, leh God condemn um fa suffa een hell faeba!
9We been tell oona, an A da tell oona gin say, “Ain nobody nohow oughta preach no Good Nyews ta oona wa diffunt fom wa oona done bleebe at fus. Ef somebody da do dat, leh God condemn um fa suffa een hell faeba!
10A ain da try fa mek people praise me, ainty? No! A wahn God fa praise me! Oona ain tink A da try jes fa do wa people wahn, ainty? Ef A stillyet jes keep on da wahn fa please people, fa true A ain no saabant ob Christ.
How Paul Come fa Be a Postle
11Me Christian bredren, A wahn oona fa know dat de Good Nyews wa A preach ain nottin dat people done mek op.
12Ain been no man wa fus tell me dis Good Nyews, an ain nobody laan me nottin bout um. Steada dat, Jedus Christ show um ta me, da mek me ondastan de Good Nyews.
13Oona done yeh bout de way A nyuse fa lib wen A beena folla God like de Jew people folla God. Oona know dat A done beena mek de people ob God choch suffa real bad. A ain hab no mussy pon um. A done beena do all dat A able fa do fa stroy um.
14A done beena do plenty ting fa folla de way dat de Jew people da folla God. A done beena do lotsa mo den oda nyoung people like me. Cause A beena wahn fa true fa do dem ting wa we ole people laan we fa do, de way dey beena folla God.
15Bot God bless me fa true. E pick me fom way back fo A been bon an call me fa saab um.
16An wen e cide fa mek me know e Son, so dat A gwine go tell de Good Nyews bout um ta dem people wa ain Jew, A ain aks no oda poson fa tell me wa fa do.
17Wen God call me, A ain gone op ta Jerusalem fa taak wid dem wa been postle fo A been. Steada dat, A jes gone right way ta Arabia. Den A come back ta Damascus.
18E tek shree yeah atta A bleebe pon Jedus Christ, fo A gone op ta Jerusalem fa taak ta Peter. An A done stay dey wid um fa fifteen day.
19A ain see none ob dem oda postle, cep fa jes James, de Lawd bredren.
20All wa A da set down yah true fa sho. God know dat A ain da tell oona no lie!
21Atta A come outta Jerusalem, A gone ta some dem arie dey een Syria an Cilicia.
22Jurin dat time dey, de Christian dem wa been dey een de choch dem een Judea, dey ain beena know me yet.
23Dey jes beena yeh people da taak say, “Dat man wa nyuse fa mek we suffa, now e da tell all de people, say dey oughta bleebe pon Jedus Christ. Fo e done beena try fa stroy all dem wa bleebe pon Jedus!”
24So all dem people yah beena praise God fa wa e da do shru me.